ଅସ୍ତ୍ରାଗାରରୁ ବିପଜ୍ଜନକ କ୍ଷେପଣାସ୍ତ୍ର ବାହାର କଲା ଇରାନ

ତେହେରାନ: ଇରାନ ଇସ୍ରାଏଲ ବିପକ୍ଷ ସଂଘର୍ଷ ପାଇଁ ନିଜର ଅସ୍ତ୍ରାଗାରରୁ ବୁଧବାର ଦିନ ଫତେହ କ୍ଷେପଣାସ୍ତ୍ର ବାହାର କରିଛି। ଇସଲାମିକ୍ ରିଭୋଲ୍ୟୁସନାରୀ ଗାର୍ଡସ କର୍ପସ (ଆଇଆରଜିସି) ଘୋଷଣା କରିଛି ଯେ, ଅପରେସନ ଟ୍ରୁ ପ୍ରମିଜ୍-୩ ରେ ଫତେହ ହାଇପରସୋନିକ୍ କ୍ଷେପଣାସ୍ତ୍ର ବ୍ୟବହାର କରାଯାଇଛି। ଆଇଆରଜିସି କହିଛି ଯେ, ଏହି ବିପଜ୍ଜନକ କ୍ଷେପଣାସ୍ତ୍ର ସଫଳତାର ସହ ଇସ୍ରାଏଲ ବାୟୁ ପ୍ରତିରକ୍ଷା ଭେଦ କରି ଇସ୍ରାଏଲ ସମର୍ଥକମାନଙ୍କୁ ଏକ ବାର୍ତ୍ତା ପଠାଇଛି।

ଆଇଆରଜିସି ଏହି ଅଭିଯାନକୁ ଏକ ଟର୍ଣ୍ଣିଂ ପଏଣ୍ଟ ଭାବରେ ବର୍ଣ୍ଣନା କରି କହିଛି ଯେ, ଫତେହ କ୍ଷେପଣାସ୍ତ୍ରର ନିୟୋଜନ ଇସ୍ରାଏଲର ବାୟୁ ପ୍ରତିରକ୍ଷା ବ୍ୟବସ୍ଥାର ଅନ୍ତ ଘଟାଇବ। ଆଇଆରଜିସି କହିଛି ଯେ, ଶକ୍ତିଶାଳୀ ଫତେହ କ୍ଷେପଣାସ୍ତ୍ର ଇସ୍ରାଏଲୀ ଘାଟି ଉପରେ ଆକ୍ରମଣ କରିଛି, ଯାହା ତେଲ ଅଭିଭର ସହଯୋଗୀମାନଙ୍କୁ ଇରାନ ଶକ୍ତିର ସ୍ପଷ୍ଟ ବାର୍ତ୍ତା ଦେଇଛି।

ବିବୃତିରେ ଗୁରୁତ୍ୱାରୋପ କରାଯାଇଛି, କ୍ଷେପଣାସ୍ତ୍ର ଆକ୍ରମଣ ପ୍ରମାଣ କରିଛି ଯେ, ଇରାନ ଏବେ ଅଧିକୃତ ଅଞ୍ଚଳର ଆକାଶ ମାର୍ଗ ଉପରେ ସମ୍ପୂର୍ଣ୍ଣ ପ୍ରାଧାନ୍ୟ ବିସ୍ତାର କରିଛି ଏବଂ ଇରାନର ସଠିକ୍ ଆକ୍ରମଣ ଆଗରେ ଇସ୍ରାଏଲର ଲୋକମାନେ ସମ୍ପୂର୍ଣ୍ଣ ଅସହାୟ ହୋଇପଡ଼ିଛନ୍ତି।

ଫତେହର ଅର୍ଥ ହେଉଛି ଓପନର। ଏହାର ଲକ୍ଷ୍ୟଭେଦ କ୍ଷମତା ୧୪୦୦ କିଲୋମିଟର। ଏହାକୁ ୨୦୨୩ ଜୁନ୍‌ରେ ଇରାନ ସେନାରେ ସାମିଲ କରାଯାଇଥିଲା। ପୂର୍ବତନ ଆଇଆରଜିସି ଏରୋସ୍ପେସ୍ କମାଣ୍ଡର ବ୍ରିଗେଡିୟର ଜେନେରାଲ ଆମିର ଅଲି ହାଜିଜାଦେହ ୨୦୨୩ ମସିହାରେ ଏହାର ଉନ୍ମୋଚନ ଉତ୍ସବରେ ଏହି କ୍ଷେପଣାସ୍ତ୍ରକୁ ଏକ ବଡ଼ ସଫଳତା ବୋଲି ବର୍ଣ୍ଣନା କରିଥିଲେ। ଇରାନ

