ଦଳ ବଦଳ ଆଇନ ବିଲ୍ ଆଗତ: ସଦସ୍ୟତା ଯିବା ସହିତ ବିଧାୟକ ପେନସନ୍ ପାଇବେ ନାହିଁ

ଶିମଲା: ହିମାଚଳ ପ୍ରଦେଶ ସରକାର ଏକ ଦଳ ବଦଳ ବିଲ୍ ଆଣିଛନ୍ତି ଯାହା ବିଧାୟକଙ୍କୁ  ଏକ ବଡ଼ ଝଟକା ଦେବ। ଏହି ବିଲ୍ ମାଧ୍ୟମରେ ହିମାଚଳ ପ୍ରଦେଶର କଂଗ୍ରେସ ସରକାର ସେହି ବିଧାୟକଙ୍କ ପେନସନ୍‌ ବନ୍ଦ କରିବାକୁ ପ୍ରସ୍ତୁତି ଚଳାଇଛନ୍ତି। ଏହି ବିଲ୍ ପାରିତ ହେବା ମାତ୍ରେ ସରକାର ଏଭଳି ଦଳ ବଦଳ କରୁଥିବା ବିଧାୟକଙ୍କ ପେନସନ୍ ବନ୍ଦ କରିବେ।

ଦଳ ବଦଳ ନେଇ ବିଧାନସଭାରେ ଅଯୋଗ୍ୟ ହୋଇଥିବା ସଦସ୍ୟଙ୍କ ପେନସନ୍‌କୁ ବନ୍ଦ କରିବାକୁ ପ୍ରସ୍ତାବ ଦେଇଥିବା ଏକ ବିଲ୍‌ ମଙ୍ଗଳବାର ହିମାଚଳ ପ୍ରଦେଶ ବିଧାନସଭାରେ ଆଗତ ହୋଇଛି। ହିମାଚଳ ପ୍ରଦେଶ ବିଧାନସଭା ସଦସ୍ୟଙ୍କ ଭତ୍ତା ଏବଂ ପେନସନ୍ ସଂଶୋଧନ ବିଲ୍ ୨୦୨୪ ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁଙ୍କ ଦ୍ବାରା ଆଗତ ହୋଇଛି।

ବିଲ୍ ଅନୁଯାୟୀ, ଯଦି କୌଣସି ବ୍ୟକ୍ତି ସମ୍ବିଧାନର ଦଶମ ସୂଚୀ ଆଣ୍ଟି-ଡିଫେକ୍ସନ୍ ଆଇନ ଅନୁଯାୟୀ ଯେକୌଣସି ସମୟରେ ଅଯୋଗ୍ୟ ଘୋଷିତ ହୁଅନ୍ତି, ତେବେ ସେ ଅଧିନିୟମ ଅନୁଯାୟୀ ପେନନନ୍ ପାଇବାକୁ ହକଦାର ହେବେ ନାହିଁ। ଏହା ସହିତ ତାଙ୍କର ସଦସ୍ୟତା ମଧ୍ୟ ରଦ୍ଦ ହେବ।

ବଜେଟ୍ ୨୦୨୪-୨୫ ପାରିତ ହେଉଥିବାବେଳେ ଗୃହରେ ଅନୁପସ୍ଥିତ ରହି ପାର୍ଟି ହ୍ବିପ୍କୁ ଅବମାନନା କରିଥିବାରୁ ଚଳିତ ବର୍ଷ ଫେବୃଆରୀରେ ୬ ଜଣ କଂଗ୍ରେସ ବିଧାୟକ ଦଳ ବଦଳ ଆଇନ ଅନୁସାରେ ଅଯୋଗ୍ୟ ଘୋଷିତ ହୋଇଥିଲେ। ସେମାନଙ୍କ ମଧ୍ୟରେ ସୁଧୀର ଶର୍ମା, ରବି ଠାକୁର, ରାଜେନ୍ଦ୍ର ରାଣା, ଇନ୍ଦ୍ର ଦତ୍ତ ଲାଖାନପାଲ, ଚୈତନ୍ୟ ଶର୍ମା ଏବଂ ଦେବେନ୍ଦ୍ର କୁମାର ଥିଲେ।

ଅଧିକ ପଢ଼ନ୍ତୁ:ଏଫଆରସିଭି ହେବ ଭବିଷ୍ୟରେ ଭାରତର ଲଢୁଆ ଟ୍ୟାଙ୍କ୍

ପରେ ସୁଧୀର ଶର୍ମା ଏବଂ ଲଖନପାଲ ଉପ-ନିର୍ବାଚନରେ ​​ଜିତି ଗୃହକୁ ଫେରିଥିଲେ କିନ୍ତୁ ଅନ୍ୟ ଚାରିଜଣ ତାହା କରିପାରି ନ ଥିଲେ। ଚଳିତ ବର୍ଷ ଫେବୃଆରୀ ୨୭ରେ ଅନୁଷ୍ଠିତ ହୋଇଥିବା  ରାଜ୍ୟସଭା ନିର୍ବାଚନରେ ​​ଏହି  ୬ଜଣ କଂଗ୍ରେସ ବିଧାୟକ ବିଜେପି ପ୍ରାର୍ଥୀ ହର୍ଷ ମହାଜନଙ୍କ ସପକ୍ଷରେ ମତଦାନ କରିଥିଲେ। ତେବେ ଏହା ପରେ ରାଜ୍ୟର କଂଗ୍ରେସ ସରକାର ଦଳ ବଦଳ ଆଇନ ଆଣିବାକୁ ଚିନ୍ତା କରିଥିଲେ।

ଅଧିକ ପଢ଼ନ୍ତୁ:ନୀତୀଶ-ତେଜସ୍ବୀ ଭେଟକୁ ନେଇ ବଢିଲା କଳ୍ପନାଜଳ୍ପନା