ଖାମେନିଙ୍କୁ କ୍ଷମତାଚ୍ୟୁତ କରିବା ପାଇଁ ଷଡ଼ଯନ୍ତ୍ର!: ୫୦ ହଜାରରୁ ଅଧିକ ଅଧିକାରୀ ଏକଜୁଟ

ତେହେରାନ: ଇରାନର ବର୍ତ୍ତମାନର ଇସଲାମିକ ସରକାର ବିରୁଦ୍ଧରେ ଏକ ବଡ଼ ଷଡ଼ଯନ୍ତ୍ରର ପର୍ଦ୍ଦାଫାସ ହୋଇଛି। ଦାବି କରାଯାଉଛି ଯେ, ଇରାନ ସରକାରଙ୍କୁ କ୍ଷମତାଚ୍ୟୁତ କରିବା ପାଇଁ ଏକ  ସଂଗଠିତ ଏବଂ ଆଭ୍ୟନ୍ତରୀଣ ଯୋଜନା ପ୍ରସ୍ତୁତ କରାଯାଉଛି। ଏହାର କେନ୍ଦ୍ରରେ ଅଛନ୍ତି ରେଜା ପହଲାଭି। ସେ ଇରାନର ଶେଷ ଶାହ ମହମ୍ମଦ ରେଜା ପହଲାଭିଙ୍କ ପୁଅ ଏବଂ ଗତ ୪୬ବର୍ଷ ଧରି ନିର୍ବାସନରେ ରହୁଛନ୍ତି।

ରାଜା ପହଲାଭି ଦାବି କରିଛନ୍ତି ଯେ ଇରାନର କ୍ଷମତା ଏବଂ ସେନା ଭିତରୁ ୫୦ ହଜାରରୁ ଅଧିକ ଅଧିକାରୀ ଏକ ଗୁପ୍ତ ମଞ୍ଚରେ ସାମିଲ ହୋଇଛନ୍ତି। ସେମାନଙ୍କର ଲକ୍ଷ୍ୟ ହେଉଛି ଇରାନର ସର୍ବୋଚ୍ଚ ନେତା ଅଲି ଖାମେନିଙ୍କ ସରକାରଙ୍କୁ କ୍ଷମତାଚ୍ୟୁତ କରିବା ଏବଂ ଦେଶକୁ ଗଣତନ୍ତ୍ର ଆଡ଼କୁ ନେବା।

ରେଜା ପହଲାଭି ଏକ ସାକ୍ଷାତକାରରେ କହିଛନ୍ତି ଯେ, ସେ ଇରାନୀ ଅଧିକାରୀ ଏବଂ ସେନା ସଦସ୍ୟଙ୍କୁ ସଂଯୋଗ କରିବା ପାଇଁ ଏକ ସୁରକ୍ଷିତ ଡିଜିଟାଲ୍ ନେଟୱାର୍କ ଆରମ୍ଭ କରିଛନ୍ତି। ଯେଉଁଥିରେ ଏପର୍ଯ୍ୟନ୍ତ ହଜାର ହଜାର ଲୋକ ଯୋଗ ଦେଇଛନ୍ତି। ସେ କହିଛନ୍ତି, ପ୍ରତି ସପ୍ତାହରେ ନୂଆ ନାମ ଯୋଡ଼ା ହେଉଛି ଏବଂ ଏହି ତଥ୍ୟ ବିଶ୍ଳେଷଣ କରି ସେମାନଙ୍କର ବିଶ୍ୱସନୀୟତା ନିର୍ଣ୍ଣୟ କରାଯାଉଛି। ଏହି ଅଭିଯାନର ପରବର୍ତ୍ତୀ ପର୍ଯ୍ୟାୟ ହେଉଛି ସାଧାରଣ ନାଗରିକଙ୍କୁ ସଂଯୋଗ କରିବା। ଏଥିପାଇଁ ଏକ ପୃଥକ ୱେବସାଇଟ୍ ଆରମ୍ଭ କରାଯାଉଛି।

