ପ୍ରଧାନ ବିଚାରପତି ୟୁୟୁ ଲଲିତଙ୍କୁ ଦିଆଗଲା ଅବସରକାଳୀନ ସମ୍ବର୍ଦ୍ଧନା,ଜଷ୍ଟିସ୍ ଚନ୍ଦ୍ରଚୂଡ଼ ଦାୟିତ୍ବ ଗ୍ରହଣ କରିବେ

ନୂଆଦିଲ୍ଲୀ: ସୋମବାର ଦେଶର ପ୍ରଧାନ ବିଚାରପତି ଭାବରେ ଜଷ୍ଟିସ୍ ୟୁୟୁ ଲଲିତଙ୍କୁ ବିଦାୟକାଳୀନ ସମ୍ବର୍ଦ୍ଧନା ଦିଆଯାଇଛି। ଆଜି ଥିଲା ସୁପ୍ରିମକୋର୍ଟରେ ତାଙ୍କର ଶେଷ କାର୍ଯ୍ୟ ଦିବସ। ତାଙ୍କ କାର୍ଯ୍ୟକାଳର ଶେଷ ଦିନରେ ସୁପ୍ରିମକୋର୍ଟର ସମାରୋହ ପୀଠ ବସିଥିଲା । ତାଙ୍କର ଉତ୍ତରାଧିକାରୀ ସିଜେଆଇ ବିଚାରପତି ଡି ୱାଇ ଚନ୍ଦ୍ରଚୂଡ଼ ପାରମ୍ପରିକ ଭାବେ ତାଙ୍କର ଡାହାଣ ପାର୍ଶ୍ୱରେ ବସିଥିଲେ । ଏଥିସହିତ ବିଚାରପତି ବେଲା ମାଧୁର୍ଯ୍ୟ ତ୍ରିବେଦୀ ବାମ ପାର୍ଶ୍ୱରେ ବସିଥିଲେ। ଆଜିର କାର୍ଯ୍ୟସୂଚୀରେ ୧୫ ମୋକଦ୍ଦମା ସାମିଲ ଥିଲା ଓ ସେମଧ୍ୟରେ ଅଧିକାଂଶ ମଧ୍ୟସ୍ଥତା ଓ ସ୍ଥାନାନ୍ତର ସମ୍ବନ୍ଧିତ ମାମଲା ଥିଲା।

କୋର୍ଟ ପରିସରରେ ଏସଏସଜି ଐଶ୍ୱର୍ଯ୍ୟା ଭଟି ମଧ୍ୟ ଅବସରପ୍ରାପ୍ତ ସିଜେଆଇ ଜଷ୍ଟିସ ଲଲିତଙ୍କୁ ଶୁଭେଚ୍ଛା ଜଣାଇଥିଲେ। ଏହି ଅବସରରେ ପରବର୍ତ୍ତୀ ପ୍ରଧାନ ବିଚାରପତି ଡି ୱାଇ ଚନ୍ଦ୍ରଚୂଡ଼ କହିଛନ୍ତି, ଏଠାରେ ଅନେକ ସଫଳ ପ୍ରଧାନ ବିଚାରପତି କାର୍ଯ୍ୟ କରିଛନ୍ତି କିନ୍ତୁ ଆପଣ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି। ଆପଣ ଗ୍ରହଣ କରିଥିବା ପଦକ୍ଷେପଗୁଡ଼ିକ ଭବିଷ୍ୟତରେ ମଧ୍ୟ ଜାରି ରହିବ |

ଆଇନ ଏବଂ ଭାରତୀୟ ସାମାଜିକ ଜୀବନ ବିଷୟରେ ଆପଣଙ୍କ ଗଭୀର ବୁଝାମଣା ଆପଣଙ୍କୁ କୋର୍ଟ ପରିସର ଭିତରେ ଏବଂ ବାହାରେ ଏକ ସ୍ୱତନ୍ତ୍ର ପରିଚୟ ଦେଇଥାଏ। ବିଚାରପତି ଚନ୍ଦ୍ରଚୂଡ ବିଚାରପତି ଲଲିତଙ୍କ ପରିବାର ଏବଂ ତାଙ୍କ ପିତାଙ୍କୁ ଅନେକ ଶୁଭକାମନା ଜଣାଇଛନ୍ତି।