କାବୁଲ:ମୌଳବାଦୀ ତାଲିବାନ ଶାସନରେ ସାଧାରଣ ଲୋକଙ୍କ ଜୀବନ ଆହୁରି କଷ୍ଟକର ହେବାରେ ଲାଗିଛି। ଆଫଗାନିସ୍ତାନରେ, ତାଲିବାନର ନୈତିକତା ପୋଲିସ ଏବେ ପୁରୁଷମାନଙ୍କ କେଶ ଏବଂ ଦାଢ଼ିର ଲମ୍ବ ଉପରେ ମଧ୍ୟ ନଜର ରଖିଛି। ଜାତିସଂଘୟର ଏକ ରିପୋର୍ଟ ଅନୁଯାୟୀ, ପବିତ୍ର ରମଜାନ ମାସରେ ଅନେକ ଲୋକଙ୍କୁ ଅଟକ ରଖାଯାଇଥିଲା କାରଣ ସେମାନଙ୍କର କେଶ କିମ୍ବା ଦାଢ଼ି ତାଲିବାନ ଦ୍ୱାରା ନିର୍ଦ୍ଧାରିତ ମାନଦଣ୍ଡ ଅନୁଯାୟୀ ନଥିଲା। କେଶ କାଟିଥିବା ନାପିତମାନଙ୍କୁ ମଧ୍ୟ ଦଣ୍ଡ ଦିଆଯାଇଛି।

Advertisment

ଜାତିସଂଘର ଏକ ରିପୋର୍ଟ ଅନୁଯାୟୀ, ଆଫଗାନିସ୍ତାନରେ ତାଲିବାନ ନୈତିକତା ପୁଲିସ ଗତ ଛଅ ମାସରେ "ଅଣ-ଇସଲାମିକ" ଭାବେ କେଶ କାଟିବା ଏବଂ ଦାଢ଼ି ରଖିବା ପାଇଁ ଶହ ଶହ ଲୋକଙ୍କୁ ଅଟକ ରଖିଛି। ଏହି ନିୟମ ଅନୁଯାୟୀ, କେବଳ ସାଧାରଣ ଲୋକ ନୁହେଁ ବରଂ ନାପିତ ଏବଂ କେଶ କାଟୁଥିବା ବ୍ୟବସାୟୀଙ୍କୁ ମଧ୍ୟ ଟାର୍ଗେଟ କରାଯାଇଛି।

ଅଭିଯୋଗ ହୋଇଛି ଯେ, ଏହି ଗିରଫଦାରୀଗୁଡ଼ିକ ମଧ୍ୟରୁ ଅନେକରେ କୌଣସି ଆଇନଗତ ପ୍ରକ୍ରିୟା ଅନୁସରଣ କରାଯାଇ ନଥିଲା କିମ୍ବା ପୁଲିସକୁ କୌଣସି ଅଧିକାର ଦିଆଯାଇ ନଥିଲା। ଧରାପଡ଼ିଥିବା ଅନେକଙ୍କୁ ସର୍ବସାଧାରଣରେ ଚାବୁକ ମାଡ଼ କରାଯାଇଥିଲା।

ରମଜାନ ମାସରେ, ତାଲିବାନ କର୍ତ୍ତୃପକ୍ଷ ମସଜିଦରେ ବାଧ୍ୟତାମୂଳକ ଭାବେ ନମାଜ ପାଠ କରୁ ନଥିବା ଲୋକଙ୍କୁ ମଧ୍ୟ ଜେଲ୍ ପଠାଇଥିଲେ। ରିପୋର୍ଟ ଅନୁଯାୟୀ, କୌଣସି ପୂର୍ବ ଚେତାବନୀ କିମ୍ବା ପ୍ରକ୍ରିୟା ବିନା ଏହି ଗିରଫଦାରୀ କରାଯାଇଥିଲା। ତାଲିବାନ ଏଭଳି କାର୍ଯ୍ୟକୁ ଇସଲାମିକ ସମାଜକୁ ନଷ୍ଟ କରାଯାଉଥିବା ବୋଲି କହୁଛି। କିନ୍ତୁ ଏହା ସିଧାସଳଖ ସାଧାରଣ ନାଗରିକଙ୍କ ସ୍ୱାଧୀନତା ଏବଂ ଜୀବନଶୈଳୀକୁ ପ୍ରଭାବିତ କରୁଛି।

