ମୋଦୀଙ୍କ ଜନ୍ମଦିନ ପାଇଁ ୨୦ ଦିନ ଧରି ସେବା ସମର୍ପଣ ଅଭିଯାନ ଆରମ୍ଭ କରିବ ବିଜେପି, ମୋଦୀଙ୍କ ପାଖକୁ ଯିବ ୫ କୋଟି ପୋଷ୍ଟକାର୍ଡ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଜନ୍ମଦିନ ସେପ୍ଟେମ୍ବର ୧୭ରୁ ଭାରତୀୟ ଜନତା ପାର୍ଟି ୨୦ ଦିନ ଧରି ଏକ ସ୍ୱତନ୍ତ୍ର ଅଭିଯାନ ଚଳାଇବ | ସେବା ଓ ସମର୍ପଣ ଅଭିଯାନ ନାମରେ ନାମିତ ଏହି କାର୍ଯ୍ୟକ୍ରମ ସେପ୍ଟେମ୍ବର ୧୭ରୁ ଅକ୍ଟୋବର ୭ ଯାଏଁ ଚାଲିବ | ଉଲ୍ଲେଖନୀୟ କଥା ହେଉଛି, ମୋଦୀ ଅକ୍ଟୋବର ୭, ୨୦୦୧ରେ ଗୁଜରାଟର ମୁଖ୍ୟମନ୍ତ୍ରୀ ହୋଇଥିଲେ ଏବଂ ଚଳିତ ବର୍ଷ ୭ ଅକ୍ଟୋବରରେ ନିର୍ବାଚିତ ମୁଖ୍ୟ ଭାବରେ ୨୦ ବର୍ଷ ସମ୍ପୂର୍ଣ୍ଣ କରିବେ । ବିଜେପି ଅନୁଯାୟୀ, ବହୁତ କମ ନେତା ଅଛନ୍ତି ଯେଉଁମାନେ ଜନସେବାର ଏହି ସୁଯୋଗ ପାଇଛନ୍ତି। ଏହି ସେବା ଓ ସମର୍ପଣ ଅଭିଯାନ ପାଇଁ ବିଜେପି ଅନେକ କାର୍ଯ୍ୟକ୍ରମ କରିବାକୁ ନିଷ୍ପତ୍ତି ନେଇଛି। ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଆଜି ଏ ବାବଦରେ ସମସ୍ତ ରାଜ୍ୟର ବିଜେପି ମୁଖ୍ୟମାନଙ୍କୁ ଚିଠି ଲେଖି ଜଣାଇଛନ୍ତି | ୨୦ ଦିନିଆ ଅଭିଯାନର ଅଂଶ ଭାବରେ ବ୍ୟାପକ ସ୍ୱଚ୍ଛତା ଅଭିଯାନ ସାଙ୍ଗକୁ ରକ୍ତଦାନ ଭଳି କାର୍ଯ୍ୟକ୍ରମ ଆୟୋଜନ କରାଯିବ |

ସେହିପରି ପ୍ରଧାନମନ୍ତ୍ରୀଙ୍କୁ ଅଭିନନ୍ଦନ ଜଣାଇବା ପାଇଁ ସମଗ୍ର ଦେଶରୁ ବିଜେପି ପକ୍ଷରୁ ପାଞ୍ଚ କୋଟି ପୋଷ୍ଟ କାର୍ଡ ପଠାଯିବ। ବିଜେପିର ସମସ୍ତ ରାଜ୍ୟ ତଥା ଜିଲ୍ଲା କାର୍ଯ୍ୟାଳୟରେ ପ୍ରଧାନମନ୍ତ୍ରୀ ମୋଦୀଙ୍କ ବ୍ୟକ୍ତିତ୍ୱ ଏବଂ କାର୍ଯ୍ୟ ଉପରେ ଏକ ପ୍ରଦର୍ଶନୀ ଅନୁଷ୍ଠିତ ହେବ। ନମୋ ଆପରେ ଏକ ଭର୍ଚୁଆଲ୍ ପ୍ରଦର୍ଶନୀ ହେବ, ଯେଉଁଥିରେ ମୋଦୀଙ୍କ ବାବଦରେ କୁହାଯିବ | ଦିବ୍ୟାଙ୍କମାନଙ୍କୁ କୃତ୍ରିମ ଅଙ୍ଗ ଏବଂ ଯନ୍ତ୍ରପାତି ବଣ୍ଟନ ସହ ଜିଲ୍ଲା ମୁଖ୍ୟାଳୟରେ ସ୍ୱାସ୍ଥ୍ୟ ଶିବିର ଆୟୋଜନ କରାଯିବ। ବସ୍ତି, ଅନାଥ ଆଶ୍ରମ, ଡାକ୍ତରଖାନା ଏବଂ ବୃଦ୍ଧାଶ୍ରମରେ ଫଳ ବଣ୍ଟନ କରିବାକୁ କୁହାଯାଇଛି। ଅକ୍ଟୋବର ୨ରେ ଗାନ୍ଧୀ ଜୟନ୍ତୀ ଉପରେ ସ୍ୱଚ୍ଛତା କାର୍ଯ୍ୟକ୍ରମ ଏବଂ ଖଦିର ବ୍ୟବହାରକୁ ପ୍ରୋତ୍ସାହନ ପାଇଁ କାର୍ଯ୍ୟକ୍ରମ କରାଯିବ |

ମୋଦୀଙ୍କ ଶାସନର ୨୦ ବର୍ଷ ମଧ୍ୟରେ ଆସିଥିବା ପରିବର୍ତ୍ତନକୁ ଜଣାଇବା ପାଇଁ ସେମିନାର ଏବଂ ଆଲୋଚନାଚକ୍ର ଆୟୋଜନ କରିବାକୁ ନିର୍ଦ୍ଦେଶ ଦିଆଯାଇଛି। ମୋଦୀଙ୍କ ୭୧ତମ ଜନ୍ମଦିନରେ ରାଜ୍ୟମାନଙ୍କରେ ଥିବା ପ୍ରମୁଖ ନଦୀଗୁଡ଼ିକର ୭୧ ଟି ସ୍ଥାନ ଏବଂ ଉତ୍ତରପ୍ରଦେଶର ଗଙ୍ଗା ନଦୀର ୭୧ଟି ସ୍ଥାନରେ ସ୍ୱଚ୍ଛତା ଅଭିଯାନ କରିବାକୁ କୁହାଯାଇଛି। ଏଥିରେ ଅଂଶଗ୍ରହଣ କରିବାକୁ ଦଳ ପକ୍ଷରୁ ସମସ୍ତ ସାଂସଦ, ବିଧାୟକ ତଥା ଅନ୍ୟାନ୍ୟ ଜନ ପ୍ରତିନିଧିଙ୍କୁ ନିର୍ଦ୍ଦେଶ ଦିଆଯାଇଛି। ଦଳର ରାଷ୍ଟ୍ରୀୟ ସାଧାରଣ ସମ୍ପାଦକ କୈଳାସ ବିଜୟଭର୍ଗିୟ, ଡି ପୁରନ୍ଦେଶ୍ୱରୀ, ବିନୋଦ ସୋନକର ଏବଂ ରାଷ୍ଟ୍ରୀୟ କିସାନ ମୋର୍ଚ୍ଚାର ସଭାପତି ରାଜକୁମାର ଚହରଙ୍କୁ ବିଶେଷ ଦାୟିତ୍ୱ ଦିଆଯାଇଛି |