ମନ୍ଦିର ପ୍ରବେଶକୁ ନେଇ ଉତ୍ତେଜନା: ଦେବାଦେବୀଙ୍କ ମୂର୍ତ୍ତି ବାହାରେ ରଖିଲେ ଅସନ୍ତୁଷ୍ଟ

ବେଙ୍ଗାଲୁରୁ: କର୍ଣ୍ଣାଟକର ମାଣ୍ଡୱାରେ ଦଳିତମାନେ ବହୁ ପୁରାତନ କାଳଭୈରବେଶ୍ୱର ସ୍ବାମୀ ମନ୍ଦିରରେ ପ୍ରବେଶ କରିଛନ୍ତି। ସେମାନଙ୍କ ଦର୍ଶନ କରିବା ନେଇ ଅସନ୍ତୁଷ୍ଟ ଗ୍ରାମବାସୀ ଦେବାଦେବୀଙ୍କ ମୂର୍ତ୍ତିଗୁଡ଼ିକୁ ମନ୍ଦିରରୁ ଆଣି ବାହାରେ ରଖିଥିଲେ। ଏହି ମୂର୍ତ୍ତିଗୁଡ଼ିକ ପର୍ବ ସମୟରେ ଗାଁର ପରିକ୍ରମା ସମୟରେ ବ୍ୟବହୃତ ହୋଇଥାଏ।

ଏହି ଘଟଣା ମାଣ୍ଡୱା ଜିଲ୍ଲାର ହନକେରେ ଗ୍ରାମରେ ଘଟିଛି। ଏହା ପରେ ଗାଁର ପ୍ରଶାସନ ଏବଂ ପୁଲିସ ଅଧିକାରୀ ଗ୍ରାମବାସୀଙ୍କ ସହ ଏକ ବୈଠକ କରିଥିଲେ। ଦଳିତଙ୍କ ପାଇଁ ବନ୍ଦୋବସ୍ତ ବିଭାଗ ଦ୍ୱାରା ମନ୍ଦିରରେ ପ୍ରବେଶ ପାଇଁ ଅନୁମତି ପ୍ରଦାନ କରାଯାଇଥିଲା।

ଗ୍ରାମବାସୀ କହିଛନ୍ତି ଯେ ଏହି ମନ୍ଦିର ହଜାରେରୁ ଅଧିକ ବର୍ଷ ପୁରୁଣା। ନିକଟରେ ଏହାକୁ ପୂର୍ବତନ କଂଗ୍ରେସ ବିଧାୟକ ଏମ୍ ଶ୍ରୀନିବାସ ନବୀକରଣ କରିଥିଲେ। କେତେକ ଗ୍ରାମବାସୀ ପରମ୍ପରାକୁ ଦର୍ଶାଇ ଦଳିତଙ୍କ ମନ୍ଦିରରେ ପ୍ରବେଶକୁ ବିରୋଧ କରିଥିଲେ।

ସେମାନେ କହିଛନ୍ତି ଯେ ଗାଁରେ ଦଳିତମାନଙ୍କ ପାଇଁ ଏକ ଅଲଗା ମନ୍ଦିର ନିର୍ମାଣ କରାଯାଇଛି, କିନ୍ତୁ ଦଳିତମାନେ ମୁଖ୍ୟ ମନ୍ଦିରରେ ପ୍ରବେଶ କରିଥିବାରୁ ଗ୍ରାମବାସୀ ଅସନ୍ତୁଷ୍ଟ ହୋଇ ମୂର୍ତ୍ତିଗୁଡ଼ିକୁ ମନ୍ଦିରରୁ ବାହାର କରି ଏକ ଅଲଗା କୋଠରୀରେ ରଖିଥିଲେ।

ଅଧିକ ପଢ଼ନ୍ତୁ: ସିରିଆରେ ଇସ୍ରାଏଲର ଏୟାର ଷ୍ଟ୍ରାଇକ୍: ଜଣେ ଶିଶୁଙ୍କ ସମେତ ୭ ମୃତ, ୨୦ ଆହତ

ଅଧିକାରୀଙ୍କ ମନାଇବା ପରେ ଗ୍ରାମବାସୀ ରାଜି ହୋଇ ମନ୍ଦିରର କବାଟ ଖୋଲିଥିଲେ ଏବଂ ସମସ୍ତ ରୀତିନୀତି ହୋଇଥିଲା। ସମସ୍ତ ଜାତିର ଶ୍ରଦ୍ଧାଳୁମାନଙ୍କୁ ମନ୍ଦିର ଭିତରକୁ ଯିବାକୁ ଅନୁମତି ଦିଆଯାଇଥିଲା। ବର୍ତ୍ତମାନ ଗାଁରେ ଉତ୍ତେଜନା ଦେଖାଦେଇଥିବା ବେଳେ ପୁଲିସ କର୍ମଚାରୀଙ୍କୁ ନିୟୋଜିତ କରାଯାଇଛି। ମାମଲା ଶାନ୍ତିପୂର୍ଣ୍ଣ ଭାବେ ସମାଧାନ ହୋଇଛି ବୋଲି ତହସିଲଦାର  କହିଛନ୍ତି।

ସୂଚନାଯୋଗ୍ୟ,ଏହାପୂର୍ବରୁ ୨୦୨୨ ମସିହାରେ କର୍ଣ୍ଣାଟକର ଏକ ମେଳାରେ ଜଣେ ଦଳିତ ଶିଶୁ ଗ୍ରାମଦେବତାଙ୍କ ପ୍ରତିମାକୁ ଛୁଇଁଥିଲେ। ଏହା ପରେ ଅସନ୍ତୁଷ୍ଟ ଗ୍ରାମବାସୀ ଦଳିତ ପରିବାର ଉପରେ ୬୦ ହଜାର ଟଙ୍କା ଜରିମାନା ଲାଗୁ କରିଥିଲେ। ଏହି ଘଟଣା କୋଲାର ଜିଲ୍ଲାର ଉଲରହଲ୍ଲୀ ଗ୍ରାମରେ ଘଟିଥିଲା। ଦଳିତ ସମ୍ପ୍ରଦାୟର ୮-୧୦ ପରିବାର ଭୋକାଲିଙ୍ଗା ସମ୍ପ୍ରଦାୟ ଦ୍ୱାରା ପରିଚାଳିତ ଉଲରହଲ୍ଲି ଗ୍ରାମରେ ରୁହନ୍ତି।

ଅଧିକ ପଢ଼ନ୍ତୁ: ସାଉଦିରେ ଆରବ ଏବଂ ମୁସଲମାନ ଦେଶଙ୍କ ବୈଠକ: ଗାଜା-ଲେବାନନ୍ ଯୁଦ୍ଧ ନେଇ ଆଲୋଚନା