ଏପ୍ରିଲ ପହିଲାରୁ ମହଙ୍ଗା ହେବ ୯୦୦ରୁ ଅଧିକ ଔଷଧ

ନୂଆଦିଲ୍ଲୀ : ଯଦି ଆପଣ ରକ୍ତଚାପ, ମଧୁମେହ, ହୃଦରୋଗ, ସଂକ୍ରମଣ ଭଳି ରୋଗର ଚିକିତ୍ସାରେ ବ୍ୟବହୃତ ଜରୁରୀ ଔଷଧ ଖାଆନ୍ତି, ତେବେ ଏହି ଖବର ଆପଣଙ୍କ ପାଇଁ। ଯେଉଁ ଔଷଧ ପାଇଁ ଆପଣ ୩୧ ମାର୍ଚ୍ଚ ପର୍ଯ୍ୟନ୍ତ କମ୍ ଟଙ୍କା ଦେଉଥିଲେ, ସେଗୁଡ଼ିକ ପାଇଁ ଆପଣଙ୍କୁ ଆଜି ରାତି ୧୨ଟାରୁ, ଅର୍ଥାତ୍ ୧ ଏପ୍ରିଲ ୨୦୨୫ ଠାରୁ ଅଧିକ ଟଙ୍କା ବ୍ୟୟ କରିବାକୁ ପଡିବ। କାରଣ ଏସବୁ ଔଷଧର ଦରବୃଦ୍ଧି ପାଇଁ ସରକାର ନିଷ୍ପତ୍ତି ନେଇଛନ୍ତି ।  ଏହି ନିଷ୍ପତ୍ତି ଯୋଗୁଁ ୯୦୦ ରୁ ଅଧିକ ଅତ୍ୟାବଶ୍ୟକ ଔଷଧର ମୂଲ୍ୟ ୧.୭୪ ପ୍ରତିଶତ ବୃଦ୍ଧି ପାଇବାକୁ ଯାଉଛି।

ସରକାରଙ୍କ ଜାତୀୟ ଔଷଧ ମୂଲ୍ୟ ନିର୍ଦ୍ଧାରଣ ପ୍ରାଧିକରଣ (ଏନପିପିଏ) ପ୍ରତିବର୍ଷ ହୋଲସେଲ ମୂଲ୍ୟ ସୂଚକାଙ୍କ (ଡବ୍ଲୁପିଆଇ) ଆଧାରରେ ଅତ୍ୟାବଶ୍ୟକ ଔଷଧର ମୂଲ୍ୟ ନିର୍ଦ୍ଧାରଣ କରିଥାଏ। ୨୦୨୪ ପାଇଁ ଡବ୍ଲୁପିଆଇରେ ୧.୭୪ ପ୍ରତିଶତ ବୃଦ୍ଧି ପଞ୍ଜୀକୃତ ହୋଇଛି, ଯାହା କମ୍ପାନୀଗୁଡ଼ିକୁ ସରକାରଙ୍କ ଅନୁମୋଦନ ବିନା ମୂଲ୍ୟ ବୃଦ୍ଧି କରିବାକୁ ଅନୁମତି ଦେଇଛି। ଏନପିପିଏ ଅନୁଯାୟୀ, "୨୦୨୪ କ୍ୟାଲେଣ୍ଡର ବର୍ଷରେ ଡବ୍ଲୁପିଆଇ ୧.୭୪ ପ୍ରତିଶତ ବୃଦ୍ଧି ପାଇଛି, ତେଣୁ କମ୍ପାନୀଗୁଡ଼ିକ ସମାନ ହାରରେ ଔଷଧର ଖୁଚୁରା ମୂଲ୍ୟ ବୃଦ୍ଧି କରିପାରିବେ।"