ମୋଦୀ ଓ ଶାହାଙ୍କ ବିରୋଧରେ ଆଗତ ନିର୍ବାଚନ ମାମଲାକୁ ଖାରଜ କଲେ ହାଇକୋର୍ଟ

ମୁମ୍ବାଇ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଗୃହମନ୍ତ୍ରୀ ଅମିତ ଶାହାଙ୍କୁ ଜନପ୍ରତିନିଧି (ଆରପି) ଆଇନ, ୧୯୫୧ ଅନୁଯାୟୀ ଅଯୋଗ୍ୟ ଘୋଷଣା କରିବାକୁ ଆଗତ ହୋଇଥିବା ଏକ ସମୀକ୍ଷା ଆବେଦନକୁ ବମ୍ବେ ହାଇକୋର୍ଟର ନାଗପୁର ବେଞ୍ଚ ଖାରଜ କରି ଦେଇଛନ୍ତି।

ଆବେଦନକାରୀ, ଓକିଲ ରାମ ଖୋବ୍ରାଗାଡେ ପୂର୍ବରୁ ଏହି ମାମଲାରେ ଏକ ରିଟ୍‌ ପିଟିସନ୍‌ ଦାଖଲ କରିଥିଲେ, ଯାହାକୁ ଗତ ବର୍ଷ ଅଗଷ୍ଟ ୬ରେ ହାଇକୋର୍ଟ ଖାରଜ କରି ଦେଇଥିଲେ।

ଏହି ଆବେଦନରେ ଆବେଦନକାରୀ ଦାବି କରିଥିଲେ ଯେ ମୋଦୀ ଏବଂ ଶାହାଙ୍କୁ ଜନପ୍ରତିନିଧି (ଆରପି) ଅଧିନିୟମର ଧାରା ୧୨୩ ଅନୁଯାୟୀ ସେମାନଙ୍କ ‘ଦୁର୍ନୀତିଗ୍ରସ୍ତ ଅଭ୍ୟାସ’ ପାଇଁ ଦୋଷୀ ସାବ୍ୟସ୍ତ କରାଯାଉ ଏବଂ ୨୦୧୯ ଲୋକସଭା ନିର୍ବାଚନ ସମୟରେ ଆଦର୍ଶ ଆଚରଣ ବିଧି ଉଲ୍ଲଂଘନ ଅଭିଯୋଗରେ ଅଯୋଗ୍ୟ ଘୋଷଣା କରାଯାଉ।

ପରେ ଆବେଦନକାରୀ ଏକ ସମୀକ୍ଷା ଆବେଦନ କରିଥିଲେ, ଯାହାକୁ ହାଇକୋର୍ଟ ଖାରଜ କରି ଦେଇଛନ୍ତି ଏବଂ ତାଙ୍କ ଉପରେ ୫୦୦ ଟଙ୍କା ଖର୍ଚ୍ଚ ଲାଗୁ କରଛନ୍ତି। ଯାହାକୁ ନାଗପୁରର ହାଇକୋର୍ଟ ଆଇନ ସେବା ସବ୍‌ କମିଟି ଆକାଉଣ୍ଟରେ ଜମା କରିବାକୁ ନିର୍ଦ୍ଦେଶ ଦିଆ ଯାଇଛି।

ଜଷ୍ଟିସ ସୁନୀଲ ଶୁକ୍ରେ ଏବଂ ଜଷ୍ଟିସ୍‌ ଅନିଲ କିଲୋରଙ୍କୁ ନେଇ ଗଠିତ ଏକ ଖଣ୍ଡପୀଠ ଏହି ଆବେଦନକୁ ଖାରଜ କରି ଦେଇଛନ୍ତି। ଆବେଦନକାରୀ କହିଥିଲେ ଯେ ତାଙ୍କ ଦ୍ୱାରା ଦାଖଲ କରାଯାଇଥିବା ଆବେଦନ ଏକ ନିର୍ବାଚନ ଆବେଦନ ନୁହେଁ, ବରଂ ପ୍ରଧାନମନ୍ତ୍ରୀ ମୋଦୀ ଏବଂ ଅନ୍ୟ ଉତ୍ତରଦାତାଙ୍କୁ ଅଯୋଗ୍ୟ ଘୋଷଣା କରିବାକୁ ଚାହୁଁଛି। ସେମାନେ ଦୁର୍ନୀତିଗ୍ରସ୍ତ ଅଭ୍ୟାସରେ ଲିପ୍ତ ଅଛନ୍ତି ଏବଂ ଏହା ମଧ୍ୟ ମୋଦୀ ଏବଂ ଅନ୍ୟ ଉତ୍ତରଦାତାଙ୍କ ବିରୋଧରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ନିର୍ବାଚନ ଆୟୋଗଙ୍କୁ ମାମଲା ସ୍ଥାନାନ୍ତର କରିବାକୁ ଚାହୁଁଛି।

ଅଦାଲତ କହିଥିଲେ ଯେ ଆବେଦନକାରୀ ଏପରି ଅଭିଯୋଗରେ ଉତ୍ତରଦାତାଙ୍କୁ ଅଯୋଗ୍ୟ ଘୋଷଣା କରିବାକୁ ଚାହୁଁଛନ୍ତି, ତାଙ୍କ ପାଇଁ ଉପଯୁକ୍ତ ପ୍ରତିକାର ଆରପି ଅଧିନିୟମର ଧାରା ୮୦ ଅନୁଯାୟୀ ହେବ। ବାସ୍ତବରେ, ଦୁର୍ନୀତିଗ୍ରସ୍ତ ଅଭ୍ୟାସରେ ଲିପ୍ତ ରହିବା ହେଉଛି ସେହି ଅଧିନିୟମର ଧାରା ୧୦୦ ଅନୁଯାୟୀ ନିର୍ବାଚନକୁ ଅସିଦ୍ଧ ଘୋଷଣା କରିବାକୁ ଚାହୁଁଥିବା ଜଣେ ଅସନ୍ତୁଷ୍ଟ ବ୍ୟକ୍ତିଙ୍କ ପାଇଁ ଉପଲବ୍ଧ ଏକ ଆଧାର। ଆବେଦନକାରୀ ଦାଖଲ କରିଥିବା ଆବେଦନରେ କହିଛନ୍ତି ଯେ ଉଭୟ ଉତ୍ତରଦାତାଙ୍କୁ ଦୁର୍ନୀତିଗ୍ରସ୍ତ ଅଭ୍ୟାସରେ ଲିପ୍ତ ଥିବା ଆଧାରରେ ଅଯୋଗ୍ୟ ଘୋଷଣା କରିବାର କ୍ଷମତା ଅଦାଲତର ଅଛି ଏବଂ ଏହି କ୍ଷମତା ଆରପି ଆଇନର ଧାରା ୯୯ ଅନୁଯାୟୀ ଅଦାଲତକୁ ପ୍ରଦାନ କରାଯାଇଛି। ତେବେ, ଏହି ଆଇନର ଧାରା ୯୯ ଏକ ନିର୍ବାଚନ ଆବେଦନ ସହିତ ଜଡିତ ହେବାକୁ ଥିବା ନିର୍ଦ୍ଦେଶର ପ୍ରକୃତି ସହିତ ଜଡିତ ବୋଲି ଦର୍ଶାଇ ମାମଲାକୁ ଖାରଜ କରିଛନ୍ତି ଅଦାଲତ।