୧୫୬ଟି ଔଷଧକୁ ନିଷିଦ୍ଧ କଲେ ସରକାର

ନୂଆଦିଲ୍ଲୀ: କେନ୍ଦ୍ର ସରକାର ୧୫୬ଟି କକଟେଲ୍ ଔଷଧକୁ ନିଷିଦ୍ଧ କରିଛନ୍ତି । ନିଷିଦ୍ଧ ଔଷଧ ତାଲିକାରେ ରହିଛି କେଶ ବୃଦ୍ଧି, ତ୍ୱଚାର ଯତ୍ନ ଏବଂ ଯନ୍ତ୍ରଣା ଉପଶମ, କିମ୍ବା ମଲ୍ଟିଭିଟାମିନ୍, ଆଣ୍ଟିପାରାସିଟିକ୍ସ, ଆଣ୍ଟିଆଲର୍ଜିକ୍ସ ଏବଂ ଆହୁରି ଅନେକ ଔଷଧ । ଫିକ୍ସଡ୍ ଡୋଜ୍ କମ୍ବିନେସନ୍ (ଏଫଡିସି) ହେଉଛି ଏକ ଔଷଧ ଯାହା ଗୋଟିଏ ବଟିକାରେ ଏକରୁ ଅଧିକ ଔଷଧକୁ ମିଶାଇଥାଏ ଏବଂ ଏହାକୁ 'କକଟେଲ୍' ଔଷଧ ମଧ୍ୟ କୁହାଯାଏ । ତେବେ ଔଷଧ କମ୍ପାନିଗୁଡ଼ିକ ଏହି କଟକଣାର ଅର୍ଥନୈତିକ ପ୍ରଭାବ ବିଷୟରେ ଏପର୍ଯ୍ୟନ୍ତ ଘୋଷଣା କରିନାହାନ୍ତି। କିନ୍ତୁ ସିପ୍ଲା, ଟରେଣ୍ଟ, ସନ୍ ଫାର୍ମା, ଆଇପିସିଏ ଲ୍ୟାବ୍ସ ଏବଂ ଲୁପିନ୍ ଭଳି ପ୍ରମୁଖ ଫାର୍ମା କମ୍ପାନୀର କେତେକ ଉତ୍ପାଦ ଏହି ନିଷେଧାଦେଶ ଦ୍ୱାରା ପ୍ରଭାବିତ ହୋଇଛି।

ସରକାରଙ୍କ ପକ୍ଷରୁ ଜାରି ଗେଜେଟ୍ ବିଜ୍ଞପ୍ତି ଅନୁଯାୟୀ, ଏହି ୧୫୬ଟି ଫିକ୍ସଡ୍ ଡୋଜ୍ କମ୍ବିନେସନ୍ (ଏଫଡିସି) ଔଷଧର ବ୍ୟବହାର ମଣିଷ ପାଇଁ ବିପଦ ସୃଷ୍ଟି କରିବାର ସମ୍ଭାବନା ଥିବା ବେଳେ ସେହି ଔଷଧର ଅନ୍ୟ ସୁରକ୍ଷିତ ବିକଳ୍ପ ରହିଛି। କେନ୍ଦ୍ର ଦ୍ୱାରା ନିଯୁକ୍ତ ଏକ ବିଶେଷଜ୍ଞ କମିଟି ଏହି ମାମଲାର ତଦନ୍ତ କରିଥିଲେ, ଯେଉଁଥିରେ ଏହି ଏଫଡିସିଗୁଡ଼ିକ ଅଯୌକ୍ତିକ ବୋଲି ଦର୍ଶାଯାଇଥିଲା। ସରକାରଙ୍କ ତରଫରୁ ସ୍ପଷ୍ଟ କରାଯାଇଛି ଯେ ଡ୍ରଗ୍ସ ଟେକ୍ନିକାଲ ଆଡଭାଇଜରି ବୋର୍ଡ (ଡିଟିଏବି) ମଧ୍ୟ ଏହି ଔଷଧଗୁଡ଼ିକୁ ଯାଞ୍ଚ କରି ଏହି ଏଫ୍ଡିସିରେ ଅନ୍ତର୍ଭୁକ୍ତ ଔଷଧର ଚିକିତ୍ସା ବିଜ୍ଞାନ ଅନୁଯାୟୀ କୌଣସି ଅର୍ଥ ନାହିଁ ବୋଲି ସୁପାରିସ କରିଛି।