ଗାଜା ପାଲଟିଛି ଅଳିଆଗଦା: ୨.୩ କୋଟି ଟନ୍ ଆବଜର୍ନା ଜମା, ସଫା କରିବାକୁ ଲାଗିବ ବର୍ଷ ବର୍ଷ

ଗାଜା: ଇସ୍ରାଏଲ ଏବଂ ହମାସ୍ ମଧ୍ୟରେ ଗାଜାରେ ଚାଲିଥିବା ବିବାଦ ଭିତ୍ତିଭୂମିରେ ବ୍ୟାପକ କ୍ଷତି ଘଟାଇଛି। ଏହି କାରଣରୁ ପ୍ରାୟ ୨ କୋଟି ୩୦ ଲକ୍ଷ ଟନ୍ ଆବର୍ଜନା ଜମା ହୋଇଛି ଏବଂ ବିସ୍ଫୋରକ ସାମଗ୍ରୀ ମଧ୍ୟ ବିଭିନ୍ନ ସ୍ଥାନରେ ପଡ଼ି ରହିଛି। ଜାତିସଂଘର ମାନବିକ ସହାୟତା କର୍ମଚାରୀ କହିଛନ୍ତି ଯେ ଆବର୍ଜନା ହଟାଇବାକୁ ବର୍ଷ ବର୍ଷ ଲାଗିବ।

ପାଲେଷ୍ଟାଇନ ଶରଣାର୍ଥୀମାନଙ୍କ ପାଇଁ ମିଳିତ ଜାତିସଂଘର ସହାୟତା ଏଜେନ୍ସି ୟୁଏନଆରଡବ୍ଲୁଏ କହିଛି ଯେ ଗାଜା ଷ୍ଟ୍ରିପକୁ ପୁଣି ଏକ ସୁରକ୍ଷିତ ସ୍ଥାନ କରିବାକୁ ବର୍ଷ ବର୍ଷ ଲାଗିବ।

ଗାଜାରେ ପ୍ରତିଦିନ ଇସ୍ରାଏଲର ବୋମା ବିସ୍ଫୋରଣ ଦ୍ୱାରା ୨୦ ଲକ୍ଷରୁ ଅଧିକ ଗାଜାବାସୀଙ୍କ ଜୀବନ ନଷ୍ଟ ହୋଇଯାଇଛି। ସୂଚନାଯୋଗ୍ୟ ଯେ ଅକ୍ଟୋବର ୭ ରେ ଇସ୍ରାଏଲ ଉପରେ ହାମାସ ଆକ୍ରମଣଦ୍ବାରା ବର୍ତ୍ତମାନର ଯୁଦ୍ଧ ଆରମ୍ଭ ହୋଇଥିଲା ଯେଉଁଥିରେ ପ୍ରାୟ ୧୨୦୦ ଲୋକଙ୍କର ମୃତ୍ୟୁ ଘଟିଥିଲା ​​ଏବଂ ୨୫୦ରୁ ଅଧିକ ଲୋକ ବନ୍ଧକ ହୋଇଥିଲେ। ସେବେଠାରୁ ଗାଜାରେ ଇସ୍ରାଏଲର ଆକ୍ରମଣରେ ୩୧ ହଜାରରୁ ଅଧିକ ପାଲେଷ୍ଟାଇନ୍ର ମୃତ୍ୟୁ ଘଟିଛି ଏବଂ ୭୦ ହଜାରରୁ ଅଧିକ ଆହତ ହୋଇଛନ୍ତି।

ୟୁଏନଆରଡବ୍ଲୁଏ ଗାଜାର ବୃହତ୍ତମ ରିଲିଫ୍ ଏଜେନ୍ସି ଭାବରେ ଦକ୍ଷିଣରେ ପ୍ରାୟ ୧.୫ ମିଲିୟନ୍ ବିସ୍ଥାପିତଙ୍କୁ ଜୀବନ ରକ୍ଷାକାରୀ ସହାୟତା ସାମଗ୍ରୀ ଯୋଗାଉଛି । ଏହି ଏଜେନ୍ସି ପ୍ରାୟ ୧୦ ଲକ୍ଷ ଲୋକଙ୍କ ପାଇଁ ଆଶ୍ରୟସ୍ଥଳ ଚଳାଉଛି, ଯେଉଁଠାରେ ମାନବିକ ସହାୟତା ଏବଂ ପ୍ରାଥମିକ ସ୍ୱାସ୍ଥ୍ୟ ସେବା ମଧ୍ୟ ଲୋକଙ୍କୁ ଯୋଗାଇ ଦିଆଯାଉଛି। ଇସ୍ରାଏଲର ବାୟୁସେନା ବିସ୍ଫୋରଣ ଏବଂ ସ୍ଥଳଭାଗ ଆକ୍ରମଣ ଏବଂ ଇସ୍ରାଏଲ୍ ସୈନ୍ୟ ଏବଂ ପାଲେଷ୍ଟାଇନ ସଶସ୍ତ୍ର ବାହିନୀ ମଧ୍ୟରେ ଲଢ଼େଇ ଜାରି ରହିଛି। ଗାଜା ବିପର୍ଯ୍ୟୟର ସର୍ବଶେଷ ଅଦ୍ୟତନରେ, ଜାତିସଂଘର ମାନବିକ ସହାୟତା ସମନ୍ୱୟ ଏଜେନ୍ସି ଓସିଏଚଏ ପ୍ରାୟ ସମଗ୍ର ଗାଜା ଅଞ୍ଚଳରେ ହିଂସା ଜାରି ରହିଥିବା ନେଇ ରିପୋର୍ଟରେ ପ୍ରକାଶ କରିଛି। ଯୁଦ୍ଧରେ ସାଧାରଣ ନାଗରିକଙ୍କ ମୃତ୍ୟୁ ଘଟିବା ସହିତ ଲୋକ ବିସ୍ଥାପିତ ହେବାରେ ଲାଗିଛନ୍ତି। ଲୋକଙ୍କ ଘର ଏବଂ ଅନ୍ୟାନ୍ୟ ଭିତ୍ତିଭୂମି ନଷ୍ଟ ହୋଇଛି ବୋଲି ଏଜେନ୍ସି କହିଛି।