୧୨ ଟି ଦେଶର ନାଗରିକଙ୍କ ଆମେରିକା ଗସ୍ତ ଉପରେ ପ୍ରତିବନ୍ଧକ ଲଗାଇଲେ ଟ୍ରମ୍ପ୍‌

ନୂଆଦିଲ୍ଳୀ: ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆମେରିକା ସୀମାକୁ ସୁଦୃଢ଼ କରିବାରେ ଲାଗି ପଡ଼ିଛନ୍ତି । ସେ କିଛି ଦେଶକୁ ଆମେରିକା ପ୍ରବେଶ କରିବାକୁ ଅନୁମତି ଦେବାକୁ ଚାହୁନାହାନ୍ତି  । ଟ୍ରମ୍ପ ୧୨ ଟି ଦେଶର ନାଗରିକଙ୍କ ଆମେରିକା ଗସ୍ତ ଉପରେ ପ୍ରତିବନ୍ଧକ ଲଗାଇଛନ୍ତି ଏବଂ ଏହି ପ୍ରତିବନ୍ଧକ ସୋମବାର ଠାରୁ ଲାଗୁ ହୋଇଛି ।

ଏହି ଆଦେଶ ପତ୍ରରେ ଟ୍ରମ୍ପ ଗତ ସପ୍ତାହରେ ଦସ୍ତଖତ କରିଛନ୍ତି । ଏହି ତାଲିକାରେ ଆଫଗାନିସ୍ତାନ, ମିଆଁମାର, ଚାଡ୍, କଙ୍ଗୋ-ବ୍ରାଜାଭିଲ୍, ଇକ୍ୱେଟୋରିଆଲ୍ ଗିନି, ଏରିଟ୍ରିଆ, ହାଇତି, ଇରାନ, ଲିବିୟା, ସୋମାଲିଆ, ସୁଦାନ ଏବଂ ୟେମେନର ନାଗରିକମାନଙ୍କୁ ଆମେରିକା ପ୍ରବେଶରୁ ନିଷେଧ କରାଯାଇଛି । ଏହି ଲିଷ୍ଟରେ ଥିବା ଅନେକ ଦେଶ ଆମେରିକା ସହିତ ପ୍ରତିକୂଳ ସମ୍ପର୍କରେ ଅଛନ୍ତି , ଯେପରିକି ଇରାନ ଏବଂ ଆଫଗାନିସ୍ତାନ । କିନ୍ତୁ ଅନ୍ୟ ଦେଶମାନେ , ଯେପରିକି ହାଇତି ଏବଂ ଲିବିୟା ଭଳି ଦେଶ ଗମ୍ଭୀର ସଙ୍କଟର ସମ୍ମୁଖୀନ ହୋଇପାରନ୍ତି ।

ଏହି ପଦକ୍ଷେପ ଶରଣାର୍ଥୀ ପଥକୁ ବାଧାପ୍ରାପ୍ତ କରିବ । ପୁନଃନିର୍ବାଚିତ ହେବା ପରଠାରୁ ଟ୍ରମ୍ପ ଅବୈଧ ପ୍ରବାସୀମାନଙ୍କ ଉପରେ ତାଙ୍କର କଠୋର କାର୍ଯ୍ୟାନୁଷ୍ଠାନକୁ ବୃଦ୍ଧି କରିଛନ୍ତି । କାନାଡା ଏବଂ ମେକ୍ସିକୋ ସହିତ ଆମେରିକା ୨୦୨୬ ଫୁଟବଲ୍ ବିଶ୍ୱକପ୍ ଆୟୋଜନ କରିବାକୁ ଯାଉଛି । ତେଣୁ ଏହି ପ୍ରତିବନ୍ଧକ ୨୦୨୬ ଫୁଟବଲ୍ ବିଶ୍ୱକପ୍ କିମ୍ବା ୨୦୨୮ ଲସ୍ ଆଞ୍ଜେଲସ୍ ଅଲିମ୍ପିକ୍ସରେ ଅଂଶଗ୍ରହଣ କରୁଥିବା ଖେଳାଳିମାନଙ୍କ ଉପରେ ପ୍ରଯୁଜ୍ୟ ହେବ ନାହିଁ । ଏହା ବ୍ୟତିତ ଏହି ପ୍ରତିବନ୍ଧକ ଉକ୍ତ ଦେଶଗୁଡ଼ିକର କୂଟନୀତିଜ୍ଞଙ୍କ ଉପରେ ପ୍ରଯୁଜ୍ୟ ହେବ ନାହିଁ।

ଜାତିସଂଘ ମାନବାଧିକାର ହାଇକମିସନର ଭୋଲକର ତୁର୍କ ଚେତାବନୀ ଦେଇଛନ୍ତି ଯେ "ନୂତନ ଯାତ୍ରା ପ୍ରତିବନ୍ଧକର ଏହି ନିଷ୍ପତ୍ତି ଅନ୍ତର୍ଜାତୀୟ ଆଇନ ଦୃଷ୍ଟିକୋଣରୁ ଚିନ୍ତା ସୃଷ୍ଟି କରେ ।" ଆମେରିକାର ଆଇନ ପ୍ରଣେତା ଏବଂ ନିର୍ବାଚିତ ଅଧିକାରୀମାନେ ମଧ୍ୟ ଏହି ପ୍ରତିବନ୍ଧକକୁ କଠୋର ଏବଂ ଅସାମ୍ବିଧାନିକ ବୋଲି କହିଛନ୍ତି ।