ତୃତୀୟ ବିଶ୍ୱଯୁଦ୍ଧର ପଦଧ୍ବନୀ: ପୁଟିନଙ୍କୁ ଶକ୍ତି ପ୍ରଦର୍ଶନ କଲା ନାଟୋ

ମସ୍କୋ: ରୁଷିଆ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ମଧ୍ୟରେ ଆମେରିକାର ୨ଟି ବି-୫୨ ଷ୍ଟ୍ରାଟୋଫୋର୍ଟ୍ରେସ୍ ବୋମାବର୍ଷଣକାରୀ ଯୁଦ୍ଧ ବିମାନ ରୁଷିଆର ଆକାଶ ସୀମା ନିକଟରେ ଏକ ପ୍ରଦର୍ଶନ କରିଛନ୍ତି। ରୁଷିଆ ବିରୋଧରେ ନାଟୋର ଆଭିମୁଖ୍ୟରେ ଏହା ଗୁରୁତ୍ବପୂର୍ଣ୍ଣ ବୋଲି କୁହାଯାଉଛି।  ନାଟୋ ମୁଖ୍ୟ ଚେତାବନୀ ଦେଇ କହିଛନ୍ତି ଯେ ପୁଟିନଙ୍କ ସହ ୟୁରୋପର ସମ୍ପୂର୍ଣ୍ଣ ଯୁଦ୍ଧ ପାଇଁ ୟୁରୋପ ପ୍ରସ୍ତୁତ ରହିବା ଆବଶ୍ୟକ। ଗତ ସପ୍ତାହରେ ପୁଟିନଙ୍କୁ ସମର୍ଥନ କରିବା ପାଇଁ ଉତ୍ତର କୋରିଆ ହଜାର ହଜାର ସୈନ୍ୟ ରୁଷିଆକୁ ପଠାଇଛି। ଗତ ସପ୍ତାହରେ, ୟୁକ୍ରେନ ଏହାର ପ୍ରଥମ ଦୂରଗାମୀ କ୍ଷେପଣାସ୍ତ୍ର ଉତ୍‌କ୍ଷେପଣ କରିଥିଲା।

ଯୁଦ୍ଧ ଅନ୍ୟ ଦେଶର ସୀମାକୁ ବ୍ୟାପିପାରେ ବୋଲି ଏକ ଭୟ ରହିଛି। ଏହା ସହିତ ନିଜକୁ ରକ୍ଷା କରିବା ପାଇଁ ସତର୍କତାମୂଳକ ପଦକ୍ଷେପ ଗ୍ରହଣ କରିବାକୁ ଜର୍ମାନୀ ହେଉଛି ସର୍ବଶେଷ ଦେଶ। ସୋମବାର, ଆମେରିକାର ଦୁଇ ବାୟୁସେନା ବି-୫୨ ବୋମାବର୍ଷଣକାରୀ  ଉତ୍ତର ୟୁରୋପରେ ପ୍ରବେଶ କରିବା ପୂର୍ବରୁ ଉତ୍ତର ସାଗର ଉପରେ ଉତ୍ତର-ପୂର୍ବ ଆଡକୁ ଯାଇଥିଲେ। ରାଡାର ତଥ୍ୟ ଅନୁଯାୟୀ, ବିମାନ ୨ଟି ବ୍ରିଟେନର ଆରଏଫ୍ ଫେୟାରଫୋର୍ଡରୁ ଓହ୍ଲାଇ ବଲଟିକ୍ ସାଗର ଉପରେ ଉଡ଼ି ରୁଷିଆର କାଲିନଗ୍ରାଡ୍ ନିକଟରେ ପହଞ୍ଚିଥିଲେ।

ଦି ସନ୍ ରିପୋର୍ଟ ଅନୁଯାୟୀ, ଜଣେ ସାମରିକ ବିଶ୍ଳେଷକ କହିଛନ୍ତି, 'ବି-୫୨ ମିଶନ ହେଉଛି ଏକ ପ୍ରତ୍ୟକ୍ଷ ବାର୍ତ୍ତା। ଏହା ଦର୍ଶାଉଛି ଯେ ନାଟୋ ନିଜ ଅଞ୍ଚଳକୁ ରକ୍ଷା କରିବା ପାଇଁ ଯେକୌଣସି ସ୍ଥିତିର ମୁକାବିଲା କରିବାକୁ ପ୍ରସ୍ତୁତ ଏବଂ ସକ୍ଷମ ଅଟେ।

