ହନୁମାନ ଚାଳିଶା ବିବାଦ: ଜେଲ୍‌ରେ ରହିବେ ସାଂସଦ ନବନୀତ ରାଣା, ଆଗାମୀକାଲି ଅପରାହ୍ଣ ୩ଟାରେ ହୋଇପାରେ ଜାମିନ ଶୁଣାଣି

ମୁମ୍ବାଇ: ସ୍ବାଧୀନ ସାଂସଦ ନବନୀତ ରାଣା ଏବଂ ତାଙ୍କ ବିଧାୟକ ସ୍ବାମୀ ରବି ରାଣାଙ୍କର ଜାମିନ ଆବେଦନ ଶୁଣାଣି ଲାଗି ମୁମ୍ବାଇର ଏକ ସେସନ୍‌ କୋର୍ଟ ଆଜି ଆଉ ଏକ ତାରିଖ ଧାର୍ଯ୍ୟ କରିଛନ୍ତି। ଆଗାମୀକାଲି ଅପରାହ୍ଣ ୨.୪୫ରେ ଉଭୟଙ୍କ ଆବେଦନ ଉପରେ ଶୁଣାଣି ହୋଇପାରେ ବୋଲି ସେସନ୍‌ କୋର୍ଟ କହିଛନ୍ତି। ତେଣୁ, ସେପର୍ଯ୍ୟନ୍ତ ରାଣା ଦମ୍ପତି ଜେଲ୍‌ରେ ରହିବେ।

ଆଡ୍‌ଭୋକେଟ୍‌ ଆବାଦ ପୋଣ୍ଡା ସେସନ୍‌ କୋର୍ଟରେ ହାଜର ହୋଇ ରାଣା ଦମ୍ପତିଙ୍କ ଜାମିନ ଆବେଦନ ଦାଖଲ କରିଥିଲେ। ଶନିବାର ଦିନ ଶୁଣାଣି ବେଳେ ସେ ତାଙ୍କର ଯୁକ୍ତି ଉପସ୍ଥାପନ କରିବେ ବୋଲି ଅଦାଲତ ତାଙ୍କୁ କହିଛନ୍ତି। ଶନିବାର ଅପରାହ୍ଣ ୩ଟାରେ ତର୍କ ଆରମ୍ଭ ହେବ ବୋଲି ଅଦାଲତ ସମୟ ଧାର୍ଯ୍ୟ କରିଛନ୍ତି।

Image Courtesy of Times Now

ସେମାନଙ୍କ ବିରୋଧରେ କାହିଁକି ଦେଶଦ୍ରୋହ ଅଭିଯୋଗ କରାଯାଇଛି ବୋଲି ଜାମିନ ଆବେଦନରେ ରାଣା ଦମ୍ପତି ପଚାରିଛନ୍ତି। କିନ୍ତୁ, ସରକାର କହିଛନ୍ତି ଯେ, ମହାରାଷ୍ଟ୍ରର ମୁଖ୍ୟମନ୍ତ୍ରୀ ଉଦ୍ଧବ ଠାକ୍‌ରେଙ୍କ ବାସଭବନ ସାମ୍ନାରେ ରାଣା ଦମ୍ପତି ଆଇନଶୃଙ୍ଖଳା ପରିସ୍ଥିତି ସୃଷ୍ଟି କରିବାକୁ ଉଦ୍ୟମ କରିଥିଲେ।

ସ୍ମରଣଯୋଗ୍ୟ, ମହାରାଷ୍ଟ୍ରର ମୁଖ୍ୟମନ୍ତ୍ରୀ ଉଦ୍ଧବ ଠାକ୍‌ରେଙ୍କ ବାନ୍ଦ୍ରାସ୍ଥିତ ବ୍ୟକ୍ତିଗତ ବାସଭବନ ‘ମାତୋଶ୍ରୀ’ ସମ୍ମୁଖରେ ‘ହନୁମାନ ଚାଳିଶା’ ପାଠ କରିବେ ବୋଲି ସର୍ବସାଧାରଣରେ ଘୋଷଣା କରିବା ପରେ ଏପ୍ରିଲ୍‌ ୨୩ ତାରିଖରେ ଦୁହିଁଙ୍କୁ ଗିରଫ କରାଯାଇଥିଲା।