ମହାରାଷ୍ଟ୍ରରେ ଗଣତନ୍ତ୍ରକୁ ବୁଲ୍‌ଡୋଜରରେ ଧ୍ବଂସ କରାଯାଉଛି: ମମତା ବାନାର୍ଜୀ

କୋଲକାତା : ମହାରାଷ୍ଟ୍ରରେ ଚାଲିଥିବା ରାଜନୈତିକ ସଙ୍କଟକୁ ଦୃଷ୍ଟିରେ ରଖି ସେଠାରେ ଗଣତନ୍ତ୍ରକୁ ବୁଲ୍‌ଡୋଜର ଚଢ଼ାଇ ଧ୍ବଂସ କରାଯାଉଛି ବୋଲି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି। ଭାରତରେ କୌଣସି ଗଣତନ୍ତ୍ର କାମ କରେ ବୋଲି ସନ୍ଦେହ ହେଉଛି। ଯଦି ସେମାନେ ଏକ ଗଣତାନ୍ତ୍ରିକ ସରକାରକୁ ବୁଲ୍‌ଡୋଜର ଚଢ଼ାଇ ଧ୍ବଂସ କରନ୍ତି, ସେଠାରେ ଗଣତନ୍ତ୍ର ରହିଲା କେଉଁଠି? ଆମେ ଜନସାଧାରଣଙ୍କ ପାଇଁ, ଉଦ୍ଧବ ଠାକରେଙ୍କ ପାଇଁ ନ୍ୟାୟ ଚାହୁଁଛୁ। ମହାରାଷ୍ଟ୍ର ପରେ ସେମାନେ ଅନ୍ୟ ସରକାରକୁ ଟାର୍ଗେଟ୍‌ କରିପାରନ୍ତି ବୋଲି ମମତା କହିଛନ୍ତି।

ମମତା ଦାବି କରିଛନ୍ତି, ବିଧାୟକ କିଣିବା ପାଇଁ ହାୱାଲା ଟଙ୍କା ବ୍ୟବହାର କରାଯାଇଛି। ମହାରାଷ୍ଟ୍ରରେ ଯାହା ଘଟୁଛି ତାହା ଆଶ୍ଚର୍ଯ୍ୟଜନକ ବୋଲି ସେ କହିଛନ୍ତି। ଆଗାମୀ ରାଷ୍ଟ୍ରପତି ନିର୍ବାଚନରେ ​​ଜିତିବା ପାଇଁ ସେମାନେ ‘ହାୱାଲା ଟଙ୍କା’ ବ୍ୟବହାର କରି ମହାରାଷ୍ଟ୍ର ସରକାରଙ୍କୁ ଅନୈତିକ ଓ ବେଆଇନ ଢଙ୍ଗରେ ଧ୍ୱଂସ କରିବାକୁ ଚେଷ୍ଟା କରୁଛନ୍ତି।