ଇସ୍ରାଏଲୀ ବନ୍ଧକଙ୍କ ମୁକ୍ତିକୁ ହମାସ ବନ୍ଦ କଲା

ତେଲ ଅଭିଭ: ଗାଜା ଅସ୍ତ୍ରବିରତି ଅନ୍ତର୍ଗତ ଇସ୍ରାଏଲ ସହିତ ବନ୍ଧକ ବିନିମୟକୁ ହମାସ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖିଛି। ହମାସ ବନ୍ଧକଙ୍କ ମୁକ୍ତିକୁ ସ୍ଥଗିତ ରଖିବା ଉପରେ ଇସ୍ରାଏଲ ଏବଂ ଆମେରିକା ଅସନ୍ତୋଷ ପ୍ରକାଶ କରିଛନ୍ତି। ହମାସ କହିଛି ଯେ, ଇସ୍ରାଏଲ ଅସ୍ତ୍ରବିରତି ଚୁକ୍ତି ପାଳନ କରିନାହିଁ। ଏହି କାରଣରୁ, ଶନିବାର, ୧୫ ଫେବ୍ରୁଆରିରେ ହେବାକୁ ଥିବା ବନ୍ଧକ ବିନିମୟକୁ ସ୍ଥଗିତ ରଖାଯାଇଛି।

ଏହା ଉପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଚେତାବନୀ ଦେଇ କହିଛନ୍ତି, ଯଦି ଶନିବାର ମଧ୍ୟାହ୍ନ ସୁଦ୍ଧା ସମସ୍ତ ବନ୍ଧକଙ୍କୁ ମୁକ୍ତ କରା ନଯାଏ, ତେବେ ହମାସ ବଡ଼ କ୍ଷତି ପାଇଁ ପ୍ରସ୍ତୁତ ରହିବ। ବିଶେଷଜ୍ଞମାନେ କହିଛନ୍ତି, ବେଞ୍ଜାମିନ୍ ନେତାନ୍ୟାହୁ ଟ୍ରମ୍ପଙ୍କ ମତକୁ ପସନ୍ଦ କରିଛନ୍ତି।

ଫାର୍ଷ୍ଟପୋଷ୍ଟ ରିପୋର୍ଟ ଅନୁଯାୟୀ, ଜାନୁଆରି ୧୯ ତାରିଖରେ ହମାସ ଏବଂ ଇସ୍ରାଏଲ ମଧ୍ୟରେ ଯୁଦ୍ଧବିରତି ଘୋଷଣା କରାଯାଇଥିଲା। ସେବେଠାରୁ, ଏପର୍ଯ୍ୟନ୍ତ ପାଞ୍ଚଥର  ବନ୍ଧକ ବିନିମୟ  ହୋଇସାରିଛି। ପରବର୍ତ୍ତୀ ଅଦଳବଦଳ ଫେବ୍ରୁଆରି ୧୫ରେ ହେବାର ଥିଲା, ଯାହାକୁ ସ୍ଥଗିତ ରଖାଯାଇଛି। ଏହା ସମ୍ପୂର୍ଣ୍ଣ ଯୁଦ୍ଧବିରତି ଚୁକ୍ତିନାମାକୁ ବିପଦରେ ପକାଇଛି। ହମାସର ଏହି ପଦକ୍ଷେପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ କ୍ଷୁବ୍ଧ। ସେ କହିଛନ୍ତି ଯଦି ଶନିବାର ଦିନ ୧୨ଟା ସୁଦ୍ଧା ସମସ୍ତ ବନ୍ଧକଙ୍କୁ ମୁକ୍ତ କରା ନଯାଏ, ତେବେ ଚୁକ୍ତିନାମା ବାତିଲ କରାଯିବ। 

ହମାସ ଏହା ମଧ୍ୟ କହିଛି ଯେ, ବନ୍ଧକ ମୁକ୍ତ ଯୋଜନା ଆଗକୁ ବଢ଼ିବାର ସୁଯୋଗ ଏବେ ବି ରହିଛି। ହମାସର ଏହି ପଦକ୍ଷେପକୁ ଇସ୍ରାଏଲ ଉପରେ ଚାପ ପକାଇବାର ଏକ ପ୍ରୟାସ ଭାବରେ ଦେଖାଯାଉଛି। ହମାସର ଘୋଷଣା ବନ୍ଧକଙ୍କ ପରିବାର ମଧ୍ୟରେ ଚିନ୍ତା ସୃଷ୍ଟି କରିଛି। ବନ୍ଧକଙ୍କ ପରିବାରବର୍ଗ ଚୁକ୍ତିକୁ ବଞ୍ଚାଇବା ପାଇଁ ମଧ୍ୟସ୍ଥତା କରୁଥିବା ଦେଶଗୁଡ଼ିକୁ ଅନୁରୋଧ କରିଛନ୍ତି।

