ପାକିସ୍ତାନ ଯାଇ ପ୍ରମାଣ ଖୋଜ; କଂଗ୍ରେସ ସାଂସଦଙ୍କୁ ବିଜେପିର ଜବାବ

ନୂଆଦିଲ୍ଲୀ: ଜମ୍ମୁ-କଶ୍ମୀରର ପହଲଗାମରେ ଆତଙ୍କବାଦୀ ଆକ୍ରମଣ ପରେ, ସମସ୍ତଙ୍କ ନଜର ସରକାରଙ୍କ କାର୍ଯ୍ୟାନୁଷ୍ଠାନ ଉପରେ ରହିଛି। ଏମଧ୍ୟରେ ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ ତଥା କଂଗ୍ରେସ ସାଂସଦ ଚରଣଜିତ ସିଂହ ଚନ୍ନୀଙ୍କ ଏକ ବୟାନ ବିବାଦ ସୃଷ୍ଟି କରିଛି। ଚନ୍ନୀ ୨୦୧୬ରେ ହୋଇଥିବା ସର୍ଜିକାଲ୍ ଷ୍ଟ୍ରାଇକ୍ ଉପରେ ପ୍ରଶ୍ନ ଉଠାଇଥିଲେ। ବିଜେପି ପାଲଟା ଜବାବ ଦେବାରୁ ଏବେ ସେ କହିଛନ୍ତି ଯେ, ମୁଁ ସର୍ଜିକାଲ୍ ଷ୍ଟ୍ରାଇକ୍ ଉପରେ କୌଣସି ପ୍ରମାଣ ମାଗି ନାହିଁ।

କଂଗ୍ରେସ କାର୍ଯ୍ୟକାରିଣୀ ବୈଠକ ପରେ ସାମ୍ବାଦିକମାନଙ୍କ ସହ ଆଲୋଚନା ସମୟରେ ଚନ୍ନୀ କହିଛନ୍ତି, "ପହଲଗାମ ଆକ୍ରମଣକୁ ୧୦ ଦିନ ବିତିଗଲାଣି। କିନ୍ତୁ ସରକାରଙ୍କ ପକ୍ଷରୁ କୌଣସି ଠୋସ୍ ପଦକ୍ଷେପ ନିଆଯାଇନାହିଁ। ପାକିସ୍ତାନ ବିରୋଧରେ କ'ଣ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ତାହା ଦେଶ ଦେଖୁଛି। ଆମେ ଚାହୁଁଛୁ ଯେ ସରକାର ତୁରନ୍ତ ଜବାବ ଦିଅନ୍ତୁ। ଯଦି ଆମ ଦେଶରେ ବୋମା ପଡ଼ିବ, ତେବେ ଆମେ କ'ଣ ଏହା ବିଷୟରେ ଜାଣିପାରିବୁ ନାହିଁ? ସେମାନେ କହୁଛନ୍ତି ଯେ, ଆମେ ପାକିସ୍ତାନରେ ସର୍ଜିକାଲ୍ ଷ୍ଟ୍ରାଇକ୍ କରିଥିଲୁ। ହେଲେ ସର୍ଜିକାଲ୍ ଷ୍ଟ୍ରାଇକ୍ କେଉଁ ସ୍ଥାନରେ କରାଯାଇଥିଲା, ତାହା ଜଣାପଡ଼ିଲା ନାହିଁ। କେହି ଏହା ବିଷୟରେ ଜାଣିପାରି ନଥିଲେ। ଏବେ ପହଲଗାମ୍ ଆକ୍ରମଣ ପରେ ଆମେ ଦାବି କରୁଛୁ ଯେ, କିଛି କରାଯାଉ। ଦେଶକୁ କୁହନ୍ତୁ ଯେ ସେହି ଲୋକମାନେ କିଏ ଥିଲେ।" ଚନ୍ନୀଙ୍କ ଏହି ବୟାନକୁ ନେଇ ରାଜନୀତି ତୀବ୍ର ହୋଇଛି।

ଚନ୍ନୀଙ୍କ ମନ୍ତବ୍ୟ ଉପରେ ବିଜେପି ଜବାବ ଦେଇ ତାଙ୍କୁ ସମାଲୋଚନା କରିଛି। ଦଳର ନେତା ଏବଂ ଦିଲ୍ଲୀ ମନ୍ତ୍ରୀ ମଞ୍ଜୀନ୍ଦର ସିଂହ ସିରସା କହିଛନ୍ତି, "କଂଗ୍ରେସ ପୁଣିଥରେ ସେନା ଏବଂ ବାୟୁସେନା ଉପରେ ପ୍ରଶ୍ନ ଉଠାଇଛି। ଚରଣଜିତ ସିଂହ ଚନ୍ନୀ ପୁଣି ଥରେ ସର୍ଜିକାଲ୍ ଷ୍ଟ୍ରାଇକ୍‌କୁ ନେଇ ପ୍ରଶ୍ନ ଉଠାଇଛନ୍ତି। ସେ ଏ‌ବେ ବି ପ୍ରମାଣ ଚାହାଁନ୍ତି। କଂଗ୍ରେସ ଏବଂ ଗାନ୍ଧୀ ପରିବାରର ଏ କି ପ୍ରକାର ମାନସିକତା। ସେମାନେ ବାରମ୍ବାର ସେନା ଏବଂ ବାୟୁସେନା ଉପରେ ମିଛ ଅଭିଯୋଗ କରୁଛନ୍ତି ଏବଂ କହୁଛନ୍ତି ଯେ, ପାକିସ୍ତାନ ସତ୍ୟ କହୁଛି? ପାକିସ୍ତାନ ନିଜେ ସର୍ଜିକାଲ୍ ଷ୍ଟ୍ରାଇକ୍ କରାଯାଇଥିଲା ବୋଲି କହୁଥିବା ସତ୍ତ୍ୱେ କଂଗ୍ରେସ ଏଭଳି ପ୍ରଶ୍ନ କରୁଛି। ଯଦି ପ୍ରମାଣ ଦରକାର, ତେବେ ରାହୁଲ ଗାନ୍ଧୀଙ୍କ ସହ ପାକିସ୍ତାନ ଦେଖ କେଉଁଠି ସର୍ଜିକାଲ୍ ଷ୍ଟ୍ରାଇକ୍ କରାଯାଇଥିଲା।"