ଇଞ୍ଜିନ୍ ଫେଲ୍,ଫ୍ୟାନ୍ ଜାମ୍: ବନ୍ୟାପାଣିରେ ଜରୁରୀ ଅବତରଣ କଲା ବାୟୁସେନା ହେଲିକପ୍ଟର

ପାଟନା: ବିହାରର ମୁଜାଫରପୁରରେ ବନ୍ୟାପାଣିରେ ବାୟୁସେନା ହେଲିକପ୍ଟର ଜରୁରୀ ଅବତରଣ କରିଛି। ବୈଷୟିକ କାରଣରୁ ହେଲିକପ୍ଟରଟି ପାଣିରେ ଅବତରଣ କରିଛି ବୋଲି ବାୟୁସେନା ଅଧିକାରୀ ଏକ ବିବୃତି ଜାରି କରିଛନ୍ତି। ବିମାନରେ ଥିବା ଦୁଇ ଜଣ ପାଇଲଟଙ୍କ ସମେତ ତିନି ଜଣ ଲୋକ ଦୁର୍ଘଟଣା ପରେ ସୁରକ୍ଷିତ ଅଛନ୍ତି। ସୂଚନା ଅନୁଯାୟୀ, ଏହି ଘଟଣା ଅରାଇର ମଧୁବନ୍ ବେସିରେ ଘଟିଛି।

ବାୟୁସେନା ଏହି ଘଟଣାର ତଦନ୍ତ ନିର୍ଦ୍ଦେଶ ଦେଇଛି। ଦୁର୍ଘଟଣା କିପରି  ହେଲା ଏବଂ ଏଥିପାଇଁ କିଏ ଦାୟୀ ତାହାର ତଦନ୍ତ ଜାରି ରହିଛି। ବାୟୁସେନା ବର୍ତ୍ତମାନ ସୁଦ୍ଧା ଏ ସମ୍ପର୍କରେ କୌଣସି ସୂଚନା ପ୍ରଦାନ କରିନାହିଁ।

ବାୟୁସେନା ସୂତ୍ର ଅନୁଯାୟୀ, ଏହି ହେଲିକପ୍ଟରଟି ବିହାରର ସୀତାମଢ଼ି ଜିଲ୍ଲାରେ ବନ୍ୟା ପୀଡିତଙ୍କୁ ଖାଦ୍ୟ ଏବଂ ଅନ୍ୟାନ୍ୟ ସାମଗ୍ରୀ ବିତରଣ କରିବା ପରେ ଫେରୁଥିଲା। ଦୁର୍ଘଟଣା ପରେ ଅନୁସନ୍ଧାନକାରୀ ଦଳ ପାଇଲଟ ଏବଂ ଅନ୍ୟ ଯବାନମାନଙ୍କୁ ପଚରାଉଚରା କରୁଛନ୍ତି। ଘଟଣାର ଅଧିକ ତଦନ୍ତ ଜାରି ରହିଛି।

ସ୍ଥାନୀୟ ପୋଲିସର ସୂଚନାନୁସାରେ, ଏହି ଘଟଣା ନୟା ଗାଁ ୱାର୍ଡ-୧୩ରେ ଘଟିଛି।  ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଛି। ହେଲିକପ୍ଟରକୁ ବାହାରକୁ ଅଣାଯାଉଛି। 

ବିହାରର କୋସି ଏବଂ ଅନ୍ୟ ନଦୀରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଯେଉଁଥିପାଇଁ ଚମ୍ପାରଣର ବେଟିଆରେ ଥିବା ରିଙ୍ଗ ଡ୍ୟାମ୍ ଭାଙ୍ଗି ଯାଇଛି। ପୂର୍ବରୁ ବନ୍ୟାପାଣି ଯୋଗୁ ବାଗାହା ଡ୍ୟାମ୍ ମଧ୍ୟ ଭାଙ୍ଗି ଯାଇଥିଲା। ସେନା ଏଠାରେ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି। ଲୋକଙ୍କୁ ରିଲିଫ କ୍ୟାମ୍ପକୁ ନିଆଯାଉଛି।

ଦୁର୍ଘଟଣା ପରେ ବିପର୍ଯ୍ୟୟ ପରିଚାଳନା ବିଭାଗର ମୁଖ୍ୟ ସଚିବ ପ୍ରତ୍ୟୟ ଅମୃତ ଗଣମାଧ୍ୟମକୁ କହିଛନ୍ତି ଯେ ପାଇଲଟଙ୍କ ଉପସ୍ଥିତ ବୁଦ୍ଧି ଯୋଗୁ ଏକ ବଡ଼ ଦୁର୍ଘଟଣାକୁ ଏଡାଇ ଦିଆଯାଇପାରିଛି। ସେ କହିଛନ୍ତି ଯେ ହେଲିକପ୍ଟରର ଇଞ୍ଜିନ ଫେଲ୍ ହୋଇଯାଇଥିଲା। ଏହା ପରେ ପାଇଲଟ ବନ୍ୟାପାଣିରେ ଜରୁରୀ ଅବତରଣ କରିଥିଲେ। କୁହାଯାଉଛି ଯେ ଇଞ୍ଜିନ ଫେଲ୍ ହେବା ପରେ ହେଲିକପ୍ଟରର ଫ୍ୟାନ୍ (ରୋଟର୍ସ) ବନ୍ଦ ହୋଇଯାଇଥିଲା।