ଆସାମରେ ଭାଙ୍ଗିଯିବ କି ବିଶ୍ୱଶର୍ମାଙ୍କ ସରକାର!

ଗୌହାଟୀ: ଆସାମର ବିଶ୍ୱଶର୍ମାଙ୍କ ସରକାରକୁ ନେଇ ଏକ ବଡ ଦାବି କରିଛନ୍ତି କଂଗ୍ରେସ ସାଂସଦ ପ୍ରଦ୍ୟୁତ ବୋର୍ଡୋଲାଇ | ଆସାମର ଅନେକ ବିଜେପି ବିଧାୟକଙ୍କ ସହ ସେ ଯୋଗାଯୋଗରେ ଅଛନ୍ତି ବୋଲି କହିଛନ୍ତି | ବୋର୍ଡୋଲାଇ କହିଛନ୍ତି ଯେ ଦଳରେ ଯୋଗଦେବା ନେଇ ଅନେକ ବିଜେପି ବିଧାୟକ ତାଙ୍କ ସହ ଏବଂ ଅନ୍ୟ ବରିଷ୍ଠ ନେତାଙ୍କ ନିକଟକୁ ଯାଇଛନ୍ତି। ଏନେଇ ଆଗାମୀ ନିଷ୍ପତ୍ତି ବୈଠକରେ ନିଆଯିବ। ଏହି ବୈଠକ ଜୁଲାଇ ୧୫ ରୁ ୧୭ ମଧ୍ୟରେ ହୋଇପାରେ ବୋଲି କୁହାଯାଉଛି | ପ୍ରଦ୍ୟୁତ ବୋର୍ଡୋଲୋଇ କହିଛନ୍ତି ଯେ ସେହି ବିଜେପି ନେତାମାନଙ୍କୁ ଦଳରେ ସାମିଲ କରାଯିବ ନାହିଁ, ଯେଉଁମାନେ ପୂର୍ବରୁ କଂଗ୍ରେସ ବିରୋଧରେ ଅଶାଳୀନ ଭାଷା ବ୍ୟବହାର କରିଥିଲେ। ସେ କହିଛନ୍ତି ଆସାମର ବିଜେପି ମଧ୍ୟରେ ସବୁକିଛି ଠିକ ଚାଲିନାହିଁ | ଶାସକ ଦଳ ଯେଭଳି ଦେଖାଇବାକୁ ଚେଷ୍ଟା କରୁଛି, ସେମିତି ସ୍ଥିତି ନାହିଁ ବୋଲି ସେ କହିଛନ୍ତି |

ବିଜେପିର ଆଭ୍ୟନ୍ତରୀଣ ପରିସ୍ଥିତି ସେତେଟା ଭଲ ନୁହେଁ ବୋଲି ସେ ଦାବି କରିଛନ୍ତି। ବୋର୍ଡୋଲାଇ କହିଛନ୍ତି ଯେ ପୁରୁଣା ଏବଂ ନୂତନ ବିଜେପି ସଦସ୍ୟଙ୍କ ମଧ୍ୟରେ ଲଗାତାର ବିବାଦ ଲାଗି ରହିଛି। ଦଳର ବହୁ ପୁରୁଣା ବ୍ୟକ୍ତି ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମାଙ୍କ ସମର୍ଥକଙ୍କ ପ୍ରଭାବ ଏବଂ କାର୍ଯ୍ୟଶୈଳୀକୁ ପସନ୍ଦ କରୁନାହାନ୍ତି । ଗତ କିଛି ମାସ ମଧ୍ୟରେ କଳ୍ପନାଜଳ୍ପନା ଚାଲିଛି ଯେ ବିଜେପିର ପୂର୍ବତନ କେନ୍ଦ୍ର ମନ୍ତ୍ରୀ, ଅନେକ ବିଧାୟକ ଏବଂ କିଛି ପୂର୍ବତନ ବିଧାୟକ ସେମାନଙ୍କ ସହସ୍ର ସମର୍ଥକଙ୍କ ସହ କଂଗ୍ରେସରେ ଯୋଗ ଦେଇପାରନ୍ତି। ତେବେ ବିଜେପି ନେତାମାନେ ଏହି ରିପୋର୍ଟକୁ ଗୁଜବ ବୋଲି କହିଛନ୍ତି ଏବଂ ଶାସକ ଦଳର କେହି କଂଗ୍ରେସରେ ଯୋଗଦେବେ ନାହିଁ ବୋଲି ଦାବି କରିଛନ୍ତି। ପ୍ରଦ୍ୟୁତ ବୋର୍ଡୋଲାଇ କହିଛନ୍ତି ଯେ ଅନେକ ବିଧାୟକ ଆମ ଦଳ ସହ ଯୋଗାଯୋଗ କରିଛନ୍ତି ଏବଂ କିଛି ଲୋକ ମୋ ସହ ଯୋଗାଯୋଗ କରିଛନ୍ତି। ସେମାନେ କଂଗ୍ରେସରେ ଯୋଗଦେବାକୁ ଚାହୁଁଛନ୍ତି। ଆମ ଦଳ ଚୂଡ଼ାନ୍ତ ନିଷ୍ପତ୍ତି ନେବ ଏବଂ ବର୍ତ୍ତମାନ ଆଲୋଚନା ଚାଲିଛି।