ରାମଦେବଙ୍କ ମନ୍ତବ୍ୟକୁ ନେଇ ଭର୍ତ୍ସନା କଲେ ଦିଲ୍ଲୀ ହାଇକୋର୍ଟ

ନୂଆଦିଲ୍ଲୀ: ଦିଲ୍ଲୀ ହାଇକୋର୍ଟ ଯୋଗଗୁରୁ ବାବା ରାମଦେବଙ୍କୁ ହମଦର୍ଦ କମ୍ପାନି ଏବଂ ଏହାର ଲୋକପ୍ରିୟ ଉତ୍ପାଦ ରୁହ ଅଫଜା ବିରୋଧରେ ଆପତ୍ତିଜନକ ମନ୍ତବ୍ୟ ପାଇଁ ଭର୍ତ୍ସନା କରିଛନ୍ତି। 

କୋର୍ଟ କହିଛନ୍ତି, ‘ଯୋଗଗୁରୁ ବାବା ରାମଦେବଙ୍କ ଏଭଳି ମନ୍ତବ୍ୟର କୌଣସି କ୍ଷମା ନାହିଁ। ଏହା କୋର୍ଟର ବିବେକକୁ ବାଧା ଦେଇଛି।’ 

ବାବା ରାମଦେବ ନିକଟରେ ଦାବି କରିଥିଲେ ଯେ ’ହମଦର୍ଦ କମ୍ପାନି ତାର ବ୍ୟବସାୟରୁ ଯାହା ଲାଭ କରୁଛି ତାହାକୁ ମସଜିଦ ଏବଂ ମଦ୍ରାସା ନିର୍ମାଣ ପାଇଁ ବ୍ୟବହାର କରୁଛି।’

ରାମଦେବଙ୍କ ଏଭଳି ମନ୍ତବ୍ୟକୁ ମାନହାନିଜନକ କହି ହମଦର୍ଦ ଦିଲ୍ଲୀ ହାଇକୋର୍ଟରେ ଏକ ପିଟିସନ ଦାୟର କରିଥିଲେ।

ଏହି ମାମଲାରେ ହମଦର୍ଦ ପକ୍ଷରୁ ବରିଷ୍ଠ ଓକିଲ ମୁକୁଲ ରୋହତଗୀ ଦିଲ୍ଲୀ ହାଇକୋର୍ଟଙ୍କୁ କହିଥିଲେ, ରାମଦେବଙ୍କ ମନ୍ତବ୍ୟ ଘୃଣାପୂର୍ଣ୍ଣ ଭାଷଣ ସହିତ ସମାନ। ଏଭଳି ମନ୍ତବ୍ୟ ମାଧ୍ୟମରେ ରାମଦେବ ଧର୍ମ ଆଧାରରେ ହମଦର୍ଦ ଉପରେ ଆକ୍ରମଣ କରିଛନ୍ତି । ଏଥିସହିତ ଏହାକୁ ‘ଶରବତ ଜିହାଦ’ର ନାମ ଦେଇଛନ୍ତି। 

କିଛିଦିନ ତଳେ ବାବା ରାମଦେବ କହିଥିଲେ, ‘ ଯଦି ସରବତ ପିଅ, ତେବେ ମଦ୍ରାସା ଏବଂ ମସଜିଦ ତିଆରି ହେବ। କିନ୍ତୁ ଯଦି ତୁମେ ପତଞ୍ଜଳିର ଗୋଲାପ ସିରପ ପିଅ, ତେବେ ଗୁରୁକୂଳ ତିଆରି ହେବ, ଆଚାର୍ଯ୍ୟ କୁଳମ ବିକଶିତ ହେବ, ପତଞ୍ଜଳି ବିଶ୍ୱବିଦ୍ୟାଳୟ ବିସ୍ତାର ହେବ ଏବଂ ଭାରତୀୟ ଶିକ୍ଷା ବୋର୍ଡର ପ୍ରଗତି ହେବ।’