ଗାଜାକୁ ଇସ୍ରାଏଲ୍‌ ସେନାର କବରସ୍ତାନରେ ପରିଣତ କରିବା ଲାଗି ପ୍ରତିଜ୍ଞା କଲା ହମାସ୍‌

ନୂଆଦିଲ୍ଲୀ: ଆଗାମୀ ଦିନମାନଙ୍କରେ କେତେକ ବିଦେଶୀ ପଣବନ୍ଦୀଙ୍କୁ ମୁକ୍ତ କରିବା ସହିତ ଗାଜାକୁ ଇସ୍ରାଏଲ୍‌ ସେନା ପାଇଁ କବରସ୍ତାନରେ ପରିଣତ କରିବ ବୋଲି ମଙ୍ଗଳବାର ଦିନ ହମାସ୍‌ର ସଶସ୍ତ୍ର ସଙ୍ଗଠନ କହିଛି।

ହମାସ୍‌ର ସଶସ୍ତ୍ର ସଙ୍ଗଠନ ‘ଏଜେଦାଇନ୍‌ ଅଲ୍‌-କସମ୍‌ ବ୍ରିଗେଡ୍‌ସ୍‌’ର ମୁଖପାତ୍ର ଆବୁ ଓବୈଦା ଟେଲିଭିଜନ୍‌ରେ ପ୍ରସାରିତ ଉଦ୍‌ବୋଧନରେ କହିଛନ୍ତି, ଆଗାମୀ ଅଳ୍ପ କିଛି ଦିନ ମଧ୍ୟରେ ଆମେ ନିର୍ଦ୍ଦିଷ୍ଟ ସଂଖ୍ୟକ ବିଦେଶୀ ପଣବନ୍ଦୀଙ୍କୁ ମୁକ୍ତ କରିବୁ ବୋଲି ମଧ୍ୟସ୍ଥମାନଙ୍କୁ ସୂଚାଇ ଦେଇଛୁ।

ସୂଚନାଯୋଗ୍ୟ, ଅକ୍ଟୋବର ୭ ତାରିଖରେ ଦକ୍ଷିଣ ଇସ୍ରାଏଲ୍‌ରେ ସଂଘବଦ୍ଧ ଆକ୍ରମଣ କରିଥିବା ହମାସ୍‌ ସମ୍ପ୍ରତି ଗାଜାରେ ପ୍ରାୟ ୨୪୦ଜଣଙ୍କୁ ପଣବନ୍ଦୀ ରଖିଥିବା ମନେ କରାଯାଉଛି। ଇସ୍ରାଏଲ୍‌ ଅଭିଯାନରେ ଜଣେ ଓ ପରୋକ୍ଷ କୂଟନୈତିକ ବୁଝାମଣା ଜରିଆରେ ୪ଜଣଙ୍କୁ ମିଶାଇ ଆଜି ପର୍ଯ୍ୟନ୍ତ ୫ଜଣ ପଣବନ୍ଦୀଙ୍କୁ ମୁକ୍ତ କରାଯାଇଛି।

News18

ଜାଗାର ଉତ୍ତର ପ୍ରାନ୍ତରେ ଇସ୍ରାଏଲ୍‌ ସେନା ଓ ହମାସ୍‌ ଆତଙ୍କବାଦୀମାନେ ଭୟବହ ଯୁଦ୍ଧରେ ଅବତୀର୍ଣ୍ଣ ହେବା ଏବଂ ଗାଜାରେ ରକ୍ତପାତ ଓ ମାନବିକ ସଙ୍କଟ ବୃଦ୍ଧି ପାଉଥିବା କଥା ଆନ୍ତର୍ଜାତିକ ସମୂହ ସତର୍କବାଣୀ ଶୁଣାଇବାରୁ ଓବୈଦା କହିଛନ୍ତି, ଶତ୍ରୁ ଓ ତା’ର ସୈନ୍ୟ ଓ ତା’ର ରାଜନୈତିକ ଓ ସାମରିକ ନେତୃତ୍ବ ଲାଗି ଗାଜା କବରସ୍ତାନ ହେବ।

ହମାସ୍‌ ପରିଚାଳିତ ଗାଜାର ସ୍ବାସ୍ଥ୍ୟ ମନ୍ତ୍ରାଳୟ କହିଛି ଇସ୍ରାଏଲ୍‌ ଆକ୍ରମଣରେ ୮,୫୨୫ଜଣ ମୃତ୍ୟୁବରଣ କରିଛନ୍ତି। ସେମାନଙ୍କ ମଧ୍ୟରେ ଅଛନ୍ତି ୩, ୫୦୦ରୁ ଅଧିକ ପିଲା। ଅନ୍ୟମାନଙ୍କ ମଧ୍ୟରେ ଅଛନ୍ତି ମୁଖ୍ୟତଃ ସାଧାରଣ ନାଗରିକ।