ବିଜେପି ୨୨୦ ଆସନ ପାଇବା ଆଶା, ଗଠନ କରି ପାରିବନି ସରକାର: କେଜ୍ରିୱାଲ

ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଭାରତୀୟ ଜନତା ପାର୍ଟି (ବିଜେପି)କୁ କଡ଼ା ସମାଲୋଚନା କରିଛନ୍ତି। ସେ କହିଛନ୍ତି ଯେ ଚାଲିଥିବା ଲୋକସଭା ନିର୍ବାଚନରେ ​​ଶାସକ ଦଳ ବିଜେପି ୨୨୦ରୁ ୨୩୦ ମଧ୍ୟରେ ଆସନ ପାଇବ। ଏହାଠାରୁ ଅଧିକ ଆସନ ପାଇବ ନାହିଁ।
ମଧ୍ୟବର୍ତ୍ତୀ ଜାମିନରେ ମୁକ୍ତ ହେବାର ଗୋଟିଏ ଦିନ ପରେ ଦିଲ୍ଲୀର ଆମ୍ ଆଦମୀ ପାର୍ଟି ମୁଖ୍ୟାଳୟରେ ଯୋଗ ଦେଇ କେଜ୍ରିୱାଲ ଏହା ମଧ୍ୟ କହିଛନ୍ତି ଯେ ବିରୋଧୀ ଇଣ୍ଡିଆ ମେଣ୍ଟ ନିର୍ବାଚନରେ ​​ଜିତିବ ଏବଂ ଏଏପି କେନ୍ଦ୍ରରେ ପରବର୍ତ୍ତୀ ସରକାରଙ୍କ ଅଂଶ ହେବ।

ସେ କହିଛନ୍ତି ଜେଲରୁ ମୁକୁଳିବା ପରେ ଗତ ୨୦ ଘଣ୍ଟା ମଧ୍ୟରେ ମୁଁ ରାଜନୈତିକ ସମୀକ୍ଷକ ତଥା ସର୍ଭେ ବିଶେଷଜ୍ଞ ଏବଂ ଲୋକଙ୍କ ସହ କଥା ହୋଇଥିଲି । ମୁଁ ଜାଣିବାକୁ ପାଇଲି ଯେ ବିଜେପି ସରକାର ଗଠନ କରିବ ନାହିଁ।

ଅରବିନ୍ଦ କେଜ୍ରିୱାଲ କହିଛନ୍ତି ଯେ ହରିୟାଣା, ରାଜସ୍ଥାନ, କର୍ଣ୍ଣାଟକ, ଦିଲ୍ଲୀ, ବିହାର, ମହାରାଷ୍ଟ୍ର, ପଶ୍ଚିମବଙ୍ଗ, ଝାଡଖଣ୍ଡ ଏବଂ ଉତ୍ତରପ୍ରଦେଶରେ ବିଜେପିର ଲୋକସଭା ଆସନ ହ୍ରାସ ପାଇବ। କୌଣସି ରାଜ୍ୟରେ ସେମାନଙ୍କର ଆସନ ବୃଦ୍ଧି ପାଇବ ନାହିଁ ବୋଲି ସେ କହିଛନ୍ତି।

ଏହା ମୋର ବିଶ୍ଳେଷଣ ଏବଂ ରାଜନୈତିକ ବିଶ୍ଳେଷକମାନେ ମଧ୍ୟ କହୁଛନ୍ତି ଯେ ବିଜେପି ୨୨୦ରୁ୨୩୦ ରୁ ଅଧିକ ଆସନ ପାଇବ ନାହିଁ। ଜୁନ୍ ୪ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସରକାର ଗଠନ ହେଉନାହିଁ।

ଯେତେବେଳେ ଇଣ୍ଡିଆ ମେଣ୍ଟ ସରକାର ଗଠନ କରିବେ ସେତେବେଳେ ଦିଲ୍ଲୀକୁ ପୂର୍ଣ୍ଣ ରାଜ୍ୟ ମାନ୍ୟତା ପ୍ରଦାନ କରାଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି।

କେଜ୍ରିୱାଲଙ୍କ ମନ୍ତବ୍ୟକୁ ଜବାବ ଦେଇ ବିଜେପି ମୁଖପାତ୍ର ସୁଧାଶୁଂ ତ୍ରିବେଦୀ କହିଛନ୍ତି ଯେ, ଏଏପି ନେତା ତାଙ୍କ ଦଳ ବିଜେପିକୁ ଘୃଣା କରୁଥିଲେ ମଧ୍ୟ ତାଙ୍କ ଦଳକୁ ଏତେ ସଂଖ୍ୟକ ଆସନ ଦେଉଛନ୍ତି, ଏହାର ଅର୍ଥ ଶାସକ ଦଳ କେଜ୍ରିୱାଲଙ୍କ ଦ୍ବାରା ପୂର୍ବାନୁମାନ କରାଯାଇଥିବା ଆସନର ଦୁଇଗୁଣା ହାସଲ କରିପାରେ।