ସାବଧାନ! ଗୁଟଖା ଖାଇ ରାସ୍ତାରେ ଛେପ ପକାଇଲେ ଉଠାଯିବ ଫଟୋ: ଗଡକରୀଙ୍କ ତାଗିଦ୍

ନାଗପୁର: ଗୁଟଖା ଏବଂ ପାନ୍ ମସଲା ଖାଉଥିବା ଲୋକମାନେ ସର୍ବସାଧାରଣ ଚଳପ୍ରଚଳ ହେଉଥିବା ରାସ୍ତାରେ ଛେପ ପକାଇଥାନ୍ତି। ପରିଷ୍କାର ରାସ୍ତାରେ ମଧ୍ୟ ଗୁଟଖାର ଚିହ୍ନ ଦେଖିବାକୁ ମିଳେ। ଅନ୍ୟପଟେ, ଯଦି ଗୁଟଖା ଛେପ ପକାଉଥିବା ବ୍ୟକ୍ତିଙ୍କୁ କେହି ଗାଳି ଦିଅନ୍ତି, ତେବେ ଏଭଳି କରୁଥିବା ବ୍ୟକ୍ତି ସେମାନଙ୍କ ଉପରେ କ୍ରୋଧିତ ହୁଅନ୍ତି।

କିନ୍ତୁ କେନ୍ଦ୍ରମନ୍ତ୍ରୀ ନୀତିନ ଗଡକରୀ ଏଭଳି ଲୋକଙ୍କ ପାଇଁ ସମାଧାନର ବାଟ ପ୍ରକାଶ କରିଛନ୍ତି। ନୀତିନ ଗଡକରୀ କହିଛନ୍ତି ଯେ ଗୁଟଖା ଏବଂ ପାନ ମସଲା ଛେପ ପକାଇବାବେଳେ ଏହି ଲୋକଙ୍କ ଫଟୋ ଉଠାଇବା ଉଚିତ୍ ଏବଂ ଏହାକୁ ଖବରକାଗଜରେ ପ୍ରକାଶିତ କରିବା ଉଚିତ୍।

ସ୍ବଚ୍ଛ ଭାରତ ମିଶନର ଦଶମ ବାର୍ଷିକୀରେ ନାଗପୁରରେ ଏକ ଅଭିଭାଷଣ ପ୍ରଦାନ କରୁଥିବାବେଳେ କେନ୍ଦ୍ର ମନ୍ତ୍ରୀ ଅନେକ ପ୍ରସଙ୍ଗରେ କହିଥିଲେ। ଏହି ସମୟରେ, ନୀତିନ ଗଡକରୀ ସେହି ଲୋକମାନଙ୍କ ବିଷୟରେ ଉଲ୍ଲେଖ କରିଥିଲେ ଯେଉଁମାନେ ରାସ୍ତାରେ ଛେପ ପକାନ୍ତି। ସେ କହିଥିଲେ ଆମ ଦେଶର ଲୋକମାନେ ବହୁତ ଚତୁର ଅଟନ୍ତି।

ଯେତେବେଳେ ସେମାନେ ଚକୋଲେଟ୍ ଖାଆନ୍ତି, ସେମାନେ ଏହାର ରାପରକୁ ରାସ୍ତାରେ ଫୋପାଡି ଦିଅନ୍ତି। କିନ୍ତୁ ଯେତେବେଳେ ସେଭଳି ଲୋକ ବିଦେଶ ଯାଆନ୍ତି, ସେମାନେ ନିଜ ପକେଟରେ ଚକୋଲେଟ୍ ରାପର୍ ରଖନ୍ତି। ବିଦେଶୀ ଦେଶରେ ସେହି ଲୋକ ନିଜକୁ ସଭ୍ୟ ନାଗରିକ ଭାବରେ ଉପସ୍ଥାପନ କରନ୍ତି, କିନ୍ତୁ ନିଜ ଦେଶରେ ମଇଳା ପକାଇବାକୁ କୁଣ୍ଠାବୋଧ କରନ୍ତି ନାହିଁ।

ନିଜର ଉଦାହରଣ ଦେଇ ନୀତିନ ଗଡକରୀ କହିଛନ୍ତି ଯେ ପୂର୍ବରୁ ମୁଁ ମଧ୍ୟ ଏହିପରି ଥିଲି। କୌଣସି ଜିନିଷ ଖାଇବା କିମ୍ବା ପିଇବା ପରେ ରାପର୍‌କୁ ‌ଏଣେତେଣେ ଫୋପାଡି ଦେଉଥିଲି। କିନ୍ତୁ ବର୍ତ୍ତମାନ ମୁଁ ନିଜକୁ ପରିବର୍ତ୍ତନ କରିଛି। ବର୍ତ୍ତମାନ ଯେତେବେଳେ ମୁଁ ଚକୋଲେଟ୍ ଖାଏ, ମୁଁ ରାପରକୁ ପକେଟରେ ରଖି ଘରକୁ ଯିବାବେଳେ ଏହାକୁ ଡଷ୍ଟବିନ୍‌ରେ ଫୋପାଡି ଦିଏ।

ରାସ୍ତାରେ ଗୁଟଖା ଖାଉଥିବା ଲୋକଙ୍କ ବିଷୟରେ ନିତିନ ଗଡକରୀ କହିଛନ୍ତି ଯେ ଗୁଟଖା ଏବଂ ପାନ ମସଲା ଖାଉଥିବା ଲୋକମାନେ ଅନେକ ସମୟରେ ରାସ୍ତାରେ ଛେପ ପକାନ୍ତି। ଏହା କେବଳ ରାସ୍ତାକୁ ଅପରିଷ୍କାର କରେ ନାହିଁ ବରଂ ଅନ୍ୟ ଲୋକଙ୍କୁ ମଧ୍ୟ ଅସୁବିଧାରେ ପକାଇଥାଏ। ଏଥିପାଇଁ ସେମାନଙ୍କ ପାଇଁ କେବଳ ଗୋଟିଏ ବାଟ ଅଛି । ରାସ୍ତାରେ ଛେପ ପକାଉଥିବା ଲୋକଙ୍କ ଫଟୋ ଉଠାଯାଇ ଏହାକୁ  ପରଦିନ ଖବରକାଗଜରେ ପ୍ରକାଶ କରାଯିବ ଆବଶ୍ୟକ। ଏବେ ଗଡକରୀଙ୍କ ଏହି ମନ୍ତବ୍ୟ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି।