ପିଆଜ ଉପରେ ଲାଗୁ ୨୦ ରପ୍ତାନି ଶୁଳକ ପ୍ରତ୍ୟାହୃତ, ଏପ୍ରିଲ ୧ରୁ ଲାଗୁ ହେବ

ନୂଆଦିଲ୍ଲୀ: ଭାରତ ସରକାର ପିଆଜ ରପ୍ତାନୀ ଉପରେ ୨୦ ପ୍ରତିଶତ ଶୁଳ୍କ ପ୍ରତ୍ୟାହାର କରିଛନ୍ତି। ଏହି ଛାଡ଼ ୧ ଏପ୍ରିଲ, ୨୦୨୫ ଠାରୁ ଲାଗୁ ହେବ । ଉପଭୋକ୍ତା ବ୍ୟାପାର ବିଭାଗର ଯୋଗାଯୋଗ କ୍ରମେ ରାଜସ୍ୱ ବିଭାଗ ଦ୍ୱାରା ଆଜି ଏହି ସମ୍ବନ୍ଧରେ ଏକ ବିଜ୍ଞପ୍ତି ଜାରି କରାଯାଇଛି। ଏହା ଫଳରେ ଦେଶର ପିଆଜ ଚାଷୀମାନେ ଉପକୃତ ହେବେ ।

ଘରୋଇ ଉପଲବ୍ଧତା ସୁନିଶ୍ଚିତ କରିବା ପାଇଁ ସରକାର ଶୁଳ୍କ, ସର୍ବନିମ୍ନ ରପ୍ତାନୀ ମୂଲ୍ୟ (ଏମଇପି) ଏବଂ ଏପରିକି ୨୦୨୩ ଡିସେମ୍ବର ୮ ରୁ ୨୦୨୪ ମଇ ୩ ପର୍ଯ୍ୟନ୍ତ ପ୍ରାୟ ପାଞ୍ଚ ମାସ ପାଇଁ ରପ୍ତାନୀ ନିଷେଧାଦେଶ ଜାରି କରିଥିଲେ ଏବଂ ଏହା ମାଧ୍ୟମରେ ରପ୍ତାନୀକୁ ରୋକିବା ଲାଗି ପଦକ୍ଷେପ ନେଇଥିଲେ। ବର୍ତ୍ତମାନ ହଟାଇ ଦିଆଯାଇଥିବା ୨୦ ପ୍ରତିଶତ ରପ୍ତାନି ଶୁଳ୍କକୁ ୧୩ ସେପ୍ଟେମ୍ବର ୨୦୨୪ଠାରୁ ଲାଗୁ ହୋଇଥିଲା।

ରପ୍ତାନି ନିଷେଧାଦେଶ ସତ୍ତ୍ୱେ, ଆର୍ଥିକ ବର୍ଷ ୨୦୨୩-୨୪ ରେ ମୋଟ ପିଆଜର ରପ୍ତାନୀ ୧୭.୧୭ ଏଲଏମଟି ଥିଲା ଏବଂ ଆର୍ଥିକ ବର୍ଷ ୨୦୨୪ -୨୫ (ମାର୍ଚ୍ଚ ୧୮ ପର୍ଯ୍ୟନ୍ତ) ୧୧.୬୫ ଏଲଏମଟି ଥିଲା। ମାସିକ ପିଆଜର ରପ୍ତାନୀ ପରିମାଣ ସେପ୍ଟେମ୍ବର ୨୦୨୪ରେ ୦.୭୨ ଲକ୍ଷ ମେଟ୍ରିକ ଟନରୁ ଜାନୁଆରୀ ୨୦୨୪ ରେ ୧.୮୫ ଲକ୍ଷ ମେଟ୍ରିକ ଟନକୁ ବୃଦ୍ଧି ପାଇଛି।

ରବି ଫସଲର ଭଲ ଆଗମନ ପରେ ଉଭୟ ମଣ୍ଡି ଓ ଖୁଚୁରା ମୂଲ୍ୟ ହ୍ରାସ ପାଇଛି । ଏହି ଗୁରୁତ୍ୱପୂର୍ଣ୍ଣ ସମୟରେ କୃଷକମାନଙ୍କୁ ପାରିଶ୍ରମିକର ଉଚିତ ମୂଲ୍ୟ ସୁନିଶ୍ଚିତ କରିବା ସହିତ ଗ୍ରାହକଙ୍କ ପାଇଁ ପିଆଜର ସୁଲଭତା ବଜାୟ ରଖିବା ନିମନ୍ତେ ସରକାରଙ୍କ ପ୍ରତିବଦ୍ଧତାର ଆଉ ଏକ ପ୍ରମାଣ ହେଉଛି ଏହି ନିଷ୍ପତ୍ତି। ଯଦିଓ ବର୍ତ୍ତମାନର ମଣ୍ଡି ମୂଲ୍ୟ ପୂର୍ବ ବର୍ଷଗୁଡ଼ିକର ଅନୁରୂପ ଅବଧି ସ୍ତରଠାରୁ ଅଧିକ, ତଥାପି ସର୍ବଭାରତୀୟ ଭାରିତ ହାରାହାରି ମଡେଲ ମୂଲ୍ୟ ୩୯ ପ୍ରତିଶତ ହ୍ରାସ ପାଇଛି। ସେହିଭଳି, ଗତ ଏକ ମାସ ମଧ୍ୟରେ ସର୍ବଭାରତୀୟ ହାରାହାରି ଖୁଚୁରା ମୂଲ୍ୟ ୧୦ ପ୍ରତିଶତ ହ୍ରାସ ପାଇଛି।