ଜେଲ୍‌ରେ ରହି ଆତଙ୍କବାଦୀ ଲଖଭି ବାପା ହେଲେ କିପରି: ପାକିସ୍ତାନକୁ ଆଇନା ଦେଖାଇଲେ ଓୱାଇସି

ଆଲଜିଅର୍ସ: ଭାରତର ସାତଟି ସର୍ବଦଳୀୟ ପ୍ରତିନିଧି ଦଳ ୩୩ଟି ଦେଶର ରାଜଧାନୀ ଗସ୍ତ କରୁଛନ୍ତି। ଏହି ପ୍ରତିନିଧିମଣ୍ଡଳୀରେ ସାମିଲ ସମସ୍ତ ବ୍ୟକ୍ତି ବିଭିନ୍ନ ମଞ୍ଚରେ ଆତଙ୍କବାଦୀଙ୍କ ପାଇଁ ସୁରକ୍ଷିତ ସ୍ୱର୍ଗ ପାଲଟିଥିବା ପାକିସ୍ତାନ ଏବଂ ପ୍ରଧାନମନ୍ତ୍ରୀ ଶାହବାଜ ସରିଫଙ୍କ ନେତୃତ୍ୱାଧୀନ ସରକାରଙ୍କ ନୀତିର ପର୍ଦ୍ଦାଫାସ କରୁଛନ୍ତି। ଏହି ପରିପ୍ରେକ୍ଷୀରେ, ବିଜେପି ସାଂସଦ ବୈଜୟନ୍ତ ପଣ୍ଡାଙ୍କ ନେତୃତ୍ୱରେ ଏକ ସର୍ବଦଳୀୟ ପ୍ରତିନିଧି ଦଳ ଉତ୍ତର ଆଫ୍ରିକୀୟ ଦେଶ ଆଲଜେରିଆରେ ଅଛନ୍ତି।

ଦଳରେ ସାମିଲଥିବା ଏଆଇଏମଆଇଏମ ମୁଖ୍ୟ ଏବଂ ସାଂସଦ ଅସଦୁଦ୍ଦିନ ଓୱାଇସି କହିଛନ୍ତି ଯେ, ଭାରତ ଏବଂ ଆଲଜେରିଆ ନଭେମ୍ବର ୨୦୨୪ରେ ଏକ ପ୍ରତିରକ୍ଷା ବୁଝାମଣାପତ୍ର ସ୍ୱାକ୍ଷର କରିଛନ୍ତି। ମୁଁ ନିଶ୍ଚିତ ଯେ, ଏହା ବୁଝାମଣା ବୃଦ୍ଧି କରିବ ଏବଂ ଆମର ସମ୍ପର୍କକୁ ମଜବୁତ କରିବ। ଆଶା କରୁଛି ଆମର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଖୁବ୍ ଶୀଘ୍ର ଆଲଜେରିଆ ଗସ୍ତ କରିବେ। ଆଲଜେରିଆର ରାଷ୍ଟ୍ରପତି ଅବଦେଲମାଜିଦ୍ ଟେବବୁନ୍ ଭାରତ ଗସ୍ତରେ ଆସିବାର ଆଶା କରାଯାଉଛି। ଏହା ସଠିକ ଦିଗରେ ଏକ ବହୁତ ଭଲ ପଦକ୍ଷେପ ହେବ।

ବିଜେପି ସାଂସଦ ବୈଜୟନ୍ତ ପଣ୍ଡା କହିଛନ୍ତି ଯେ, ପାକିସ୍ତାନ ନିଜର ଆତଙ୍କବାଦୀ ତାଲିମ, ପାଣ୍ଠି ଏବଂ ଅସ୍ତ୍ର କାର୍ଯ୍ୟକ୍ରମକୁ ଲୁଚାଇବା ପାଇଁ  ପରମାଣୁ ଶକ୍ତି ବ୍ୟବହାର କରିଛି। ପାକିସ୍ତାନ ଆତଙ୍କବାଦୀମାନଙ୍କ ସହିତ ଖୋଲାଖୋଲି ଭାବରେ ଏହା କରୁଛି। ଏହା କେବଳ ମୁଁ କହୁନାହିଁ। ଆପଣମାନେ ଏହାକୁ ଇଣ୍ଟରନେଟରେ ଦେଖିପାରିବେ। ସମସ୍ତେ ଜାଣନ୍ତି ଯେ, ପାକିସ୍ତାନ ପୂର୍ବରୁ ଅନେକ ଥର ଏହା କରିଛି।

