ଆମେରିକା ପଳାଇଥାନ୍ତେ ଶ୍ରୀଲଙ୍କା ରାଷ୍ଟ୍ରପତି ଗୋଟାବାୟା ରାଜପକ୍ଷ, ହେଲେ ମିଳିଲାନି ଭିସା

କଲମ୍ବୋ: ଶ୍ରୀଲଙ୍କାରେ ଅର୍ଥନୈତିକ ସଙ୍କଟ ପରେ ସୃଷ୍ଟି ହୋଇଥିବା ଉତ୍ତେଜନା ଥମିବାର ନାମ ନେଉନାହିଁ | ଏହାରି ମଧ୍ୟରେ ସବୁଠାରୁ ବଡ ପ୍ରଶ୍ନ ହେଉଛି ଯେ ରାଷ୍ଟ୍ରପତି ଗୋଟାବାୟା ରାଜପକ୍ଷ କେଉଁଠାରେ ଅଛନ୍ତି? ଜୁଲାଇ ୫ରୁ ସେ ନିଖୋଜ ଥିବାବେଳେ କୁହାଯାଉଥିଲା ଯେ ସେ ଦେଶ ଛାଡି ପଳାଇଛନ୍ତି। କିନ୍ତୁ ଶ୍ରୀଲଙ୍କା ରାଷ୍ଟ୍ରପତି ଗୋଟାବାୟା ରାଜପକ୍ଷ ଏପର୍ଯ୍ୟନ୍ତ ଦେଶରେ ଅଛନ୍ତି ବୋଲି ବିବିସିକୁ ଦେଇଥିବା ସାକ୍ଷାତକାରରେ ବାଚସ୍ପତି ମହିନ୍ଦା ୟାପା ଆବେୱାର୍ଦ୍ଦେନା କହିଦେଇଥିଲେ । ତେବେ ରାଷ୍ଟ୍ରପତି ଗୋଟାବାୟା ରାଜପକ୍ଷଙ୍କ ବିଷୟରେ ଏକ ନୂଆ ଖବର ସାମ୍ନାକୁ ଆସିଛି |

ମିଳିଥିବା ସୂଚନା ଅନୁଯାୟୀ ଶ୍ରୀଲଙ୍କାର ରାଷ୍ଟ୍ରପତି ଭବନରୁ ପଳାଇବା ପରେ ସେ ଆମେରିକା ଯିବା ପାଇଁ ଭିସା ଆବେଦନ କରିଥିଲେ। କିନ୍ତୁ ଆମେରିକା ଗୋଟାବାୟାଙ୍କୁ ଭିସା ଦେବାକୁ ମନା କରିଦେଇଥିଲା । ପୂର୍ବରୁ ଗୋଟାବାୟା ରାଜପକ୍ଷଙ୍କର ଶ୍ରୀଲଙ୍କା ସମେତ ଆମେରିକାର ଦ୍ୱେତ ନାଗରିକତା ଥିଲା। କିନ୍ତୁ ୨୦୧୯ ନିର୍ବାଚନ ପୂର୍ବରୁ ସେ ତାଙ୍କ ଆମେରିକାର ନାଗରିକତ୍ୱକୁ ଫେରାଇ ଦେଇଥିଲେ | ବାସ୍ତବରେ, ଏହି ଉତ୍ତେଜନା ଆରମ୍ଭ ପୂର୍ବରୁ ମଧ୍ୟ ସେ ଦେଶ ଛାଡି ପଳାଇବାକୁ ଚେଷ୍ଟା କରିଥିଲେ |

କିନ୍ତୁ ବିମାନବନ୍ଦରରେ ଥିବା ଇମିଗ୍ରେସନ କର୍ମଚାରୀମାନେ ତାଙ୍କୁ ଦେଶ ଛାଡିବାକୁ ଦେଇନଥିଲେ। ସେଥିପାଇଁ କେବଳ ଶ୍ରୀଲଙ୍କାରେ ଗୋଟାବାୟା ରାଜପକ୍ଷ ଥିବାର କୁହାଯାଉଛି ଅନୁମାନ କରାଯାଉଛି | ଯେହେତୁ ଆମେରିକା ତାଙ୍କୁ ଭିସା ଦେବାକୁ ମନା କରିଦେଇଥିବାରୁ ବର୍ତ୍ତମାନ ତାଙ୍କର ସମସ୍ୟା ଆହୁରି ବଢିଯାଇଛି |