ଦୀର୍ଘ ଦିନ ପରେ ନାତି ପ୍ରଜ୍ବଳଙ୍କ ମାମଲାରେ ନିରବତା ଭାଙ୍ଗିଲେ ପୂର୍ବତନ ପ୍ରଧାନମନ୍ତ୍ରୀ ଏଚ୍‌ଡି ଦେବେଗୌଡ଼ା

ବେଙ୍ଗାଲୁରୁ: ବହୁଦିନ ପ‌ରେ ଶେଷରେ ନିଜ ନାତି ପ୍ରଜ୍ବଳ ରେବାନ୍ନାଙ୍କ ଅସଦାଚରଣ ଓ ଦୁଷ୍କର୍ମ ମାମଲା ପ୍ରସଂଗରେ ମୁହଁ ଖୋଲିଛନ୍ତି ଭାରତର ପୂର୍ବତନ ପ୍ରଧାନମନ୍ତ୍ରୀ ଏଚ୍‌ଡି ଦେବେଗୌଡ଼ା। ୯୨ ବର୍ଷ ବୟସରେ ନାତି ତଥା ସାଂସଦ ପ୍ରଜ୍ବଳ ରେବାନ୍ନା ବିରୋଧରେ ଆସିଥିବା ଯୌନ ଶୋଷଣ ଅଭିଯୋଗ ଉପରେ ନିରବତା ଭାଙ୍ଗିଛନ୍ତି।

ଦୋଷୀ ସାବ୍ୟସ୍ତ ହେଲେ ପ୍ରଜ୍ବଳଙ୍କ ବିରୋଧରେ ଯଦି କାର୍ଯ୍ୟାନୁଷ୍ଠାନ ନିଆଯାଏ ତେବେ ତାଙ୍କର ଆପତ୍ତି ନାହିଁ ବୋଲି ସେ ପ୍ରକାଶ କରିଛନ୍ତି। ତେବେ ଯୌନ ଉତ୍ପୀଡ଼ନ ତଥା ଜଣେ ମହିଳାଙ୍କୁ ଅପହରଣ ଅଭିଯୋଗର ସମ୍ମୁଖୀନ ହୋଇଥିବା ତାଙ୍କ ପୁଅ ଜେଡି (ଏସ) ବିଧାୟକ ଏଚଡି ରେଭାନ୍ନାଙ୍କ ବିରୋଧରେ ମଧ୍ୟ ମାମଲା ରୁଜୁ ହୋଇଛି। ସେ ଏହି ମାମଲାରେ ଅଧିକ ମନ୍ତବ୍ୟ ଦେବାକୁ ବାରଣ କରିଛନ୍ତି।
ନିକଟରେ ଦେବେଗୌଡ଼ା ତାଙ୍କ ଜନ୍ମଦିନ ପାଳନ ନକରିବାକୁ ନିଷ୍ପତ୍ତି ଘୋଷଣା କରିଥିଲେ। ସେ ଆହୁରି ବି କହିଛନ୍ତି କି ‘‘ରେବାନ୍ନାଙ୍କ ବିଷୟରେ କୋର୍ଟରେ ଚାଲିଥିବା ଘଟଣାଗୁଡ଼ିକ ଉପରେ ମୁଁ କୌଣସି ମନ୍ତବ୍ୟ ଦେବାକୁ ଚାହେଁ ନାହିଁ।’’

ସାମ୍ବାଦିକମାନଙ୍କୁ ସମ୍ବୋଧିତ କରି ପୂର୍ବତନ ପ୍ରଧାନମନ୍ତ୍ରୀ କହିଛନ୍ତି, "ଏହି ଯୌନ ଶୋଷଣ ମାମଲାରେ ଅନେକ ଲୋକ ସଂପୃକ୍ତ ଅଛନ୍ତି। ମୁଁ କାହାର ନାମ ଉଲ୍ଲେଖ କରିବାକୁ ଚାହୁଁନାହିଁ। ଏହି ମାମଲାରେ ଜଡ଼ିତ ବ୍ୟକ୍ତିମାନେ କାର୍ଯ୍ୟାନୁଷ୍ଠାନର ସମ୍ମୁଖୀନ ହେବା ଉଚିତ୍ ଏବଂ ପୀଡ଼ିତା ମହିଳାମାନେ ନ୍ୟାୟ ସହ କ୍ଷତିପୂରଣ ପାଇବା ଉଚିତ୍।’’

୩୩ ବର୍ଷୀୟ ପ୍ରଜ୍ବଳଙ୍କ ନାମରେ ଏକାଧିକ ଯୌନ ଶୋଷଣ ଅଭିଯୋଗ ରହିଛି। ଖବର ଅନୁଯାୟୀ ପ୍ରଜୱାଲ ୨୭ ଏପ୍ରିଲରେ ଜର୍ମାନୀ ଯାଇଥିଲେ। ତାଙ୍କୁ ଫେରାଇ ଆଣିବା ପାଇଁ ତାଙ୍କ ବିରୋଧରେ ଏକ ଇଣ୍ଟରପୋଲ ବ୍ଲୁ କର୍ଣ୍ଣର ନୋଟିସ ଜାରି କରାଯାଇଛି।