ଲକ୍ଷ ଲକ୍ଷ ଗାଜାବାସୀଙ୍କୁ ସ୍ଥାନାନ୍ତର ପାଇଁ ନିର୍ଦ୍ଦେଶ ଦେଲା ଇସ୍ରାଏଲ; ଲୋକଙ୍କୁ ଘର ଛାଡ଼ିବାକୁ ମନାକଲା ହମାସ

ନୂଆଦିଲ୍ଲୀ: ହମାସ ସହ ସଂଘର୍ଷ ଷଷ୍ଠ ଦିନରେ ପହଞ୍ଚିଥିବା ବେଳେ ଇସ୍ରାଏଲ ସେନା ଗାଜା ଉପତ୍ୟକା ଉପରେ ଆକ୍ରମଣ ଜାରି ରଖିଛି। ହମାସ ଆତଙ୍କବାଦୀମାନେ ୧୫୦ଜଣଙ୍କୁ ବନ୍ଧକ ରଖିଥିବା ବେଳେ ସେମାନଙ୍କୁ ମୁକ୍ତ ନକରିବା ପର୍ଯ୍ୟନ୍ତ ଇସ୍ରାଏଲ ଘେରାଉ ପ୍ରତ୍ୟାହାର କରିବ ନାହିଁ ବୋଲି କହିଛି।

ଇସ୍ରାଏଲ ସେନା ଶୁକ୍ରବାର ଉତ୍ତର ଗାଜାକୁ ୨୪ଘଣ୍ଟା ମଧ୍ୟରେ ଖାଲି କରିବାକୁ ନିର୍ଦ୍ଦେଶ ଦେଇଛି। ଏଠାରେ ୧.୧ ନିୟୁତ ଲୋକ ବସବାସ କରନ୍ତି। ଜାତିସଂଘ ମୁଖପାତ୍ର ଷ୍ଟିଫେନ୍‌ ଦୁଜାରିକ୍‌ କହିଛନ୍ତି ଯେ ଏକ ବିନାଶକାରୀ ମାନବିକ ପରିଣାମ ବିନା ଏପରି ଆଦେଶ ଅସମ୍ଭବ।

ଇସ୍ରାଏଲ ସେନାର ସ୍ଥାନାନ୍ତର ନିର୍ଦ୍ଦେଶ ପରେ ହମାସ ଶୁକ୍ରବାର ଗାଜା ଉପତ୍ୟକାର ବାସିନ୍ଦାଙ୍କୁ ଘରୁ ନ ବାହାରିବାକୁ କହିଛି। ଇସ୍ରାଏଲ ଦ୍ୱାରା ଆଶାତୀତ ସ୍ଥଳ ଆକ୍ରମଣରେ ଅଧିକ କ୍ଷୟକ୍ଷତି ହେବାର ଆଶଙ୍କା ରହିଛି। ଗାଜା ଉପତ୍ୟକାରେ ନିଜର ଆକ୍ରମଣକୁ ସମର୍ଥନ ବଢ଼ାଇବା ପାଇଁ ଇସ୍ରାଏଲ ଆମେରିକାର ବୈଦେଶିକ ସଚିବ ଆଣ୍ଟୋନି ବ୍ଲିଙ୍କେନ ଏବଂ ନାଟୋ ପ୍ରତିରକ୍ଷା ମନ୍ତ୍ରୀଙ୍କୁ ମୃତ ଶିଶୁ ଏବଂ ସାଧାରଣ ନାଗରିକଙ୍କ ଉପରେ ହୋଇଥିବା ବର୍ବରୋଚିତ ଆକ୍ରମଣର ଫଟୋ ଦେଖାଇ କହିଛି ଯେ ସେମାନେ ହମାସ ଦ୍ୱାରା ନିହତ ହୋଇଛନ୍ତି।

ଅକ୍ଟୋବର ୭, ଶନିବାର ଦିନ ଇସ୍ରାଏଲୀ ସମ୍ପ୍ରଦାୟ ଉପରେ ଆକ୍ରମଣ ପରେ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ହମାସକୁ ଧ୍ୱଂସ କରିବାକୁ ଘୋଷଣା କରିଛନ୍ତି। ତେବେ ମୃତ୍ୟୁ ସଂଖ୍ୟା ୧୫୦୦ ଅତିକ୍ରମ କରିବା ସହ ଅତ୍ୟାବଶ୍ୟକ ସାମଗ୍ରୀ କମ୍‌ ଥିବାରୁ ଗାଜା ମାନବିକ ବିପର୍ଯ୍ୟୟର ସମ୍ମୁଖୀନ ହେଉଛି।