ଜଳନ୍ଧର ପୁରୋହିତ ହତ୍ୟା: କେଟିଏଫ୍ ଆତଙ୍କବାଦୀ ହରଦୀପ ନିଜାରକୁ ଧରାଇଦେଲେ ୧୦ ଲକ୍ଷ ଟଙ୍କା ପୁରସ୍କାର ମିଳିବ

ନୂଆଦିଲ୍ଲୀ : କାନାଡ଼ା-ଭିତ୍ତିକ ଖଲିସ୍ତାନୀ ବ୍ୟାଘ୍ର ବାହିନୀ (କେଟିଏଫ୍‌) ମୁଖ୍ୟ ହରଦୀପ ନିଜାର ବିଷୟରେ ସୂଚନା ଦେଲେ ୧୦ ଲକ୍ଷ ଟଙ୍କା ପୁରସ୍କାର ମିଳିବ ବୋଲି ଜାତୀୟ ତଦନ୍ତ ସଂସ୍ଥା (ଏନ୍‌ଆଇଏ) ପକ୍ଷରୁ ଘୋଷଣା କରାଯାଇଛି। ଗତବର୍ଷ ପଞ୍ଜାବର ଜଳନ୍ଧରରେ ଜଣେ ହିନ୍ଦୁ ପୁରୋହିତକୁ ହତ୍ୟା କରିବା ପାଇଁ ହରଦୀପ ଷଡ଼୍‌ଯନ୍ତ୍ର କରିଥିଲା।

ନିଜାର ଓ ଅନ୍ୟ ତିନିଜଣଙ୍କ ବିରୋଧରେ ଏନ୍‌ଆଇଏ ଚାର୍ଜସିଟ୍ ଦାଖଲ କରିବାର ତିନି ସପ୍ତାହ ପରେ ଏହି ଘୋଷଣା କରିଛି। ଜଳନ୍ଧର ଫିଲାଉର ଅଞ୍ଚଳର ଭରସିଂହପୁରର ବାସିନ୍ଦା ହେଉଛି ନିଜାର ଯେ କି ଏବେ କାନାଡ଼ାରେ ରହୁଛି ଏବଂ ସେ ହେଉଛି ଖଲିସ୍ତାନ ଟାଇଗର ଫୋର୍ସ (କେଟିଏଫ୍‌)ର ମୁଖ୍ୟ। ହିନ୍ଦୁ ପୁରୋହିତଙ୍କୁ ହତ୍ୟା କରିବା ପାଇଁ ସେ ଷଡ଼୍‌ଯନ୍ତ୍ର କରିଥିବା ଏନ୍‌ଆଇଏ ତଦନ୍ତରୁ ଜାଣିପାରିଛି। ଯେ କେହି ନିଜାର ବିଷୟରେ ସୂଚନା ଦେବ, ଯେଉଁ ସୂଚନାକୁ ଆଧାର କରି ତାକୁ ଗିରଫ କରାଯାଇପାରିବ, ସେଥିପାଇଁ ସମ୍ପୃକ୍ତ ସୂଚନାଦାତାକୁ ୧୦ ଲକ୍ଷ ଟଙ୍କା ପୁରସ୍କାର ଦିଆଯିବ ଏବଂ ତା’ର ପରିଚୟ ମଧ୍ୟ ଗୋପନ ରଖାଯିବ ବୋଲି ଏନ୍‌ଆଇଏ ପକ୍ଷରୁ କୁହାଯାଇଛି।