ରୋହତକ : ଅଟୋରେ ପ୍ରଚଣ୍ଡ ବିସ୍ଫୋରଣ, ୮ ଆହତ

ରୋହତକ: ହରିୟାଣାର ରୋହତକରେ ବେପରୁଆ ବାଣ ଫୁଟାଇବା ଯୋଗୁଁ ୮ ଜଣ ଗୁରୁତର ଆହତ ହୋଇଛନ୍ତି। ଖାସ୍ କଥା ହେଉଛି ଯେଉଁମାନେ ଆହତ ହୋଇଥିଲେ ସେମାନଙ୍କର ବାଣ ସହ କୌଣସି ସମ୍ପର୍କ ନଥିଲା। ଏହି ଲୋକମାନେ ଅଟୋରେ ଛଟ୍ ପୂଜା କରିବାକୁ ଯାଉଥିଲେ। ବାଟରେ ସେମାନଙ୍କ ଅଟୋରେ ଏକ ରକେଟ୍ ଖସିପଡ଼ିବାରୁ ପ୍ରବଳ ବିସ୍ଫୋରଣ ହୋଇଥିଲା। 

 ଏଠାରେ ପ୍ରଶ୍ନ ଉଠୁଛି କିଏ ଏହି ରକେଟ୍ ଜଳାଇଥିଲା? ରକେଟଟି ହଠାତ୍ ଅଟୋ ଭିତରକୁ ଆସିଥିଲା କିମ୍ବା ଜାଣିଶୁଣି ଅଟୋ ପାର୍ଶ୍ୱରେ ଛାଡ଼ି ଦିଆଯାଇଥିଲା। ଏ ନେଇ ଏପର୍ଯ୍ୟନ୍ତ କୌଣସି ସୂଚନା ମିଳିପାରିନାହିଁ।

ତେବେ ପ୍ରାରମ୍ଭିକ ତଦନ୍ତରୁ ଆଉ କେତେକ ସାଂଘାତିକ ତଥ୍ୟ ମିଳିଛି। ଅଟୋଟି ଯାଉଥିବାବେଳେ ଏକ ରକେଟ ତାହା ଉପରେ ମାଡ଼ ହୋଇଥିଲା । ତେବେ ଅଟୋରେ ପୂର୍ବରୁ ହିଁ ସଲଫର ପଟାସ ରଖାଯାଇଥିଲା, ଫଳରେ ରକେଟ ବିସ୍ଫୋରଣ ହେବା ପରେ ସଲଫର ପଟାସରେ ନିଆଁ ଲାଗି ସଂପୂର୍ଣ୍ଣ ଅଟୋ ଜଳିଯାଇଥିଲା । ଫଳରେ ଅଟୋରେ ବସିଥିବା ୮ ଜଣ ଯାତ୍ରୀ ଗୁରୁତର ଭାବେ ଜଳି ଆହତ ହୋଇଯାଇଥିଲେ । 

ଆହତଙ୍କ ପରିବାରର ସଦସ୍ୟ ନବଲ କିଶୋର କହିଛନ୍ତି ଯେ ସେମାନେ ଦିଲ୍ଲୀ ବାଇପାସ୍ ସ୍ଥିତ ଭାଲୌଥ ସବ୍ ବ୍ରାଞ୍ଚ କେନାଲରେ ଥିବା ଛଟ ଘାଟ ପୂଜାକୁ ଘରୁ ଯାଉଥିଲେ। କିନ୍ତୁ ଦିଲ୍ଲୀ ବାଇପାସ୍ ରେ ପହଞ୍ଚିବା ମାତ୍ରେ ବାହାରୁ ଏକ ରକେଟ୍ ସିଧାସଳଖ ଅଟୋ ଉପରେ ଖସି ପଡ଼ିଥିଲା। ଅଟୋରେ ଏକ ବସ୍ତା ଭିତରେ ସଲଫର ପଟାସ ରଖାଯାଇଥିଲା। ଯେଉଁଥିପାଇଁ ଏଥିରେ ହଠାତ୍ ବିସ୍ଫୋରଣ ହୋଇଥିଲା।