ଯଥେଷ୍ଟ ହେଲା, ଏବେ ଆଉ ନୁହେଁ: ସୁପ୍ରିମକୋର୍ଟରେ ପୂଜା ସ୍ଥଳ ଅଧିନିୟମର ନୂଆ ଆବେଦନ ନେଇ ସିଜେଆଇ ଅସନ୍ତୁଷ୍ଟ

ନୂଆଦିଲ୍ଲୀ: ପୂଜା ସ୍ଥଳ ଅଧିନିୟମ ୧୯୧୯ ସହିତ ଜଡିତ ନୂତନ ଆବେଦନଗୁଡ଼ିକ ଲଗାତାର ଦାଖଲ ହେଉଥିବା ନେଇ ସୁପ୍ରିମକୋର୍ଟ ଅସନ୍ତୋଷ ପ୍ରକାଶ କରିଛନ୍ତି। ଏହି ମାମଲାରେ ବାରମ୍ବାର ଆବେଦନ ଦାଖଲ ହେବା ନେଇ ସୋମବାର ମୁଖ୍ୟ ବିଚାରପତି ସଞ୍ଜିବ ଖାନ୍ନା ଅସନ୍ତୋଷ ପ୍ରକାଶ କରିଛନ୍ତି।

ନିଜର ଅସନ୍ତୋଷ ପ୍ରକାଶ କରି ସିଜେଆଇ କହିଛନ୍ତି, ଯଥେଷ୍ଟ ହେଲା, ଆଉ ନୁହେଁ। ଏହା ଶେଷ ହେବା ଉଚିତ୍। ଏହାର ଅର୍ଥ ହେଉଛି ସେ ଏହି ମାମଲାରେ ଆଉ କୌଣସି ଆବେଦନ ଶୁଣିବାକୁ ପ୍ରସ୍ତୁତ ନୁହନ୍ତି। ସେ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ନୂତନ ଆବେଦନ ଉପରେ କୌଣସି ନୋଟିସ୍ ଜାରି କରାଯିବ ନାହିଁ।

ଏହି ଆଇନ ୧୫ ଅଗଷ୍ଟ, ୧୯୪୭ ଠାରୁ କୌଣସି ପୂଜାସ୍ଥଳର ଧାର୍ମିକ ସ୍ଥିତିରେ କୌଣସି ପରିବର୍ତ୍ତନକୁ ନିଷେଧ କରେ। ଶୁଣାଣି ସମୟରେ, ପ୍ରଧାନ ବିଚାରପତି କହିଥିଲେ ଯେ, ଯଥେଷ୍ଟ ହେଲା, ଏହା ଶେଷ ହେବା ଉଚିତ୍। ସେ ଜୋର ଦେଇ କହିଛନ୍ତି ଯେ, ସୁପ୍ରିମକୋର୍ଟ ଏହି ମାମଲାରେ କୌଣସି ନୂତନ ଆବେଦନର ଶୁଣାଣି କରିବେ ନାହିଁ। ତଥାପି, କୋର୍ଟ ଅତିରିକ୍ତ କାରଣ ସହିତ ହସ୍ତକ୍ଷେପ ଆବେଦନ ଦାଖଲ କରିବାକୁ ଅନୁମତି ଦେଇଥିଲେ, କିନ୍ତୁ ଏପର୍ଯ୍ୟନ୍ତ ଦାଖଲ ହୋଇଥିବା ନୂତନ ଆବେଦନ ଉପରେ ନୋଟିସ୍ ଜାରି କରିବାକୁ ମନା କରିଦେଇଥିଲେ।

ପୂଜା ସ୍ଥଳ ଅଧିନିୟମ ଆଇନ, ୧୯୯୧ ଅନୁଯାୟୀ, ୧୫ ଅଗଷ୍ଟ, ୧୯୯୧ ରେ ଥିବା ଧାର୍ମିକ ସ୍ଥିତିରୁ କୌଣସି ପୂଜା ସ୍ଥଳକୁ ପରିବର୍ତ୍ତନ କରାଯାଇପାରିବ ନାହିଁ। ଭଙ୍ଗାଯାଇଥିବା ହିନ୍ଦୁ ମନ୍ଦିରଗୁଡ଼ିକୁ ପୁନରୁଦ୍ଧାର କରିବା ପାଇଁ ଆଇନଗତ ପ୍ରୟାସ ଦୃଷ୍ଟିରୁ ପୂଜା ସ୍ଥଳ ଅଧିନିୟମର ବୈଧତା ଉପରେ ଆବେଦନର ଶୁଣାଣି କରୁଥିବା ସମୟରେ ସୁପ୍ରିମକୋର୍ଟଙ୍କ ଏଭଳି କଡ଼ା ମନ୍ତବ୍ୟ ଆସିଛି। ୧୫ ଅଗଷ୍ଟ, ୧୯୪୭ରେ ଥିବା କୌଣସି ପୂଜାସ୍ଥଳର ଧାର୍ମିକ ସ୍ଥିତିରେ କୌଣସି ପରିବର୍ତ୍ତନକୁ ଅନୁମତି ନ ଦେବା ପାଇଁ ଏହି ଆଇନ ୧୯୯୧ ମସିହାରେ ପାସ୍ ହୋଇଥିଲା। ରାମ ଜନ୍ମଭୂମି ବିବାଦକୁ ଏଥିରୁ ବାହାରେ ରଖାଯାଇଥିଲା।

