ବର୍ଷକ ମଧ୍ୟରେ ୧୭୫ ଆତଙ୍କବାଦୀଙ୍କୁ ନିପାତ କଲାଣି ସିଆରପିଏଫ

ନୂଆଦିଲ୍ଲୀ: ଗତ କିଛି ଦଶନ୍ଧି ଧରି ଜମ୍ମୁକଶ୍ମୀରରେ ଆତଙ୍କବାଦ ସମସ୍ୟା ଜାରି ରହିଛି। ଆଉ ସ୍ଥାନୀୟ ପୁଲିସ ସହ ସେନା ଓ ସିଆରପିଏଫ ପକ୍ଷରୁ ଆତଙ୍କବାଦୀଙ୍କ ବିରୋଧରେ ନିରନ୍ତର ଅପରେସନ ଚାଲିଛି। ବହୁ ସଂଖ୍ୟକ ଆତଙ୍କବାଦୀଙ୍କୁ ନିପାତ କରାଯିବା ସହ ସେମାନଙ୍କ ଯୋଜନାକୁ ବିଫଳ କରି ଗିରଫ ମଧ୍ୟ କରାଯାଉଛି। ଗତ ପ୍ରାୟ ଏକ ବର୍ଷ ମଧ୍ୟରେ ଜମ୍ମୁକଶ୍ମୀରରେ ସିଆରପିଏଫ ଯବାନମାନେ ୧୭୫ ଜଣ ଆତଙ୍କବାଦୀଙ୍କୁ ନିପାତ କରିଥିବାବେଳେ ୧୮୩ ଜଣ ଆତଙ୍କବାଦୀଙ୍କୁ ଗିରଫ କରାଯାଇଛି |

ଏଥି ସହିତ, ସିଆରପିଏଫ ପକ୍ଷରୁ ବିଭିନ୍ନ ରାଜ୍ୟରେ ନକ୍ସଲମାନଙ୍କ ବିରୁଦ୍ଧରେ ଚାଲିଥିବା ଅଭିଯାନକୁ ଜୋରଦାର କରାଯାଇଛି | ଗତ ଏକ ବର୍ଷ ମଧ୍ୟରେ ସିଆରପିଏଫ ପକ୍ଷରୁ ୧୯ ଜଣ ନକ୍ସଲଙ୍କୁ ନିପାତ କରାଯାଇଛି | ସିଆରପିଏଫ ଡିଜି କୁଲଦୀପ ସିଂ କହିଛନ୍ତି ଯେ ମାର୍ଚ୍ଚ ୧, ୨୦୨୧ ରୁ ୧୬ ମାର୍ଚ୍ଚ ୨୦୨୨ ପର୍ଯ୍ୟନ୍ତ ଜମ୍ମୁକଶ୍ମୀରରେ ୧୭୫ ଆତଙ୍କବାଦୀ ନିହତ ହୋଇଥିବାବେଳେ ୧୮୩ ଜଣ ଆତଙ୍କବାଦୀଙ୍କୁ ଗିରଫ କରିବାରେ ସିଆରପିଏଫ ସଫଳ ହୋଇଛି ।

ସେହିପରି ନକ୍ସଲ ପ୍ରଭାବିତ ରାଜ୍ୟଗୁଡିକରେ ବିଭିନ୍ନ ଅପରେସନ୍ ମାଧ୍ୟମରେ ୧୯ ଜଣ ନକ୍ସଲଙ୍କୁ ନିପାତ କରାଯାଇଛି | ସେଣ୍ଟ୍ରାଲ ରିଜର୍ଭ ପୁଲିସ ଫୋର୍ସର ମହାନିର୍ଦ୍ଦେଶକ କୁଲଦୀପ ସିଂ କହିଛନ୍ତି ଯେ ବିଭିନ୍ନ ବର୍ଗର ୧୧୭ ଜଣଙ୍କୁ ସିଆରପିଏଫ ସୁରକ୍ଷା ଯୋଗାଉଥିବାବେଳେ ଏଥିରେ ୩୨ଜଣ ମହିଳା କର୍ମଚାରୀଙ୍କୁ ଅନ୍ତର୍ଭୁକ୍ତ କରାଯାଇଛି |