ଓସାମା ବିନ୍ ଲାଡେନଙ୍କ କ୍ଷେତ୍ରରେ ପାକିସ୍ତାନ ବର୍ଷ ବର୍ଷ ଧରି ମିଛ କହିଥିଲା। ଯେପର୍ଯ୍ୟନ୍ତ ଆମେରିକୀୟମାନେ ତାଙ୍କୁ ହତ୍ୟା କରି ନଥିଲେ। ପାକିସ୍ତାନରେ ୫୨ ଆତଙ୍କାବାଦୀ ସଂଗଠନର ସଦସ୍ୟ ଅଛନ୍ତି। ଜାତିସଂଘ ସୁରକ୍ଷା ପରିଷଦ ସଦସ୍ୟ ଥିବା ଆଲଜେରିଆ ପାକିସ୍ତାନରେ ଥିବା ଅନେକ ଆତଙ୍କବାଦୀ ସଂଗଠନ ଏବଂ ସଦସ୍ୟଙ୍କୁ ନିଷିଦ୍ଧ କରିଛି। ଆତଙ୍କବାଦୀ ସଂଗଠନ ଏବଂ ଆତଙ୍କବାଦୀ ପାକିସ୍ତାନରେ ଖୋଲାଖୋଲି ଭାବରେ କାର୍ଯ୍ୟ କରୁଛନ୍ତି।

ବିଜେପି ସାଂସଦ ନିଶିକାନ୍ତ ଦୁବେ କହିଛନ୍ତି ଯେ, ୧୯୭୨ ମସିହାରେ ଆମେ ୯୩,୦୦୦ ସୈନିକଙ୍କୁ ପାକିସ୍ତାନକୁ ଫେରାଇ ଦେଇଥିଲୁ, ତଥାପି ଆମର ୫୪ ଜଣ ସୈନିକ ପାକିସ୍ତାନ ଜେଲ୍‌ରେ ଅଛନ୍ତି। ପାକିସ୍ତାନ ଆଜି ପର୍ଯ୍ୟନ୍ତ ସେମାନଙ୍କୁ ଫେରାଇ ନାହିଁ। ୧୯୮୦ ମସିହାରୁ ପାକିସ୍ତାନ ପ୍ରତିରକ୍ଷା ପାଇଁ ଏହାର ବଜେଟର ୨୦-୨୫% ଖର୍ଚ୍ଚ କରୁଛି।

ଅଧିକ ପଢ଼ନ୍ତୁ: ଖାଲେଦା ଜିଆଙ୍କୁ ନେଇ ଭୟଭୀତ ୟୁନୁସ୍ ସରକାର

ଆଇଏମଏଫ, ସାଉଦି ଆରବ ଏବଂ ଆମେରିକା ସେମାନଙ୍କୁ ଋଣ ଦିଅନ୍ତି। ସେମାନଙ୍କ ଅର୍ଥନୀତିର ୮୦% କେବଳ ଋଣ ଉପରେ ନିର୍ଭରଶୀଳ। ସେମାନଙ୍କର ଅର୍ଥନୀତି ଏପରି ଅବସ୍ଥାରେ ଅଛି ଯେ, ଯେକୌଣସି ଦିନ ସେମାନେ ପରବର୍ତ୍ତୀ ସୋମାଲିଆ କିମ୍ବା ସୁଡାନ ହୋଇପାରନ୍ତି। ଯେକୌଣସି ଦେଶ ସେମାନଙ୍କୁ ସାହାଯ୍ୟ କଲେ ନିଜର ଟଙ୍କା ହିଁ ହରାଇବ।

ରାଜ୍ୟସଭା ସାଂସଦ ରେଖା ଶର୍ମା କହିଛନ୍ତି, ଏହା ପ୍ରଥମ ଥର ନୁହେଁ ଯେ, ଆମେ ଏପରି ଚ୍ୟାଲେଞ୍ଜର ସମ୍ମୁଖୀନ ହେଉଛୁ। ପାକିସ୍ତାନ ଏହା ବାରମ୍ବାର କରିଆସିଛି। କିନ୍ତୁ ଏଥର ଆମର ପ୍ରଧାନମନ୍ତ୍ରୀ କହିଛନ୍ତି, ଆମେ ଏହାକୁ ଆଗକୁ ବଢ଼ାଇବୁ ନାହିଁ। 

ଅଧିକ ପଢ଼ନ୍ତୁ: ଖୁସି ଖବର!: ପୁଣି କମିଲା ଏଲପିଜି ସିଲିଣ୍ଡରର ଦର, ଜୁନ୍ ୧ ରୁ ଲାଗୁ

asaduddin-owaisi