ହମାସର ଓବୈଦା ଅନୁଯାୟୀ, ଗାଜା ଅସ୍ତ୍ରବିରତିର ଅଂଶ ଭାବରେ ଇସ୍ରାଏଲ ଏହାର ଅନେକ ଦାୟିତ୍ୱ ପୂରଣ କରିନାହିଁ। ଗତ ତିନି ସପ୍ତାହ ଧରି, ଆମେ ଏହି ଉଲ୍ଲଂଘନ ଏବଂ ଚୁକ୍ତିନାମାର ସର୍ତ୍ତାବଳୀ ପାଳନ ନକରିବା ଉପରେ ନଜର ରଖିଛୁ। ଏଥିରେ ଉତ୍ତର ଗାଜାକୁ ବିସ୍ଥାପିତ ଲୋକଙ୍କ ପ୍ରତ୍ୟାବର୍ତ୍ତନରେ ବିଳମ୍ବ କରିବା, ଗୁଳିଚାଳନା ବନ୍ଦ କରିବା ଏବଂ ମାନବିକ ସହାୟତାକୁ ଅବରୋଧ କରିବା ଅନ୍ତର୍ଭୁକ୍ତ।

ହମାସର ବନ୍ଧକ ମୁକ୍ତକୁ ବାଧା ଦେବା ପରେ, ଇସ୍ରାଏଲୀ ପ୍ରତିରକ୍ଷା ମନ୍ତ୍ରୀ କାଟ୍‌ଜ କହିଛନ୍ତି ଯେ, ସେ ତାଙ୍କ ସେନାକୁ ଗାଜାରେ ଯେକୌଣସି ସମ୍ଭାବ୍ୟ ପରିସ୍ଥିତି ପାଇଁ ପ୍ରସ୍ତୁତ ରହିବାକୁ କହିଛନ୍ତି। ସେନା ସାମରିକ ଛୁଟିକୁ ସ୍ଥଗିତ ରଖିଛି, ଏହା ଏକ ସଙ୍କେତ ଯେ, ଇସ୍ରାଏଲୀ ଅଧିକାରୀମାନେ ପୁଣି ଥରେ ଯୁଦ୍ଧ ପାଇଁ ପ୍ରସ୍ତୁତି କରୁଛନ୍ତି।

ହମାସର ବନ୍ଧକ ବିନିମୟକୁ ଅବରୋଧ କରିବା ପଦକ୍ଷେପ ପୂର୍ବରୁ ଦୁର୍ବଳ ଥିବା ଅସ୍ତ୍ରବିରତିକୁ ଭଙ୍ଗ କରିପାରେ। ଇଜିପ୍ଟ ସୁରକ୍ଷା ସୂତ୍ର କହିଛନ୍ତି ଯେ, ମଧ୍ୟସ୍ଥିମାନେ ଚୁକ୍ତିନାମା ଭାଙ୍ଗିପାରେ ବୋଲି ଆଶଙ୍କା କରିଥିଲେ। ଟ୍ରମ୍ପ ଏବଂ ନେତାନ୍ୟାହୁଙ୍କ ପୂର୍ବ ମନ୍ତବ୍ୟ ଚୁକ୍ତିକୁ ବିପଦରେ ପକାଇଛି ବୋଲି କାତାର ପୂର୍ବରୁ ଚେତାବନୀ ଦେଇଥିଲା। କାତାର ମଧ୍ୟସ୍ଥିମାନେ ମଧ୍ୟ ଇସ୍ରାଏଲ ନିକଟରେ ସେମାନଙ୍କର ଅସନ୍ତୋଷ ପ୍ରକାଶ କରିଛନ୍ତି।

ଅଧିକ ପଢ଼ନ୍ତୁ: ବିବାହ ବିଚ୍ଛେଦ ରୋକିବାକୁ ପଦକ୍ଷେପ ନେବେ ରାଜ୍ୟ ସରକାର: ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା

କ୍ୱିନ୍ସି ଇନଷ୍ଟିଚ୍ୟୁଟ୍ ଫର୍ ରେସପନ୍ସିବଲ୍ ଷ୍ଟେଟକ୍ରାଫ୍ଟର ଡେପୁଟି ଡାଇରେକ୍ଟର ଆଡାମ ୱେନଷ୍ଟାଇନ୍ ଅଲ ଜଜିରାକୁ କହିଛନ୍ତି, ହମାସର ବନ୍ଧକ ବିନିମୟକୁ ବିଳମ୍ବ କରିବାର ନିଷ୍ପତ୍ତିର ପ୍ରତିକ୍ରିୟାରେ ଟ୍ରମ୍ପଙ୍କ ବିବୃତି ନେତାନ୍ୟାହୁଙ୍କ ପାଇଁ ଆଶ୍ୱସ୍ତିଦାୟକ। ଏହି ସମୟରେ, ଇସ୍ରାଏଲର ରାସ୍ତାରେ ପ୍ରତିବାଦ ହୋଇଛି। ପ୍ରତିବାଦକାରୀମାନେ ନେତାନ୍ୟାହୁଙ୍କ ବିରୋଧରେ ଚୁକ୍ତିନାମାକୁ ଭଣ୍ଡୁର କରିବାର ଅଭିଯୋଗ ଆଣିଛନ୍ତି।

ଅଧିକ ପଢ଼ନ୍ତୁ: ସ୍କୁଲ ଶୌଚାଳୟରୁ ଆପତ୍ତିଜନକ ଅବସ୍ଥାରେ ଧରାପଡ଼ିବା ପରେ ଶିକ୍ଷକ ଦେଲେ ଏଭଳି ପ୍ରତିକ୍ରିୟା