କଂଗ୍ରେସର ମିଶନ ଦିଲ୍ଲୀ: ନ୍ୟାୟ ଯାତ୍ରା ଆରମ୍ଭ କରିବେ ରାହୁଲ

ନୂଆଦିଲ୍ଲୀ: ଜମ୍ମୁ-କଶ୍ମୀର ଏବଂ ହରିୟାଣା ପରେ ରାହୁଲ ଗାନ୍ଧୀ ଏବେ ଦିଲ୍ଲୀ ବିଧାନସଭା ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଛନ୍ତି। ଅକ୍ଟୋବର ୨୩ ରୁ ସେ ଦିଲ୍ଲୀରେ କଂଗ୍ରେସର  ‘ନ୍ୟାୟ ଯାତ୍ରା’ ଆରମ୍ଭ କରିବେ। ଏହି ଯାତ୍ରାରେ ପ୍ରିୟଙ୍କା ଗାନ୍ଧୀ ଭଦ୍ରା ଏବଂ ମଲ୍ଲିକାର୍ଜୁନ ଖଡ୍‌ଗେ ମଧ୍ୟ ଅଂଶଗ୍ରହଣ କରିବେ। ଦିଲ୍ଲୀର ପାର୍ବଣକୁ ଧ୍ୟାନରେ ରଖି ଏହି ଯାତ୍ରା ଚାରିଟି ପର୍ଯ୍ୟାୟରେ ଅନୁଷ୍ଠିତ ହେବ।

ସୂଚନାନୁସାରେ, କଂଗ୍ରେସ ଦଳ ତିନିଥର ଜିତିଥିବା ବିଜେପି ସାଂସଦଙ୍କ ବିଫଳତାକୁ ଏହି ଯାତ୍ରା ସମୟରେ ନିର୍ବାଚନୀ ପ୍ରସଙ୍ଗ କରିବ। ଏହା ବ୍ୟତୀତ କେନ୍ଦ୍ରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସରକାର, ଉପରାଜ୍ୟପାଳ (ଏଲଜି) ଏବଂ ଆପ୍ ସରକାରଙ୍କ ବି‌ରୋଧରେ କଂଗ୍ରେସ ମଧ୍ୟ ପ୍ରସଙ୍ଗ ଉଠାଇବ।

ଏହା ସହିତ ଶୀଲା ଦୀକ୍ଷିତଙ୍କ ସମୟକୁ ମନେ ପକାଇବ। ଏହା ବ୍ୟତୀତ ଆମ୍ ଆଦମୀ ପାର୍ଟି (ଆପ୍) ଏବଂ କେଜ୍ରିୱାଲ ସରକାରଙ୍କ ଉପରେ ମଦ ନୀତି, ଦୁର୍ନୀତି ଏବଂ ବିକାଶ ବିରୋଧୀ ଅଭିଯୋଗ ମଧ୍ୟ ଜୋରଦାର ଉଠାଯିବ।  ହାତ ଝୁମୁକା ସରକାର ବୋଲି କହି ଆପ୍  ସରକାର ଆକ୍ରମଣ କରାଯିବ। ପଞ୍ଜାବ ଏବଂ ହରିୟାଣା ପରେ ଏବେ  ଦିଲ୍ଲୀରେ ଆପ୍ ସହିତକୌଣସି ମେଣ୍ଟ ହେବ ନାହିଁ ବୋଲି କଂଗ୍ରେସ ନିଷ୍ପତ୍ତି ନେଇଛି।

କଂଗ୍ରେସ ପକ୍ଷରୁ ଦିଲ୍ଲୀରେ ଆପ୍ ସରକାରଙ୍କ ବିରୋଧରେ ପ୍ରାୟ ଏକ ଡଜନ ପ୍ରଦର୍ଶନୀ ଏବଂ କେସ୍ ଷ୍ଟଡି ଉପସ୍ଥାପନ କରିବ, ଯାହା ଦ୍ବାରା ଜନସାଧାରଣଙ୍କୁ ଏହି ବିଷୟରେ ଅବଗତ କରାଯାଇପାରିବ। ତେବେ ଦଳ ସ୍ପଷ୍ଟ କରିଛି ଯେ କେନ୍ଦ୍ରରେ କେଜ୍ରିୱାଲଙ୍କ ଆପ୍ ସହିତ କଂଗ୍ରେସ ଇଣ୍ଡିଆ ମେଣ୍ଟର ଅଂଶ ରହିବ।

ଆସନ୍ତା ବର୍ଷ ଫେବୃଆରୀ ୨୦୨୫ ରେ ବିଧାନସଭାର କାର୍ଯ୍ୟକାଳ ଶେଷ  ହେଉଥିବାରୁ ଆସନ୍ତା ବର୍ଷ ଦିଲ୍ଲୀରେ ବିଧାନସଭା ନିର୍ବାଚନ ଅନୁଷ୍ଠିତ ହେବ। ତେବେ ଆବଶ୍ୟକ ପଡିଲେ ମଧ୍ୟ ନିର୍ବାଚନ ଆୟୋଗଙ୍କର ଅଧିକାର  ଅନୁସାରେ ଧାର୍ଯ୍ୟ ସମୟ ପୂର୍ବରୁ  ନିର୍ବାଚନ କରାଯାଇ ପାରିବ ବୋଲି ଚର୍ଚ୍ଚା ହେଉଛି।

 ଯେତେବେଳେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ  ପଦରୁ ଇସ୍ତଫା ଦେଇଥିଲେ, ସେତେବେଳେ ସେ ନଭେମ୍ବରରେ ମହାରାଷ୍ଟ୍ର ଏବଂ ଝାଡଖଣ୍ଡର ବିଧାନସଭା ନିର୍ବାଚନ ସହିତ ଦିଲ୍ଲୀରେ ନିର୍ବାଚନ ଦାବି କରିଥିଲେ।