ବାଂଲାଦେଶ ବାୟୁସେନା ଘାଟିରେ ଆକ୍ରମଣ, ଜଣେ ମୃତ

ଢାକା: କକ୍ସ ବଜାରରେ ଥିବା ବାଂଲାଦେଶ ବାୟୁସେନା (ବିଏଏଫ୍) ପ୍ରତିଷ୍ଠାନ ଉପରେ ସୋମବାର ପଡୋଶୀ ସମିତି ପଡ଼ା ଅଞ୍ଚଳରୁ ଆକ୍ରମଣ ହୋଇଥିଲା। ଏହାର ଜବାବରେ ବାଂଲାଦେଶ ବାୟୁସେନା ପରିସ୍ଥିତିର ମୁକାବିଲା ପାଇଁ ଆବଶ୍ୟକ ପଦକ୍ଷେପ ନେଉଛି ବୋଲି ଆଇଏସ୍‌ପିଆର୍‌ର ସହକାରୀ ନିର୍ଦେଶିକା ଆୟେଶା ସିଦ୍ଦିକିକା ଏକ ପ୍ରେସ୍ ବିବୃତିରେ କହିଛନ୍ତି। ଏହି ସମ୍ବାଦକୁ ନିଶ୍ଚିତ କରି କକ୍ସ ବଜାରର ଜିଲ୍ଲା କମିସନର ମହମ୍ମଦ ସଲାହୁଦ୍ଦିନ ଗଣମାଧ୍ୟମକୁ କହିଛନ୍ତି, ଏହି ଘଟଣାରେ ଜଣଙ୍କର ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଛନ୍ତି। ଉଭୟ ପକ୍ଷଙ୍କ ସହ ଆଲୋଚନା କରି ସଂଘର୍ଷର କାରଣ ଅନୁସନ୍ଧାନ କରାଯାଇ ଆବଶ୍ୟକ ପଦକ୍ଷେପ ନିଆଯିବ।

ପୁଲିସ ଅଧିକାରୀ କହିଛନ୍ତି, ସଂଘର୍ଷ ସମୟରେ ସ୍ଥାନୀୟ ବ୍ୟବସାୟୀ ୩୦ ବର୍ଷୀୟ ଶିହାବ କବୀରଙ୍କୁ ଗୁଳି କରାଯାଇଥିଲା। ସେ ୱାର୍ଡ-୧ ସମିତି ପଡ଼ାର ନାସିର ଉଦ୍ଦିନଙ୍କ ପୁଅ। ଗୃହ ବ୍ୟାପାର ପରାମର୍ଶଦାତା ଅବସରପ୍ରାପ୍ତ ଲେଫ୍ଟନାଣ୍ଟ ଜେନେରାଲ ଏମ୍ ଜାହାଙ୍ଗୀର ଆଲାମ ଚୌଧୁରୀ ଆଜି ସକାଳେ ଏକ ସାମ୍ବାଦିକ ସମ୍ମିଳନୀରେ ଆଇନ ଶୃଙ୍ଖଳା ବଜାୟ ରଖିବା ପାଇଁ ସରକାରଙ୍କ ପ୍ରତିବଦ୍ଧତାକୁ ଦୋହରାଇବାର କିଛି ଘଣ୍ଟା ପରେ ଏହି ଆକ୍ରମଣ ହୋଇଛି। ତାଙ୍କ ଢାକା ବାସଭବନରେ ଉଦ୍‌ବୋଧନ ଦେଇ ସେ ଶେଖ୍ ହସିନାଙ୍କ ନେତୃତ୍ବାଧୀନ ଆୱାମୀ ଲିଗ୍‌ର ସହଯୋଗୀ ଦଳଗୁଡ଼ିକ ଦେଶକୁ ଅସ୍ଥିର କରିବାକୁ ଉଦ୍ୟମ କରୁଥିବା ଅଭିଯୋଗ କରିଥିଲେ ଏବଂ ପ୍ରତିଶ୍ରୁତି ଦେଇଥିଲେ ଯେ ସେମାନଙ୍କୁ କୌଣସି ପ୍ରକାରେ ଛଡ଼ାଯିବ ନାହିଁ।