ରିପୋର୍ଟରେ କୁହାଯାଇଛି ଯେ, ତାଲିବାନର ଏହି କଠୋର ନିୟମର ସବୁଠାରୁ ଅଧିକ ପ୍ରଭାବ ଛୋଟ ବ୍ୟବସାୟୀଙ୍କ ଉପରେ ପଡ଼ିଛି। ନାପିତ, ଦର୍ଜୀ, ଘରୋଇ ଶିକ୍ଷାନୁଷ୍ଠାନ, କ୍ୟାଟରିଂ ଏବଂ ରେଷ୍ଟୁରାଣ୍ଟ ଭଳି ବ୍ୟବସାୟ ବନ୍ଦ ହୋଇଯାଇଛି କିମ୍ବା ସେମାନଙ୍କର ଆୟ ବହୁ ପରିମାଣରେ ହ୍ରାସ ପାଇଛି। ଏହା ଦେଶର ପୂର୍ବରୁ ସମସ୍ୟାଗ୍ରସ୍ତ ଅର୍ଥନୀତିକୁ ଆହୁରି ଖରାପ କରିଦେଇଛି। ବିଶ୍ୱ ବ୍ୟାଙ୍କର ଏକ ଅଧ୍ୟୟନ ଆକଳନ କରିଛି ଯେ, ମହିଳାମାନଙ୍କ କାମ ଏବଂ ଶିକ୍ଷା ଉପରେ ପ୍ରତିବନ୍ଧକ ଯୋଗୁ ଆଫଗାନିସ୍ତାନ ପ୍ରତିବର୍ଷ ୧.୪ ବିଲିୟନ ଡଲାର ପର୍ଯ୍ୟନ୍ତ କ୍ଷତି ସହିବ।

ଅଧିକ ପଢ଼ନ୍ତୁ: ଲାଲକିଲ୍ଲା-ଜାମା ମସଜିଦକୁ ବୋମାରେ ଉଡ଼ାଇଦେବାକୁ ଧମକ: ଗୁଇନ୍ଦା ବିଭାଗ ସଜାଗ

ତାଲିବାନ କହିଛି ଯେ, ସମାଜରୁ 'ଦୁର୍ନୀତି' ଏବଂ 'ଭୁଲ ପରମ୍ପରା' ଦୂର କରିବା ପାଇଁ ସେମାନେ ଏହି ପଦକ୍ଷେପ ନେଇଛନ୍ତି। ତାଲିବାନର ସର୍ବୋଚ୍ଚ ନେତା ହିବାତୁଲ୍ଲାହ ଆଖୁନ୍ଦଜାଦା ଇଦ୍-ଉଲ୍-ଫିତର ଅବସରରେ ଏକ ବାର୍ତ୍ତାରେ କହିଛନ୍ତି ଯେ, ଭବିଷ୍ୟତ ପିଢ଼ିକୁ 'ଭୁଲ ବିଶ୍ୱାସ' ଏବଂ 'ଅନୈତିକ ଜୀବନଶୈଳୀ'ରୁ ରକ୍ଷା କରିବା ପାଇଁ ଇସଲାମିକ ଆଇନ ପାଳନ କରିବା ଆବଶ୍ୟକ। କିନ୍ତୁ ଜାତିସଂଘ ଏବଂ ବିଶ୍ୱସ୍ତରୀୟ ପ୍ରତିଷ୍ଠାନଗୁଡ଼ିକ ଏହାକୁ ଆଫଗାନ ସମାଜ ଉପରେ ଚାପ ଏବଂ ଦମନର ଏକ ପଦକ୍ଷେପ ବୋଲି ବିବେଚନା କରୁଛନ୍ତି।

ସୂଚନାଯୋଗ୍ୟ,  ତାଲିବାନ ପୂର୍ବରୁ ମହିଳାଙ୍କ ଶିକ୍ଷା, ନିଯୁକ୍ତି ଏବଂ ସାର୍ବଜନୀନ ମୁହଁ ପ୍ରଦର୍ଶନକୁ  ନିଷେଧ କରିସାରିଛି। ଏବେ ପୁରୁଷମାନଙ୍କ ଉପରେ ମଧ୍ୟ ସାମାଜିକ ଏବଂ ଧାର୍ମିକ ଚାପ ବୃଦ୍ଧି ପାଉଛି। ଜାତିସଂଘ କହିଛି ଯେ, ଏସବୁ ଆଫଗାନ ସମାଜ ପାଇଁ ଏକ 'ଚିନ୍ତାଜନକ ଭବିଷ୍ୟତ' ଆଡ଼କୁ ଇଙ୍ଗିତ କରୁଛି, ଯେଉଁଠାରେ ବ୍ୟକ୍ତିଗତ ସ୍ୱାଧୀନତାର କୌଣସି ସ୍ଥାନ ରହିବ ନାହିଁ।

ଅଧିକ ପଢ଼ନ୍ତୁ: 'ନୀତିଶ କୁମାରଙ୍କୁ କରାଯାଉ ଉପପ୍ରଧାନମନ୍ତ୍ରୀ'

afghanistan | taliban