ଶରୀରରେ ଯେଉଁଠି...; ରାଣ୍ୟା ରାଓଙ୍କୁ ନେଇ ଅଶ୍ଲୀଳ ମନ୍ତବ୍ୟ ଦେଲେ ବିଜେପି ବିଧାୟକ

ବେଙ୍ଗାଲୁରୁ: ହାଇପ୍ରୋଫାଇଲ୍ ସୁନା ଚୋରାଚାଲାଣ ମାମଲାରେ ଗିରଫ ହୋଇଥିବା କନ୍ନଡ ଅଭିନେତ୍ରୀ ରାଣ୍ୟା ରାଓଙ୍କୁ ନେଇ ଅଶ୍ଳୀଳ ମନ୍ତବ୍ୟ ଦେଲେ କର୍ଣ୍ଣାଟକର ବିଜେପି ବିଧାୟକ ବାସନଗୌଡା ପାଟିଲ ଯତନାଲ । ଏହି ଘଟଣାକୁ ନେଇ ପ୍ରତିକ୍ରିୟା ଦେବା ବେଳେ ସେ ଏଭଳି କିଛି କହିଯାଇଥିଲେ, ଯାହା ତାଙ୍କୁ ଏବେ ଭାରୀ ପଡ଼ିଛି।

ସୁନା ଚୋରା ଚାଲାଣ ମାମଲାରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରି, ଗଣମାଧ୍ୟମ ସହିତ କଥାବାର୍ତ୍ତା ସମୟରେ ବିଜାପୁର ନଗର ବିଧାୟକ କହିଥିଲେ ଯେ, "ତାଙ୍କ ଶରୀର ସାରା ସୁନା ଥିଲା। ଯେଉଁଠାରେ ଗର୍ତ୍ତ ଥିଲା ସେଠାରେ ସେ ତାହାକୁ ଲୁଚାଇ ରଖୁଥିଲେ ଏବଂ ଚୋରା ଚାଲାଣ କରୁଥିଲେ"।

ପୂର୍ବତନ କେନ୍ଦ୍ରମନ୍ତ୍ରୀ ଯତନାଲ ଏହା ମଧ୍ୟ ଦାବି କରିଥିଲେ ଯେ, "ମୁଁ ବିଧାନସଭା ଅଧିବେଶନ ସମୟରେ ଏହି ମାମଲାରେ ଜଡିତ ସମସ୍ତ ମନ୍ତ୍ରୀଙ୍କ ନାମ କହିବି। ମୁଁ ରାଣ୍ୟାଙ୍କ ସମ୍ପର୍କ, ତାଙ୍କୁ ସୁରକ୍ଷା ପାଇବାରେ କିଏ ସାହାଯ୍ୟ କରିଥିଲା ​​ଏବଂ ସୁନା କିପରି ଅଣାଯାଇଥିଲା ସେ ବିଷୟରେ ସମ୍ପୂର୍ଣ୍ଣ ସୂଚନା ସଂଗ୍ରହ କରିଛି। ସେ ସୁନା କେଉଁଠି ଲୁଚାଇ ରଖିଥିଲେ ଏବଂ କିପରି ଚୋରା ଚାଲାଣ କରିଥିଲେ ସେ ବିଷୟରେ ମୁଁ ଅଧିବେଶନରେ ସବୁକିଛି ପ୍ରକାଶ କରିବି।"

ଉଲ୍ଲେଖଯୋଗ୍ୟ, କର୍ଣ୍ଣାଟକ ଡିଜିପି ରାମଚନ୍ଦ୍ର ରାଓଙ୍କ ସାବତ ଝିଅ ରାଣ୍ୟା ରାଓଙ୍କୁ ମାର୍ଚ୍ଚ ୩ତାରିଖରେ ଦୁବାଇରୁ ଫେରିବା ସମୟରେ ବେଙ୍ଗାଲୁରୁ ବିମାନବନ୍ଦରରେ ୧୨.୫୬କୋଟି ଟଙ୍କା ମୂଲ୍ୟର ୧୪.୨ କିଲୋଗ୍ରାମ ସୁନା ସହିତ ଗିରଫ କରାଯାଇଥିଲା। ପରବର୍ତ୍ତୀ ସମୟରେ ତାଙ୍କ ବାସଭବନରେ ଚଢାଉ କରାଯାଇ ୨.୦୬ କୋଟି ଟଙ୍କା ମୂଲ୍ୟର ସୁନା ଅଳଙ୍କାର ଏବଂ ୨.୬୭ କୋଟି ଟଙ୍କା ନଗଦ ଜବତ କରାଯାଇଥିଲା। ସେବେଠାରୁ ତାଙ୍କୁ ଗିରଫ କରାଯାଇଛି ଏବଂ ତାଙ୍କ ଜାମିନ ଆବେଦନ ଖାରଜ ହୋଇଯାଇଥିବାରୁ ସେ ଜେଲରେ ଅଛନ୍ତି।