ଶୀତଳ ଯୁଦ୍ଧ ପରଠାରୁ ବି-୫୨ ଷ୍ଟ୍ରାଟୋଫୋର୍ଟ୍ରେସ୍ ଆମେରିକାର ବାୟୁସେନାର ଶକ୍ତିର ପ୍ରତୀକ ହୋଇ ରହିଛି। ଏହା ଏକ ଦୀର୍ଘ ଦୂରଗାମୀ ବୋମାବର୍ଷଣକାରୀ। ଯାହା ବିଭିନ୍ନ ମାରାତ୍ମକ ଅସ୍ତ୍ରଶସ୍ତ୍ର ବହନ କରିବାକୁ ସକ୍ଷମ। ଏହାର ସହନଶୀଳତା ଏବଂ ଅନୁକୂଳତା ଏହାକୁ ଆମେରିକାରେ ଏବଂ ଏହାର ପ୍ରତିରକ୍ଷା ରଣନୀତିରେ ଗୁରୁତ୍ୱପୂର୍ଣ୍ଣ କରିଛି।

ଅଧିକ ପଢ଼ନ୍ତୁ: ପାକିସ୍ତାନରେ ଗୃହଯୁଦ୍ଧ ସ୍ଥିତି: ସେନା-ଇମ୍ରାନଙ୍କ ସମର୍ଥକ ମୁହାଁମୁହିଁ

କାଲିନିଗ୍ରାଡ୍ ରୁଷିଆର ସାମରିକ କ୍ଷେତ୍ର ମଧ୍ୟରୁ ଅନ୍ୟତମ। ଏହା ୟୁରୋପର ପୋଲାଣ୍ଡ ଏବଂ ଲିଥୁଆନିଆର ସୀମାବର୍ତ୍ତୀ। ଏହାର ଗୋଟିଏ ପାର୍ଶ୍ୱରେ ବଲଟିକ୍ ସାଗର ଅଛି। ଏହାର ନିକଟତର ଉଡ଼ାଣ ହେଉଛି ଏକ ପ୍ରତ୍ୟକ୍ଷ ସୂଚକ ଯେ ରୁଷିଆର ଆକ୍ରୋଶକୁ ପ୍ରତିହତ କରିବାକୁ ନାଟୋ ପ୍ରସ୍ତୁତ ଅଛି। ସୋମବାର ବ୍ରୁସେଲ୍ସରେ ଭାଷଣ ଦେଇ ନାଟୋର ଜଣେ ବରିଷ୍ଠ ଅଧିକାରୀ ବ୍ୟବସାୟୀମାନଙ୍କୁ ଯୁଦ୍ଧକାଳୀନ ମାନସିକତା ଗ୍ରହଣ କରିବାକୁ, ଉତ୍ପାଦନ ଏବଂ ଯୋଗାଣ ଶୃଙ୍ଖଳାକୁ ରୁଷିଆ ଏବଂ ଚୀନ୍‌ର ଆକ୍ରମଣାତ୍ମକ ନୀତି ଦ୍ବାରା ସୃଷ୍ଟି ହୋଇଥିବା ଦୁର୍ବଳତାକୁ ହ୍ରାସ କରିବାକୁ ଅନୁରୋଧ କରିଛନ୍ତି।

ନାଟୋ ରୁଷିଆ ରାଷ୍ଟ୍ରପ୍ରତି ଭ୍ଲାଡିମିର ପୁଟିନଙ୍କୁ ଶକ୍ତି ପ୍ରଦର୍ଶନ କରିବା ଦ୍ବାରା ତୃତୀୟ ବିଶ୍ବଯୁଦ୍ଧର ପଦଧ୍ବନୀ ଶୁଣାଯିବା ଆରମ୍ଭ କରିଛି। ରୁଷିଆ ଏବଂ ୟୁକ୍ରେନ ମଧ୍ୟରେ ଜାରି ରହିଥିବା ବିବାଦ ଯୋଗୁ ତୃତୀୟ ବିଶ୍ବଯୁଦ୍ଧ ଘନେଇଥିବା ବିଶେଷଜ୍ଞ ମତପୋଷଣ କରିଛନ୍ତି।

ଅଧିକ ପଢ଼ନ୍ତୁ: ସଂସ୍କୃତ-ମୈଥିଲି ଭାଷାରେ ସମ୍ବିଧାନ: ରାଷ୍ଟ୍ରପତି-ପ୍ରଧାନମନ୍ତ୍ରୀ କଲେ ଉନ୍ମୋଚନ