ଚଳିତ ଆର୍ଥିକ ବର୍ଷରେ ୧୪ ଲକ୍ଷ କୋଟି ଋଣ କରିବେ ସରକାର

ନୂଆଦିଲ୍ଲୀ: ଆୟ ଓ ବ୍ୟୟ ମଧ୍ୟରେ ଥିବା ନିଅଣ୍ଟକୁ ପୂରଣ କରିବା ପାଇଁ କେନ୍ଦ୍ର ସରକାର ୨୦୨୪-୨୫ ଆର୍ଥିକ ବର୍ଷର ଦ୍ୱିତୀୟାର୍ଦ୍ଧରେ ୬.୬୧ ଲକ୍ଷ କୋଟି ଟଙ୍କାର ଋଣ ସଂଗ୍ରହ କରିବେ। ଅର୍ଥ ମନ୍ତ୍ରଣାଳୟ ଘୋଷଣା କରିଛି ଯେ ସରକାର ବ୍ୟାଙ୍କିଂ କ୍ଷେତ୍ରର ନିୟାମକ ଭାରତୀୟ ରିଜର୍ଭ ବ୍ୟାଙ୍କ ସହଯୋଗରେ ଚଳିତ ଆର୍ଥିକ ବର୍ଷର ଦ୍ୱିତୀୟାର୍ଦ୍ଧ ପାଇଁ ଋଣ କାର୍ଯ୍ୟକ୍ରମ ଚୂଡ଼ାନ୍ତ କରିଛନ୍ତି। ସରକାର ୨୦୨୪-୨୫ ଆର୍ଥିକ ବର୍ଷ ପାଇଁ ସମୁଦାୟ ୧୪.୦୧ ଲକ୍ଷ କୋଟି ଟଙ୍କାର ଋଣ ସଂଗ୍ରହ କରିବାକୁ ଲକ୍ଷ୍ୟ ରଖିଛନ୍ତି, ଯେଉଁଥିରୁ ମୋଟ ଋଣର ୪୭.୨% ଅର୍ଥାତ୍ ୬.୬୧ ଲକ୍ଷ କୋଟି ଟଙ୍କା ଡେଟ୍ ସିକ୍ୟୁରିଟିଜ୍ ଜରିଆରେ ସଂଗ୍ରହ କରାଯିବ। ଏଥିରେ ୨୦ ହଜାର କୋଟି ଟଙ୍କାର ସାବରେନ୍ ଗ୍ରୀନ୍ ବଣ୍ଡ ମଧ୍ୟ ରହିଛି।

ଅର୍ଥ ମନ୍ତ୍ରଣାଳୟ କହିଛି ଯେ, ୨୧ଟି ସାପ୍ତାହିକ ନିଲାମ ମାଧ୍ୟମରେ ୬.୬୧ ଲକ୍ଷ କୋଟି ଟଙ୍କା ସଂଗ୍ରହ କରାଯିବ । ରିଜର୍ଭ ବ୍ୟାଙ୍କ ସହଯୋଗରେ ସରକାର ୩, ୫, ୭, ୧୦, ୧୫, ୩୦, ୪୦ ଓ ୫୦ ବର୍ଷର ସିକ୍ୟୁରିଟି ଜାରି କରିବେ। ତିନି ବର୍ଷର ଋଣର ପରିପକ୍ବତା ଅବଧିରେ ଅଂଶଗ୍ରହଣ ଅତି କମରେ ୫.୩% ରହିବ ଏବଂ ୧୦ ବର୍ଷର ପରିପକ୍ୱତା ଥିବା ସିକ୍ୟୁରିଟିର ଅଂଶ ସର୍ବାଧିକ ୨୪.୮% ରହିବ । ନିଲାମ ବିଜ୍ଞପ୍ତିରେ ଦର୍ଶାଯାଇଥିବା ପ୍ରତ୍ୟେକ ସୁରକ୍ଷା ପାଇଁ ଅତିରିକ୍ତ ୨,୦୦୦ କୋଟି ଟଙ୍କାର ସବସ୍କ୍ରିପସନ ରଖିବା ପାଇଁ ଏକ ଗ୍ରୀନ ସୁ ଅପସନ ଉପଲବ୍ଧ ହେବ ବୋଲି ମନ୍ତ୍ରଣାଳୟ କହିଛି।