ବିମାନ ଟିକେଟ ମହଙ୍ଗା ହେବା ପଛରେ ଏହି ରାଜ୍ୟମାନେ ଦାୟୀ: ପେଟ୍ରୋଲିୟମ ମନ୍ତ୍ରୀ ହରଦୀପ ସିଂ ପୁରୀ

ନୂଆଦିଲ୍ଲୀ: ପେଟ୍ରୋଲ୍ ଓ ଡିଜେଲ୍ ଉପରୁ ମୂଲ୍ୟଯୁକ୍ତ ଟିକସ (ଭାଟ୍‌) ହ୍ରାସ କରିବାକୁ ଅଣବିଜେପି ରାଜ୍ୟମାନଙ୍କୁ ମୋଦୀ ସରକାର ପରାମର୍ଶ ଦେବାର ଦିନକ ପରେ ଆଜି ପୂର୍ବତନ ବେସାମରିକ ବିମାନ ଚଳାଚଳ ମନ୍ତ୍ରୀ ତଥା ବର୍ତ୍ତମାନ ପେଟ୍ରୋଲିୟମ ମନ୍ତ୍ରୀ ଥିବା ହରଦୀପ ସିଂ ପୁରୀ ବିମାନ ଟିକେଟ ମହଙ୍ଗାକୁ ନେଇ ଅଣ ବିଜେପି ରାଜ୍ୟମାନଙ୍କ ଉପରେ ଦୋଷ ଲଦିଛନ୍ତି | ସେ କହିଛନ୍ତି ଯେ ଦିଲ୍ଲୀ, ପଶ୍ଚିମବଙ୍ଗ ଏବଂ ମହାରାଷ୍ଟ୍ର ଭଳି ରାଜ୍ୟମାନେ ଏଭିଏସନ ଟର୍ବାଇନ ଫୁଏଲ ବା ବିମାନ ଇନ୍ଧନ (ଏଟିଏଫ) ଉପରେ ୨୫ ପ୍ରତିଶତ ଭାଟ୍ ଲାଗୁ କରିଛନ୍ତି । ଯେଉଁଥିପାଇଁ ବିମାନ ଟିକେଟ ମହଙ୍ଗା ହୋଇଯାଉଛି |

ହରଦୀପ ସିଂ ପୁରୀ ଟ୍ୱିଟ୍ କରି ଲେଖିଛନ୍ତି ଯେ ବିମାନ ଚଳାଚଳରେ ଏଟିଏଫ ମୂଲ୍ୟର ଚାଳିଶ ପ୍ରତିଶତ ରହିଥାଏ । ଯଦି ଏଟିଏଫ୍ ମହଙ୍ଗା ହୁଏ ତେବେ ବିମାନ ସେବା ଯୋଗାଉଥିବା କମ୍ପାନିମାନେ ଟିକେଟ୍ ମୂଲ୍ୟ ହ୍ରାସ କରିବେ ନାହିଁ |

କିନ୍ତୁ ମହାରାଷ୍ଟ୍ର, ଦିଲ୍ଲୀ ଏବଂ ପଶ୍ଚିମବଙ୍ଗ ଏଟିଏଫ ଉପରେ ୨୫ ପ୍ରତିଶତ ଭାଟ୍ ଆଦାୟ କରୁଛନ୍ତି। ସେ କହିଛନ୍ତି ଯେ ଅଣ-ବିଜେପି ଶାସିତ ରାଜ୍ୟ ତୁଳନାରେ ବିଜେପି ଶାସିତ ରାଜ୍ୟମାନଙ୍କରେ ଭାଟ୍ ବହୁତ କମ ନିଆଯାଉଛି | ଉତ୍ତରପ୍ରଦେଶ, ନାଗାଲାଣ୍ଡ ଏବଂ ଜମ୍ମୁକଶ୍ମୀରର ଉଦାହରଣ ଦେଇ ସେ କହିଛନ୍ତି ଯେ ଏଠାରେ ଏଟିଏଫ ଉପରେ ମାତ୍ର ୧ ପ୍ରତିଶତ ଭାଟ ଆଦାୟ କରାଯାଉଛି |