ପୂର୍ବରୁ କେବଳ ତିନୋଟି ଦେଶ ଏଭଳି ବିପଜ୍ଜନକ ହାଇପରସୋନିକ୍ କ୍ଷେପଣାସ୍ତ୍ର ତିଆରି କରିବାର ପ୍ରଯୁକ୍ତିବିଦ୍ୟା ହାସଲ କରିଥିଲେ। ସେସବୁ ଦେଶ ମଧ୍ୟରେ ରୁଷିଆ, ଚୀନ୍ ଏବଂ ଭାରତ ରହିଛନ୍ତି। ସେମାନଙ୍କର ମଡେଲ୍ ଲଞ୍ଚ ପ୍ଲାଟଫର୍ମ, ପରିସର, ପେଲୋଡ୍ ଏବଂ ହାଇପରସୋନିକ୍ ପ୍ରଯୁକ୍ତିବିଦ୍ୟାରେ ଭିନ୍ନ।

ନ୍ୟୁୟର୍କ ଟାଇମ୍ସ ଅନୁଯାୟୀ, ଇରାନ ୧ ଅକ୍ଟୋବର ୨୦୨୪ରେ ଇସ୍ରାଏଲ ଉପରେ ଆକ୍ରମଣରେ ମଧ୍ୟ ଏହି କ୍ଷେପଣାସ୍ତ୍ର ବ୍ୟବହାର କରିଥିଲା। ଏହା ଏକ ହାଇପରସୋନିକ୍ ମଧ୍ୟମ ଦୂରଗାମୀ ବାଲିଷ୍ଟିକ୍ କ୍ଷେପଣାସ୍ତ୍ର। ଏହାର ଓଜନ ୩୫୦ କିଲୋଗ୍ରାମରୁ ୪୫୦ କିଲୋଗ୍ରାମ ମଧ୍ୟରେ। ୧୨ ମିଟର ଲମ୍ବା ଏହି କ୍ଷେପଣାସ୍ତ୍ର ୨୦୦ କିଲୋଗ୍ରାମ ପର୍ଯ୍ୟନ୍ତ ବିସ୍ଫୋରକ ବହନ କରିବାକୁ ସକ୍ଷମ।

ଅଧିକ ପଢ଼ନ୍ତୁ: ଇରାନକୁ ବିରୁଦ୍ଧରେ ସାମରିକ ହସ୍ତକ୍ଷେପ ବିଷୟରେ ଚିନ୍ତା କଲେ ପରିଣାମ ଖରାପ ହେବ: ଆମେରିକାକୁ ହମାସର ଚେତାବନୀ

ଇସ୍ରାଏଲ ଏବଂ ଇରାନ ମଧ୍ୟରେ ଯୁଦ୍ଧ ଆହୁରି ତୀବ୍ର ହେବାରେ ଲାଗିଛି। ଇସ୍ରାଏଲ ଦାବି କରିଛି ଯେ, ଜଣେ ଶୀର୍ଷ ଇରାନୀ ଜେନେରାଲଙ୍କୁ ହତ୍ୟା କରାଯାଇଛି। ଏହି ସମୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ତେହେରାନର ନାଗରିକଙ୍କୁ ସହର ଖାଲି କରିବାକୁ ଚେତାବନୀ ଦେଇଛନ୍ତି ଏବଂ ଇରାନଠାରୁ ନିଃସର୍ତ୍ତ ଆତ୍ମସମର୍ପଣ ଦାବି କରିଛନ୍ତି। ଟ୍ରମ୍ପ୍ କହିଛନ୍ତି, ମୁଁ ଯୁଦ୍ଧବିରତି ଆଶା କରୁନାହିଁ। ଆମେ ଯୁଦ୍ଧବିରତି ଅପେକ୍ଷା ଭଲ କିଛି ଆଶା କରୁଛୁ।

ସେ କହିଛନ୍ତି, ଆମେରିକା ଏହି ସଂଘର୍ଷର ପ୍ରକୃତ ଅନ୍ତ ଦେଖିବାକୁ ଚାହୁଁଛି ଯେଉଁଥିରେ ଇରାନର 'ସମ୍ପୂର୍ଣ୍ଣ ଆତ୍ମସମର୍ପଣ' ଅନ୍ତର୍ଭୁକ୍ତ ହୋଇପାରେ। ସେ କହିଛନ୍ତି, ମୁଁ ଆଲୋଚନା କରିବାକୁ ଚାହୁଁନାହିଁ। ଏହି ସମୟରେ, ଇସ୍ରାଏଲ ଆଉ ଜଣେ ଶୀର୍ଷ ଇରାନୀ ସାମରିକ ଅଧିକାରୀ ଜେନେରାଲ ଅଲି ଶାଦମାନୀଙ୍କୁ ହତ୍ୟା କରିଥିବା ଦାବି କରିଛି। ପୂର୍ବରୁ ମଧ୍ୟ ଜଣେ ବରିଷ୍ଠ ଜେନେରାଲ ଗୁଲାମ ଅଲି ରସିଦ ଇସ୍ରାଏଲୀ ଆକ୍ରମଣରେ ପ୍ରାଣ ହରାଇଥିବା କୁହାଯାଉଛି।

ଅଧିକ ପଢ଼ନ୍ତୁ: ପାରିବାରିକ କଳହର କୁପରିଣତି: ସ୍ବାମୀକୁ ହତ୍ୟା କଲା ସ୍ତ୍ରୀ

 Israel Iran War