ଆଝାରୁଦ୍ଦିନଙ୍କ ପୁଅ ରାଜନୀତିରେ: ୧୧ ଦିନ ଖେଳିଥିଲେ କ୍ରିକେଟ

ହାଇଦ୍ରାବାଦ: ପୂର୍ବତନ ଭାରତୀୟ କ୍ରିକେଟର ଏବଂ ମୁରାଦାବାଦର ପୂର୍ବତନ ସାଂସଦ ମହମ୍ମଦ ଆଝାରୁଦ୍ଦିନଙ୍କ ପୁଅ ଅସଦୁଦ୍ଦିନ ଏବେ ରାଜନୀତିରେ ପ୍ରବେଶ କରିଛନ୍ତି। ସମ୍ପ୍ରତି ଆଝାରୁଦ୍ଦିନଙ୍କ ପୁଅ ଅସଦୁଦ୍ଦିନଙ୍କୁ ତେଲେଙ୍ଗାନା କଂଗ୍ରେସର ମହାସଚିବ ଭାବରେ ନିଯୁକ୍ତ କରାଯାଇଛି। ଏହି ନୂତନ ଭୂମିକା ବିଷୟରେ, ଅସଦୁଦ୍ଦିନ କହିଛନ୍ତି ଯେ, ସେ ରାଜନୀତି ମାଧ୍ୟମରେ ଲୋକଙ୍କ ସେବା କରିବାକୁ ଚାହାନ୍ତି ଏବଂ ଏଥିପାଇଁ ସେ ତାଙ୍କ ପିତା ଏବଂ କଂଗ୍ରେସ ନେତା ରାହୁଲ ଗାନ୍ଧୀଙ୍କଠାରୁ ପ୍ରେରଣା ପାଇଛନ୍ତି।

୩୫ ବର୍ଷୀୟ ଅସଦୁଦ୍ଦିନ ଥରେ ହାଇଦ୍ରାବାଦ କୋଲ୍ଟସ୍ ଏକାଦଶ ଏବଂ ଗୋଆ ଭଳି ଦଳ ପାଇଁ ପ୍ରଥମ ଶ୍ରେଣୀ କ୍ରିକେଟ୍ ଖେଳିଥିଲେ। କ୍ରିକେଟରେ ତାଙ୍କର ୧୧ ଦିନର କ୍ୟାରିୟର ରହିଛି। ଏବେ ସେ ରାଜନୀତିରେ ସମ୍ପୂର୍ଣ୍ଣ ସକ୍ରିୟ ହୋଇଗଲେଣି। ସେ କହିଛନ୍ତି ଯେ, ମୁଁ ଲୋକଙ୍କ ମଧ୍ୟରେ ରହିବାକୁ ଏବଂ ସେମାନଙ୍କ ସେବା କରିବାକୁ ଚାହୁଁଛି। ଯଦି ମୋର କାମ ଲୋକଙ୍କ ଜୀବନରେ କିଛି ସକାରାତ୍ମକ ପରିବର୍ତ୍ତନ ଆଣେ, ତେବେ ମୁଁ ଅତ୍ୟନ୍ତ ସନ୍ତୋଷ ପାଇବି।

ଅସଦୁଦ୍ଦିନ ତାଙ୍କ ନୂତନ ଦାୟିତ୍ୱକୁ ଏକ ଗୁରୁତ୍ୱପୂର୍ଣ୍ଣ ସୁଯୋଗ ଭାବରେ ବର୍ଣ୍ଣନା କରି କହିଛନ୍ତି ଯେ, ସେ କଂଗ୍ରେସର ବିଚାରଧାରା ଏବଂ ନୀତି ଅନୁସାରେ କାମ କରିବାକୁ ପ୍ରତିଶ୍ରୁତିଦ୍ଧ। ସେ ରାହୁଲ ଗାନ୍ଧୀଙ୍କ ସଂଘର୍ଷ ଏବଂ ସାମାଜିକ ନ୍ୟାୟ ପ୍ରତି ତାଙ୍କ ପ୍ରତିବଦ୍ଧତାକୁ ମଧ୍ୟ ପ୍ରଶଂସା କରିଛନ୍ତି। ଅସଦୁଦ୍ଦିନ ତାଙ୍କ ପିତା ଆଝାରୁଦ୍ଦିନଙ୍କୁ ନିଜ ପାଇଁ ରାଜନୀତିରେ ପ୍ରେରଣାର ଉତ୍ସ ବୋଲି ମଧ୍ୟ ବର୍ଣ୍ଣନା କରିଛନ୍ତି।

ଉଲ୍ଲେଖନୀୟ, ଜୁନ୍ ୯ ତାରିଖରେ କଂଗ୍ରେସ ତେଲେଙ୍ଗାନା ପ୍ରଦେଶ କଂଗ୍ରେସ କମିଟିରେ ୨୭ ଜଣ ଉପାଧ୍ୟକ୍ଷ ଏବଂ ୬୯ ଜଣ ମହାସଚିବଙ୍କୁ ନିଯୁକ୍ତ କରିଥିଲା, ଯାହା ନୂତନ ରାଜ୍ୟ ସଭାପତି ବି ମହେଶ କୁମାର ଗୌଡ଼ ଦାୟିତ୍ୱ ନେବା ପରଠାରୁ ବିଚାରାଧୀନ ଥିଲା।

ଅଧିକ ପଢ଼ନ୍ତୁ: ‘ହଇଜାର ବ୍ୟାପକତାକୁ ରୋକିବା ପାଇଁ ତୁରନ୍ତ ଦୃଢ଼ ପଦକ୍ଷେପ ନିଅନ୍ତୁ ସରକାର’

mohammad-azharuddin | mohammad-asaduddin | congress