କୋଭିଡ୍‌ ମହାମାରୀ ଏପର୍ଯ୍ୟନ୍ତ ଶେଷ ହୋଇନାହିଁ, ସତର୍କ ରୁହନ୍ତୁ: କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମାଣ୍ଡବ୍ୟ

ନୂଆଦିଲ୍ଲୀ: ଦେଶର କେତେକ ରାଜ୍ୟରେ କୋଭିଡ୍‌-୧୯ ମାମଲାରେ ବୃଦ୍ଧି ଘଟିଥିବା ବେଳେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡବ୍ୟ ସୋମବାର କହିଛନ୍ତି ଯେ ମହାମାରୀ ଏପର୍ଯ୍ୟନ୍ତ ଶେଷ ହୋଇନାହିଁ ଏବଂ ଏଥିପାଇଁ ସଜାଗ ରହିବା ଏବଂ କୋଭିଡ-ଉପଯୁକ୍ତ ଆଚରଣ ଉପରେ ଗୁରୁତ୍ୱାରୋପ କରିବାର ଆବଶ୍ୟକତା ରହିଛି।
ମନ୍ତ୍ରୀ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳଗୁଡ଼ିକୁ ନିରୀକ୍ଷଣ ଜାରି ରଖିବାକୁ ଏବଂ ଦେଶରେ ନୂତନ ଭାରିଆଣ୍ଟ ଚିହ୍ନଟ ପାଇଁ ଜିନୋମ୍‌ ସିକ୍ୱେନ୍‌ସିଂ ଉପରେ ଧ୍ୟାନ ଦେବାକୁ ନିବେଦନ କରିଛନ୍ତି।

Image Courtesy: News Nation

ସ୍ୱାସ୍ଥ୍ୟ ମନ୍ତ୍ରାଳୟ ଏକ ବିବୃତିରେ କହିଛି ଯେ ‘ହର ଘର ଦସ୍ତକ ୨.୦’ ଅଭିଯାନ ଅଧୀନରେ ଟିକାକରଣ ଅଗ୍ରଗତିର ସମୀକ୍ଷା ପାଇଁ ମନ୍ତ୍ରୀ ଭିଡିଓ କନଫରେନ୍‌ସ ମାଧ୍ୟମରେ ସ୍ୱାସ୍ଥ୍ୟ ମନ୍ତ୍ରୀ ଏବଂ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳର ବରିଷ୍ଠ ଅଧିକାରୀଙ୍କ ସହ ଏକ ବୈଠକ କରିଥିଲେ। କେତେକ ଜିଲ୍ଲା ଏବଂ ରାଜ୍ୟରେ ବର୍ଦ୍ଧିତ ମାମଲା ସକାରାତ୍ମକତା ହାର ଏବଂ କୋଭିଡ-୧୯ ପରୀକ୍ଷଣ ହ୍ରାସ ଉପରେ ଆଲୋକପାତ କରି ମାଣ୍ଡଭ୍ୟ କହିଛନ୍ତି ଯେ ଠିକ୍‌ ସମୟରେ ପରୀକ୍ଷଣ ମାମଲାଗୁଡ଼ିକର ଶୀଘ୍ର ଚିହ୍ନଟ କରିବାରେ ସକ୍ଷମ ହେବ ଏବଂ ସଂକ୍ରମଣ ବିସ୍ତାରକୁ ରୋକିବାରେ ସାହାଯ୍ୟ କରିବ। ରାଜ୍ୟଗୁଡ଼ିକୁ କୋଭିଡ-୧୯ ପାଇଁ ସଂଶୋଧିତ ସର୍ଭେଲାନ୍‌ସ ରଣନୀତି ପାଇଁ କାର୍ଯ୍ୟକ୍ଷମ ନିର୍ଦ୍ଦେଶାବଳୀ କାର୍ଯ୍ୟକାରୀ କରିବା ଉପରେ ଧ୍ୟାନ ଦେବାକୁ ମଧ୍ୟ ଅନୁରୋଧ କରାଯାଇଥିଲା। ଅସୁରକ୍ଷିତ ବୟସ ଗୋଷ୍ଠୀ ମଧ୍ୟରେ କୋଭିଡ-୧୯ ଟିକାକରଣ ଉପରେ ଗୁରୁତ୍ୱାରୋପ କରି ସେ ରାଜ୍ୟ ସ୍ୱାସ୍ଥ୍ୟ ମନ୍ତ୍ରୀମାନଙ୍କୁ ଜୁନ୍‌ ୧ରେ ଆରମ୍ଭ ହୋଇଥିବା ସ୍ୱତନ୍ତ୍ର ମାସବ୍ୟାପୀ ଅଭିଯାନର ସ୍ଥିତି ଏବଂ ଅଗ୍ରଗତି ବ୍ୟକ୍ତିଗତ ଭାବେ ସମୀକ୍ଷା କରିବାକୁ ଅନୁରୋଧ କରିଥିଲେ।

କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମାଣ୍ଡଭ୍ୟ କହିଛନ୍ତି, ଆସନ୍ତୁ ପ୍ରଥମ ଏବଂ ଦ୍ୱିତୀୟ ଡୋଜ୍‌ ପାଇଁ ୧୨-୧୭ ବର୍ଷ ବୟସ ଗୋଷ୍ଠୀର ସମସ୍ତ ହିତାଧିକାରୀଙ୍କୁ ଚିହ୍ନଟ କରିବା ପାଇଁ ଆମର ପ୍ରୟାସକୁ ତ୍ୱରାନ୍ଵିତ କରିବା। ଏଥିସହ ୬୦ ବର୍ଷରୁ ଅଧିକ ବୟସର ଜନସଂଖ୍ୟା ଗୋଷ୍ଠୀ ଏକ ଅସୁରକ୍ଷିତ ବର୍ଗ ଏବଂ ସତର୍କତା ଡୋଜ୍‌ ସହିତ ସୁରକ୍ଷିତ ରହିବା ଆବଶ୍ୟକ। ସେ କହିଛନ୍ତି, ଆମର ସ୍ୱାସ୍ଥ୍ୟସେବା କର୍ମଚାରୀମାନେ ଅସୁରକ୍ଷିତ ଜନସଂଖ୍ୟାକୁ ସତର୍କତା ଡୋଜ୍‌ ଦେବା ସୁନିଶ୍ଚିତ କରିବା ପାଇଁ ଘର ଘର ବୁଲି ଯାଉଛନ୍ତି। ରାଜ୍ୟଗୁଡ଼ିକର ସ୍ୱାସ୍ଥ୍ୟ ମନ୍ତ୍ରୀମାନଙ୍କୁ ନିୟମିତ ଭାବେ ଘରୋଇ ଡାକ୍ତରଖାନା ସହିତ ୧୮-୫୯ ବର୍ଷ ବୟସ ଗୋଷ୍ଠୀକୁ ସତର୍କତା ଡୋଜ୍‌ ପ୍ରଦାନ ନେଇ ସମୀକ୍ଷା କରିବାକୁ ଅନୁରୋଧ କରାଯାଇଥିଲା ବୋଲି ବିବୃତ୍ତିରେ କୁହାଯାଇଛି।