ଖଟ୍ଟର ସରକାରଙ୍କ ନିଷ୍ପତ୍ତି: ହରିୟାଣାରେ ଥିବା ଗାନ୍ଧୀ-ନେହେରୁ ପରିବାରର ସମ୍ପତ୍ତିର ହେବ ଯାଞ୍ଚ

ନୂଆଦିଲ୍ଲୀ: ଗାନ୍ଧୀ-ନେହେରୁ ପରିବାରର ସମ୍ପତ୍ତିର ଯାଞ୍ଚ ପାଇଁ ହରିୟାଣା ସରକାର ନିର୍ଦ୍ଦେଶ ଦେଇଛନ୍ତି। ରାଜ୍ୟର ମୁଖ୍ୟ ଶାସନ ସଚିବ କେଶନୀ ଆନନ୍ଦ ଆରୋରା ହରିୟାଣାର ସ୍ବାୟତ୍ତ ଶାସନ ସଂସ୍ଥାକୁ ସମ୍ପତ୍ତି ଯାଞ୍ଚ କରିବାକୁ ନିର୍ଦ୍ଦେଶ ଦେଇଛନ୍ତି। ଅଭିଯୋଗ ହୋଇଛି ଯେ ୨୦୦୫ ରୁ ୨୦୧୦ ମଧ୍ୟରେ ହରିୟାଣାରେ ଗାନ୍ଧୀ-ନେହେରୁ ପରିବାର ନାମରେ ଅନେକ ସମ୍ପତ୍ତି ସଂଗ୍ରହ କରାଯାଇଥିଲା।

୨୦୦୫ରୁ ୨୦୧୪ମଧ୍ୟରେ ହରିୟାଣାରେ ଭୁପେନ୍ଦ୍ର ସିଂ ହୁଡାଙ୍କ ସରକାର ଥିଲା। ଅଭିଯୋଗ ହୋଇଛି ଯେ, ଏହି ସମୟ ମଧ୍ୟରେ ଗାନ୍ଧୀ-ନେହେରୁ ପରିବାର ପାଇଁ ଏବଂ କଂଗ୍ରେସର ଅନେକ ଟ୍ରଷ୍ଟ ପାଇଁ ସମ୍ପତ୍ତି ସଂଗ୍ରହ କରାଯାଇଥିଲା। କିଛି ସମ୍ପତ୍ତିକୁ ନେଇ ପୂର୍ବରୁ ଅନୁସନ୍ଧାନ ଚାଲିଥିବା ଜଣା ପଡ଼ିଛି | ବର୍ତ୍ତମାନ କେନ୍ଦ୍ର ସରକାରଙ୍କ ଚିଠି ପରେ ଗାନ୍ଧୀ-ନେହେରୁ ପରିବାରର ଅବଶିଷ୍ଟ ସମ୍ପତ୍ତି ଯାଞ୍ଚ ପାଇଁ ନିର୍ଦ୍ଦେଶ ଦିଆଯାଇଛି।

କେନ୍ଦ୍ର ସରକାରଙ୍କ ତରଫରୁ ହରିୟାଣା ସରକାର ରାଜୀବ ଗାନ୍ଧୀ ଫାଉଣ୍ଡେସନ, ରାଜୀବ ଗାନ୍ଧୀ ଚାରିଟେବୁଲ ଟ୍ରଷ୍ଟ ଏବଂ ଇନ୍ଦିରା ଗାନ୍ଧୀ ମେମୋରିଆଲ ଟ୍ରଷ୍ଟ ସହ ଜଡିତ ସମ୍ପତ୍ତି ଯାଞ୍ଚ କରିବାକୁ ନିର୍ଦ୍ଦେଶ ଦିଆଯାଇଛି। ଏହା ପରେ ମୁଖ୍ୟ ଶାସନ ସଚିବ କେଶନୀ ଆନନ୍ଦ ଆରୋରା ସ୍ବାୟତ୍ତ ଶାସନ ସଂସ୍ଥାକୁ ତଦନ୍ତ ଦାୟିତ୍ବ ଦେଇଛନ୍ତି।

aajtak

ଚାଇନାର କମ୍ୟୁନିଷ୍ଟ ପାର୍ଟି ଏବଂ ପ୍ରଧାନମନ୍ତ୍ରୀଙ୍କ ରିଲିଫ ପାଣ୍ଠିରୁ ଦାନ ଦିଆ ଯିବାର ଖବର ସାମ୍ନାକୁ ଆସିବା ପରେ କେନ୍ଦ୍ର ସରକାର ଗାନ୍ଧୀ-ନେହେରୁ ପରିବାର ସହ ଜଡିତ ଟ୍ରଷ୍ଟ ଏବଂ ଫାଉଣ୍ଡେସନ ଉପରେ ତଦନ୍ତ ନିର୍ଦ୍ଦେଶ ଦେଇଥିଲେ। ରାଜୀବ ଗାନ୍ଧୀ ଫାଉଣ୍ଡେସନ, ରାଜୀବ ଗାନ୍ଧୀ ଚାରିଟେବୁଲ ଟ୍ରଷ୍ଟ ଏବଂ ଇନ୍ଦିରା ଗାନ୍ଧୀ ମେମୋରିଆଲ ଟ୍ରଷ୍ଟର ତଦନ୍ତ କରାଯିବ। ଏଥିପାଇଁ ଏକ କମିଟି ଗଠନ କରାଯାଇଛି।

ଏହି କମିଟି ରାଜୀବ ଗାନ୍ଧୀ ଫାଉଣ୍ଡେସନ, ରାଜୀବ ଗାନ୍ଧୀ ଚାରିଟେବୁଲ ଟ୍ରଷ୍ଟ ଏବଂ ଇନ୍ଦିରା ଗାନ୍ଧୀ ମେମୋରିଆଲ ଟ୍ରଷ୍ଟର ଯାଞ୍ଚ କରି ଅର୍ଥ ହେରଫେର ତଥା ବିଦେଶୀ ଦାନ ସମେତ ଅନେକ ଆଇନର ଉଲ୍ଲଂଘନ ଅଭିଯୋଗର ଯାଞ୍ଚ କରିବ। ଗୃହ ମନ୍ତ୍ରାଳୟର ମୁଖପାତ୍ରଙ୍କ ଅନୁଯାୟୀ, ଏହି ଟିମ୍ ପ୍ରବର୍ତ୍ତନ ନିର୍ଦ୍ଦେଶାଳୟର ଏକ ସ୍ୱତନ୍ତ୍ର ନିର୍ଦ୍ଦେଶକଙ୍କ ଦ୍ୱାରା ପରିଚାଳିତ ହେବ।