ପତ୍ନୀଙ୍କ ଦ୍ବାରା ନିର୍ଯାତିତ ହୋଇ ହାତକଡ଼ି ପିନ୍ଧି କରୁଛନ୍ତି ଚା’ ବେପାର

ନୂଆଦିଲ୍ଲୀ: ପତ୍ନୀଙ୍କ ଦ୍ବାରା ପାଉଥିବା ନିର୍ଯାତନାର ପ୍ରତିବାଦରେ ରାଜସ୍ଥାନର କୃଷ୍ଣ କୁମାର ଧାକଡ ଏକ ନିଆରା କୌଶଳ ଆପଣେଇଥିବା ଦେଖିବାକୁ ମିଳିଛି। 

ରାଜସ୍ଥାନର କୃଷ୍ଣ କୁମାର ଧାକଡ ତାଙ୍କ ଶ୍ୱଶୁର ଘର ଲୋକଙ୍କ ସମ୍ମୁଖରେ ଏକ ଅନନ୍ୟ ଚା ଦୋକାନ ଖୋଲିଛନ୍ତି। ଷ୍ଟଲର ନାମ ମଧ୍ୟ ‌ବେଶ୍‌ ଆଖିଦୃଶିଆ ରଖିଛନ୍ତି ସେ। ତାଙ୍କ ଚା’ ଦୋକାନର ନାମ ରଖିଛନ୍ତି, ‘‘୪୯୮ଏ ଟି କ୍ୟାଫ୍‌’’। ଯାହାକି ତାଙ୍କ ପତ୍ନୀ ତାଙ୍କ ବିରୋଧ ଯୌତୁକ ନିର୍ଯାତନା ମାମଲା ରୁଜୁ କରିଥିବା ଧାରା ସହିତ ଜଡିତ। ଧାକଡ ହାତକଡି ପିନ୍ଧି ଚା ପରିବେଷଣ କରୁଥିବାର ଦେଖିବାକୁ ମିଳୁଛି। ଗତ ତିନି ବର୍ଷ ଧରି ସହ୍ୟ କରିଥିବା ଯନ୍ତ୍ରଣା ଏବଂ ଅପମାନର ପ୍ରତୀକ ଭାବରେ ସେ ହାତରେ ହାତକଡ଼ି ପିନ୍ଧି ଚା’ ପରିବେଷଣ କରୁଛନ୍ତି।

ତାଙ୍କ ଚା ଷ୍ଟଲର ବ୍ୟା‌ନର୍‌ ଏବଂ ପୋଷ୍ଟ୍‌ରେ ଲେଖିଛନ୍ତି କି ଯେବେ ପର୍ଯ୍ୟନ୍ତ ତାଙ୍କୁ ନ୍ୟାୟ ମିଳିବନି ସେବେ ପର୍ଯ୍ୟନ୍ତ ‌ସେ ଚା ବିକୁଥିବେ। ତାଙ୍କ ବିରୋଧରେ ୧୨୫ ଧାରା ଲାଗିଥିବାରୁ ସେ ଆହୁରି ବି ଲେଖିଛନ୍ତି, ‘‘ଆସନ୍ତୁ ୧୨୫ରେ କେତେ ଖର୍ଚ୍ଚ ଲାଗିବ, ଚା’ ପିଇ ତାହାର ଚର୍ଚ୍ଚା କରିବା।’’

ଉଲ୍ଲେଖଯୋଗ୍ୟ, ଧାକଡ ୨୦୧୮ ମସିହାରେ ମୀନାକ୍ଷୀ ମାଲଭଙ୍କୁ ବିବାହ କରିଥିଲେ। ସେମାନେ ଏକାଠି ମହୁମାଛି ପାଳନ ବ୍ୟବସାୟ ଆରମ୍ଭ କରିଥିଲେ। ସ୍ଥାନୀୟ ମହିଳାଙ୍କୁ ସଶକ୍ତ କରିଥିଲେ ଏବଂ ସ୍ୱୀକୃତି ମଧ୍ୟ ପାଇଥିଲେ। ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ ମହିଳା ସଶକ୍ତିକରଣର ପ୍ରତୀକ ଭାବରେ ୨୦୨୧ ମସିହାରେ ସେମାନଙ୍କର ମହୁ ଉଦ୍ୟୋଗର ଉଦଘାଟନ ମଧ୍ୟ କରିଥିଲେ।

ହେଲେ ୨୦୨୨ ମସିହାରେ କୃଷ୍ଣଙ୍କ ସ୍ତ୍ରୀ କୌଣସି ସତର୍କ ସୂଚନା ବିନା ଘରୁ ବାହାରି ତାଙ୍କ ବାପାମାଆଙ୍କ ଘରକୁ ଫେରି ଆସିଥିବା ଅଭିଯୋଗ ହୋଇଥିଲା। ମାସକ ପରେ, ସେ କୃଷ୍ଣଙ୍କ ବିରୁଦ୍ଧରେ ଆଇପିସି ଧାରା ୪୯୮A (ଯୌତୁକ ନିର୍ଯାତନା) ଏବଂ ଧାରା ୧୨୫ (ଭରଣପୋଷଣ) ଅନୁଯାୟୀ ମାମଲା ଦାୟର କରିଥିଲେ।

"ମିଛ ମାମଲା ଯୋଗୁ ସବୁକିଛି ନଷ୍ଟ ହୋଇଯାଇଛି। ଗତ ତିନି ବର୍ଷ ଧରି, ମୁଁ ନ୍ୟାୟ ପାଇଁ କୋର୍ଟରୁ କୋର୍ଟକୁ ବୁଲୁଛି। ମୋର ଜଣେ ବୃଦ୍ଧା ମାଆ ଅଛନ୍ତି; ଯିଏ ମୋ ଉପରେ ନିର୍ଭର କରନ୍ତି। ମୁଁ ଏକ ଟିଣ ଛାତ ତଳେ ରହୁଛି ଏବଂ ମୋର କିଛି ବାକି ନାହିଁ। ଅନେକ ଥର ମୁଁ ମୋ ଜୀବନ ଶେଷ କରିବାକୁ ଚିନ୍ତା କରିଥିଲି, କିନ୍ତୁ ପରେ ମୁଁ ମନେ ପକାଇଲି ଯେ ମୁଁ ମୋ ମାଆର ଏକମାତ୍ର ସମର୍ଥନ," ବୋଲି କୃଷ୍ଣ ଗଣମାଧ୍ୟମରେ କହିଛନ୍ତି।

କୃଷ୍ଣ କୁହନ୍ତି, "ମୁଁ ନିଷ୍ପତ୍ତି ନେଇଛି ଯେ ମୁଁ ଆଇନର ଅପବ୍ୟବହାର ଦ୍ୱାରା ଫସିଥିବା ଅଞ୍ଚଳରେ ଚା ବିକ୍ରି କରି ନିରପେକ୍ଷ ଭାବରେ ଏହି ଆଇନଗତ ଲଢ଼େଇ ଲଢ଼ିବି।’’