୨୦୨୮ ପର୍ଯ୍ୟନ୍ତ ମାଗଣା ରାସନ: ମୋଦୀ ସରକାରଙ୍କ ବଡ଼ ନିଷ୍ପତ୍ତି

ନୂଆଦିଲ୍ଲୀ: ବୁଧବାର ଦିନ ଅନୁଷ୍ଠିତ ହୋଇଥିବା କେନ୍ଦ୍ର କ୍ୟାବିନେଟ ବୈଠକରେ ଅନେକ ପ୍ରମୁଖ ନିଷ୍ପତ୍ତି ନିଆଯାଇଛି। ଡିସେମ୍ବର ୨୦୨୮ ପର୍ଯ୍ୟନ୍ତ ପ୍ରଧାନ ମନ୍ତ୍ରୀ ଗରିବ କଲ୍ୟାଣ ଯୋଜନା ଏବଂ ଅନ୍ୟାନ୍ୟ ହିତାଧିକାରୀ ଯୋଜନା ଅଧୀନରେ ମାଗଣା ରାସନ  ଜାରି ରଖିବାକୁ କ୍ୟାବିନେଟ ଅନୁମତି ଦେଇଛି।

ଏଥିପାଇଁ  ମୋଟ  ୧୭,୦୮୨ କୋଟି ଟଙ୍କା ଖର୍ଚ୍ଚ ହେବ। ଯାହା କେନ୍ଦ୍ର ସରକାର ସମ୍ପୂର୍ଣ୍ଣ ଭାବେ ବହନ କରିବେ। କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ ଏହି ସୂଚନା ଦେଇଛନ୍ତି।

କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ ସ୍ପନ୍ଦନ ଗ୍ରାମ କାର୍ଯ୍ୟକ୍ରମ ଅଧୀନରେ ରାଜସ୍ଥାନ ଏବଂ ପଞ୍ଜାବର ସୀମାନ୍ତ ଅଞ୍ଚଳରେ ୨୨୮୦ କିଲୋମିଟର ରାସ୍ତା ନିର୍ମାଣ ନିଷ୍ପତ୍ତି ମଧ୍ୟ କ୍ୟାବିନେଟରେ ନିଆଯାଇଛି। ଏହି କାମ ପାଇଁ ୪୪୦୬ କୋଟି ଟଙ୍କା ଖର୍ଚ୍ଚ ହେବ ।  ଗ୍ରାମାଞ୍ଚଳରେ ଏହାଦ୍ୱାରା ଉନ୍ନତି ହେବ ବୋଲି ପ୍ରସ୍ତାବରେ କୁହାଯାଇଛି। ଭ୍ରମଣ କରିବା ସହଜ ହେବ।  ନୂତନ ସଡ଼କଗୁଡିକ ସମଗ୍ର ଅବଶିଷ୍ଟ ରାଜପଥ ନେଟୱାର୍କ ସହିତ ସଂଯୁକ୍ତ ହେବ।

ଏହା ସହିତ ଗୁଜୁରାଟର ଲୋଥାଲରେ ଜାତୀୟ ସାମୁଦ୍ରିକ ହେରିଟେଜ୍ କମ୍ପ୍ଲେକ୍ସ ନିର୍ମାଣ ପ୍ରକଳ୍ପକୁ ମଧ୍ୟ କ୍ୟାବିନେଟ୍ ଅନୁମୋଦନ କରିଛି। ଭାରତର ସମୃଦ୍ଧ ତଥା ବିବିଧ ସାମୁଦ୍ରିକ ଐତିହ୍ୟ ପ୍ରଦର୍ଶନ କରିବାକୁ ଏହି ପ୍ରସ୍ତାବର ଲକ୍ଷ୍ୟ ରହିଛି। କେନ୍ଦ୍ର ମନ୍ତ୍ରୀ ବୈଷ୍ଣବ କହିଛନ୍ତି ଯେ ଏହା ପ୍ରସ୍ତୁତ ହୋଇଗଲେ ଏହା ବିଶ୍ୱର ସର୍ବବୃହତ ସାମୁଦ୍ରିକ ଐତିହ୍ୟ କମ୍ପ୍ଲେକ୍ସ ହେବ। ଆମର ସମୃଦ୍ଧ ସାମୁଦ୍ରିକ ବିବିଧତା ସଂରକ୍ଷଣ ଏବଂ ବିକାଶ ହେବା ଆବଶ୍ୟକ।

ଏହି ପ୍ରକଳ୍ପ ୨ ପର୍ଯ୍ୟାୟରେ ସମାପ୍ତ ହେବ। କେନ୍ଦ୍ର ସରକାରଙ୍କ ଅନୁଯାୟୀ ଏହି ପ୍ରକଳ୍ପ ମାଧ୍ୟମରେ ଯୁବବର୍ଗମାନଙ୍କ ପାଇଁ ପ୍ରାୟ ୨୨,୦୦୦ନିଯୁକ୍ତି ସୁଯୋଗ ସୃଷ୍ଟି ହେବ।   ସେଥିମଧ୍ୟରେ ୧୫,୦୦୦ ପ୍ରତ୍ୟକ୍ଷ ଏବଂ  ୭,୦୦୦ ପରୋକ୍ଷ ନିଯୁକ୍ତି ସୁଯୋଗ ରହିବ। କେନ୍ଦ୍ର କ୍ୟାବିନେଟର ନିଷ୍ପତ୍ତିରେ କୁହାଯାଇଛି ଯେ ଏହି ପ୍ରକଳ୍ପ ସ୍ଥାନୀୟ ଗୋଷ୍ଠୀ, ପର୍ଯ୍ୟଟକ, ଅନୁସନ୍ଧାନକାରୀ, ସରକାରୀ ଅନୁଷ୍ଠାନ, ଶିକ୍ଷାନୁଷ୍ଠାନ, ସାଂସ୍କୃତିକ ସଂଗଠନ ଏବଂ ବ୍ୟବସାୟୀଙ୍କ ସମେତ ଅନ୍ୟାନ୍ୟ ବିଭାଗକୁ ଉପକୃତ କରିବ।