ମହଙ୍ଗା ଭତ୍ତା ୨୮%କୁ ବୃଦ୍ଧି

ନୂଆଦିଲ୍ଲୀ : କେନ୍ଦ୍ର ସରକାର ଆଜି ମହଙ୍ଗା ଭତ୍ତା ଓ ମହଙ୍ଗା ସହାୟତାକୁ ୨୮%କୁ ବୃଦ୍ଧି କରିଛନ୍ତି। ପୂର୍ବରୁ ଏହି ହାର ୧୭ ପ୍ରତିଶତ ଥିଲା। ମହଙ୍ଗା ଭତ୍ତା ବୃଦ୍ଧିକୁ ଜୁଲାଇ ୧ରୁ ଲାଗୁ କରାଯାଇଛି। ଏହି ନିଷ୍ପତ୍ତି ଯୋଗୁଁ କେନ୍ଦ୍ର ସରକାରଙ୍କ ଅଧୀନରେ କାର୍ଯ୍ୟ କରୁଥିବା ୪୮,୩୪,୦୦୦ କର୍ମଚାରୀ ଓ ୬୫,୨୬,୦୦୦ ପେନ୍‌ସନ୍‌ଭୋଗୀ ଉପକୃତ ହେବେ। ଗତବର୍ଷ କରୋନା ମହାମାରୀ ବ୍ୟାପିବା ପରେ ମହଙ୍ଗା ଭତ୍ତା ବୃଦ୍ଧିକୁ ସ୍ଥଗିତ ରଖାଯାଇଥିଲା। ୨୦୨୦ ଜାନୁଆରି ୧, ଜୁଲାଇ ୧ ଓ ୨୦୨୧ ଜାନୁଆରିରେ ମିଳିବାକୁ ଥିବା ମହଙ୍ଗା ଭତ୍ତା ବୃଦ୍ଧିକୁ ସରକାର ସ୍ଥଗିତ ରଖିଥିଲେ। କର୍ମଚାରୀମାନଙ୍କୁ ମହଙ୍ଗା ଭତ୍ତା ବୃଦ୍ଧିର ଲାଭ ମିଳିବ। ମହଙ୍ଗା ସହାୟତାରେ ହୋଇଥିବା ବୃଦ୍ଧି ଯୋଗୁଁ ପେନ୍‌ସନ୍‌ଭୋଗୀମାନେ ଲାଭବାନ ହେବେ। ଜୁଲାଇ ୧ରୁ ମହଙ୍ଗା ଭତ୍ତାକୁ ୧୭%ରୁ ବଢ଼ାଇ ୨୮% କରିବାକୁ ନିଷ୍ପତ୍ତି ହୋଇଛି ବୋଲି ଆଜି ସୂଚନା ଓ ପ୍ରସାରଣ ମନ୍ତ୍ରୀ ଅମିତାଭ ଠାକୁର କହିଛନ୍ତି। ଏଥି ଯୋଗୁଁ ସରକାରଙ୍କ ଉପରେ ୩୪,୪୦୦ କୋଟି ଟଙ୍କାର ଅତିରିକ୍ତ ଚାପ ପଡ଼ିବ। ମୁଦ୍ରାସ୍ଫୀତିରେ ହେଉଥିବା ବୃଦ୍ଧିର ପ୍ରଭାବରୁ ସୁରକ୍ଷା ପ୍ରଦାନ କରିବା ଲାଗି କେନ୍ଦ୍ର ସରକାର ମହଙ୍ଗା ଭତ୍ତା ବୃଦ୍ଧି କରିଥାନ୍ତି।