ଅଧିକ ପଢ଼ନ୍ତୁ: ନିଜ ବିଫଳତାକୁ ସ୍ବୀକାର କଲେ ରାହୁଲ୍‌: ବଡ଼ପଣ ଦେଖାଇ କହିଲେ, ଏଇଟା ମୋର ଭୁଲ୍‌

ଶନିବାର ଦିନ ମ୍ୟୁନିଚ୍‌ରେ ଏକ ଗୁରୁତ୍ୱପୂର୍ଣ୍ଣ ସମ୍ମିଳନୀ ଅନୁଷ୍ଠିତ ହେବାକୁ ଯାଉଛି, ଯେଉଁଠାରେ ସାରା ବିଶ୍ୱରୁ ଇରାନ ବିରୋଧୀ ନେତା, କଳାକାର, ସମାଜସେବୀ ଏବଂ କ୍ରୀଡାବିତ୍ ଏକାଠି ହେବେ। ଦାବି କରାଯାଉଛି ଯେ, ଏହା ୧୯୭୯ ବିପ୍ଳବ ପରେ ଇରାନ ବିରୋଧୀ ସବୁଠାରୁ ବଡ଼ ସମ୍ମିଳନୀ ହେବ। ଏହାକୁ ଜାତୀୟ ସହଯୋଗ ସମ୍ମିଳନୀ ନାମ ଦିଆଯାଇଛି। ରେଜା ପହଲାଭି କହିଛନ୍ତି, ଏହି ସମ୍ମିଳନୀ ତିନୋଟି ମୌଳିକ ନୀତି ଉପରେ ଆଧାରିତ। ସେଗୁଡ଼ିକ ହେଉଛି, ଇରାନର କ୍ଷେତ୍ରୀୟ ଅଖଣ୍ଡତାର ସୁରକ୍ଷା,ପ୍ରତ୍ୟେକ ନାଗରିକଙ୍କ ସ୍ୱାଧୀନତା ଏବଂ ସମାନତାର ଗ୍ୟାରେଣ୍ଟି, ଏବଂ ଧର୍ମ ତଥା କ୍ଷମତାର ପୃଥକୀକରଣ।

ରେଜା ପହଲାଭି କ୍ଷମତା ପରିବର୍ତ୍ତନ ପରେ ଦେଶକୁ ନେତୃତ୍ୱ ନେବାକୁ ନିଜକୁ ପ୍ରସ୍ତୁତ ବୋଲି ଭାବୁଛନ୍ତି। ସମାଲୋଚକମାନେ କହିଛନ୍ତି ଯେ, ସେ ବିରୋଧୀ ଗୋଷ୍ଠୀଗୁଡ଼ିକୁ ଏକତ୍ର କରିବା ପାଇଁ ଯଥେଷ୍ଟ ପ୍ରୟାସ କରି ନାହାନ୍ତି। ତାଙ୍କର ବିରୋଧୀମାନେ ଏହା ମଧ୍ୟ କହିଛନ୍ତି, ରାଜପରିବାରରୁ ଆସିଥିବା ଜଣେ ବ୍ୟକ୍ତି ଗଣତନ୍ତ୍ର ପାଇଁ ପ୍ରତିବନ୍ଧକ ହୋଇପାରନ୍ତି। ମ୍ୟୁନିଚ୍ ସମ୍ମିଳନୀକୁ ରେଜାଙ୍କର ଏହି ପ୍ରତିଛବିକୁ ଉନ୍ନତ କରିବାର ଏକ ପ୍ରୟାସ ଭାବରେ ଦେଖାଯାଉଛି ବୋଲି ଦେଶର ରାଜନୈତିକ ମହଲରେ ଚର୍ଚ୍ଚା ହେଉଛି।

ଅଧିକ ପଢ଼ନ୍ତୁ:https://sambad.in/latest/mayabati-target-rahul-gandhi-9537794

 iran | Ayatollah Ali Khamenei