ଅଧିକ ପଢ଼ନ୍ତୁ: ଆରମ୍ଭ ହେବ ସୁଭଦ୍ରା ପ୍ଲସ୍ ଯୋଜନା

ଆଇନର ବୈଧତା ଉପରେ ମୂଳ ଆବେଦନ ଅଶ୍ୱିନୀ କୁମାର ଉପାଧ୍ୟାୟଙ୍କ ଦ୍ୱାରା ଦାଏର କରାଯାଇଥିଲା, କିନ୍ତୁ ଗତ ବର୍ଷ କୋର୍ଟ ହିନ୍ଦୁ ପକ୍ଷଙ୍କ ଦ୍ୱାରା ୧୦ଟି ମସଜିଦକୁ ଫେରାଇ ଆଣିବା ପାଇଁ ଦାଏର ୧୮ଟି ମକଦ୍ଦମାର କାର୍ଯ୍ୟଧାରା ଉପରେ ସ୍ଥଗିତ ରଖିଥିଲେ ଏବଂ ମନ୍ଦିର-ମସଜିଦ ବିବାଦ ସହିତ ଜଡିତ ସମସ୍ତ ମାମଲାକୁ ଏକାଠି କରିଥିଲେ। ଏଥିରେ ଶାହି ଇଦଗା-କୃଷ୍ଣ ଜନ୍ମଭୂମି, କାଶୀ ବିଶ୍ୱନାଥ-ଜ୍ଞାନବାପି ମସଜିଦ ଏବଂ ସମ୍ଭଲ ମସଜିଦ ବିବାଦ ଅନ୍ତର୍ଭୁକ୍ତ।

ଅନେକ ବିରୋଧୀ ଦଳ ଏହି ଆଇନ ସପକ୍ଷରେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ, ଯେତେବେଳେ ହିନ୍ଦୁ ଗୋଷ୍ଠୀ ଏବଂ ଦକ୍ଷିଣପନ୍ଥୀ ସଂଗଠନ ଏହାକୁ ବିରୋଧ କରିଥିଲେ। ଆଇନ ପାସ୍ ହେବା ସମୟରେ କ୍ଷମତାରେ ଥିବା କଂଗ୍ରେସ ଏବଂ ଅସଦୁଦ୍ଦିନ ଓୱାସିଙ୍କ ଏଆଇଏମଆଇଏମ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ସେମାନେ ଦାବି କରିଥିଲେ, ଯେ ଅଧିନିୟମକୁ କଡ଼ାକଡ଼ି କାର୍ଯ୍ୟକାରୀ କରାଯାଉ। ସୋମବାର ଦିନ ହାଜର ହୋଇଥିବା ଆଉ ଜଣେ ଆବେଦନକାରୀ କହିଛନ୍ତି ଯେ, ସମସ୍ତଙ୍କର ଶାନ୍ତିରେ ବଞ୍ଚିବାର ଅଧିକାର ଥିବାରୁ ଅଧିନିୟମକୁ ବଜାୟ ରଖିବା ଉଚିତ୍।

ଶୁଣାଣି ସମୟରେ, ସିଜେଆଇ କହିଥିଲେ ଯେ, ସେ ଗତ ଥର ନୂତନ ଆବେଦନ ଦାଖଲ କରିବାକୁ ଅନୁମତି ଦେଇଥିଲେ। କିନ୍ତୁ ଏପରି ହସ୍ତକ୍ଷେପର ଏକ ସୀମା ରହିବା ଆବଶ୍ୟକ। ସିଜେଆଇ ଖାନ୍ନା କହିଛନ୍ତି, ନୂତନ ହସ୍ତକ୍ଷେପ ପାଇଁ ଆବେଦନକୁ ଅନୁମତି ଦିଆଯିବ, ଯଦି ଏହା କିଛି ଆଧାର ଉଠାଇଥାଏ ଯାହା ଏପର୍ଯ୍ୟନ୍ତ ଉଠାଯାଇ ନାହିଁ। ଆବେଦନକାରୀଙ୍କ ପ୍ରତିନିଧିତ୍ୱ କରୁଥିବା ବରିଷ୍ଠ ଆଇନଜୀବୀ ବିକାଶ ସିଂହ କହିଛନ୍ତି, କେନ୍ଦ୍ର ସରକାରଙ୍କ ପ୍ରତିକ୍ରିୟାକୁ ଅପେକ୍ଷା କରାଯାଇଛି। ଶୁଣାଣି ଏପ୍ରିଲ ପ୍ରଥମ ସପ୍ତାହ ପର୍ଯ୍ୟନ୍ତ ସ୍ଥଗିତ ରଖାଯାଇଛି।

ଅଧିକ ପଢ଼ନ୍ତୁ: ଗାଜା ଛାଡିବାକୁ ନିଷ୍ପତ୍ତି ନେଲା ହମାସ: ପାଲେଷ୍ଟାଇନ କର୍ତ୍ତୃପକ୍ଷଙ୍କୁ କ୍ଷମତା ହସ୍ତାନ୍ତର କରିବାକୁ ଘୋଷଣା