ନୀତିଶ-ନାଇଡୁଙ୍କ ଇଫତାରକୁ ବର୍ଜନ କଲା ଜାମିୟତ ଉଲମା-ଏ-ହିନ୍ଦ୍

ପାଟନା: ୱାକଫ ବିଲ୍ ନେଇ ଭାରତୀୟ ଜନତା ପାର୍ଟି ମୁସଲିମ ସମ୍ପ୍ରଦାୟର ଅସନ୍ତୋଷର ସମ୍ମୁଖୀନ ହେଉଛ। ଏହାର ସହଯୋଗୀମାନେ ମଧ୍ୟ ଏବେ ବିରୋଧର ସମ୍ମୁଖୀନ ହେଉଛନ୍ତି। ମୁସଲିମ ସମ୍ପ୍ରଦାୟ ଏବେ ୱାକଫ ବିଲ୍ ଉପରେ ନେତାମାନଙ୍କୁ ଖୋଲାଖୋଲି ବିରୋଧ କରିବା ଆରମ୍ଭ କରୁଥିବା କୁହାଯାଉଛି।

ମୁସଲିମ ସଂଗଠନଗୁଡ଼ିକ ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ଇଫତାର ନିମନ୍ତ୍ରଣକୁ ପ୍ରତ୍ୟାଖ୍ୟାନ କରିଛନ୍ତି। ସଂଗଠନଗୁଡ଼ିକ ଦ୍ୱାରା ନୀତିଶ କୁମାରଙ୍କୁ ଲେଖାଯାଇଥିବା ଚିଠିରେ ଏ ସମ୍ପର୍କରେ ସୂଚନା ଦିଆଯାଇଛି।

ଇମରତ-ଏ-ଶରିଆ କହିଛି ଯେ, ବିହାରର ପ୍ରମୁଖ ମୁସଲିମ ଧାର୍ମିକ ସଂଗଠନଗୁଡ଼ିକ ୨୩ ମାର୍ଚ୍ଚ ରବିବାରରେ ଅନୁଷ୍ଠିତ ହେବାକୁ ଥିବା ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ଦାୱତ-ଏ-ଇଫତାରକୁ ବର୍ଜନ ଘୋଷଣା କରିଛନ୍ତି। ଆହୁରି ମଧ୍ୟ କହିଛନ୍ତି ଯେ ପ୍ରସ୍ତାବିତ ୱାକଫ ସଂଶୋଧନ ବିଲ୍ ୨୦୨୪ ପ୍ରତି ଆପଣଙ୍କ ସମର୍ଥନର ପ୍ରତିବାଦ ସ୍ୱରୂପ ଏହି ନିଷ୍ପତ୍ତି ନିଆଯାଇଛି।

ଜାମିୟତ ଉଲମା-ଏ-ହିନ୍ଦ୍ ଆଉ ନୀତିଶ କୁମାର, ଚନ୍ଦ୍ରବାବୁ ନାଇଡୁ ଏବଂ ଅନ୍ୟାନ୍ୟ ଧର୍ମନିରପେକ୍ଷ ନେତାଙ୍କ ଇଫତାର, ଇଦ୍ ମିଳନ ଏବଂ ଅନ୍ୟାନ୍ୟ କାର୍ଯ୍ୟକ୍ରମରେ ଅଂଶଗ୍ରହଣ କରିବ ନାହିଁ।

ଅଲ୍ ଇଣ୍ଡିଆ ମୁସଲିମ୍ ପର୍ସନାଲ ଲ’ ବୋର୍ଡ, ଇମରତ-ଏ-ଶରିଆ, ଖାନକାହ-ଏ-ମୁଜିବିଆ ସମେତ ୮ଟି ମୁସଲିମ୍ ସଂଗଠନ ନୀତିଶଙ୍କ ଇଫତାରକୁ ବର୍ଜନ କରିଛନ୍ତି। ମୁଖ୍ୟମନ୍ତ୍ରୀଙ୍କୁ ପଠାଯାଇଥିବା ଚିଠିରେ କୁହାଯାଇଛି ଯେ, ଯଦି ୱାକଫ୍ ସଂଶୋଧନ ବିଲ୍ ଆଇନରେ ପରିଣତ ହୁଏ, ତେବେ ଆପଣ ଏବଂ ଆପଣଙ୍କ ଦଳ ଜେଡିୟୁ ଦାୟୀ ରହିବେ। ଏହାର ପ୍ରତିବାଦରେ ଲୋକମାନେ ଇଫତାର ପାର୍ଟିରେ ଯୋଗ ଦେବାକୁ ମନା କରିଦେଇଛନ୍ତି।

ଇଫତାର ନିମନ୍ତ୍ରଣକୁ ପ୍ରତ୍ୟାଖ୍ୟାନ କରିଥିବା ସଂଗଠନଗୁଡ଼ିକ ମଧ୍ୟରେ ଅଲ୍ ଇଣ୍ଡିଆ ମୁସଲିମ୍ ପର୍ସନାଲ ଲ’ ବୋର୍ଡ, ଇମାରତ-ଏ-ଶରିଆ, ଜମିଅତ ଉଲମା-ଏ-ହିନ୍ଦ, ଜମିଅତ ଆହଲେ ହଦିତ, ଜମାତ-ଏ-ଇସଲାମି ହିନ୍ଦ୍, ଖାନକାହ ମୁଜିବିଆ ଏବଂ ଖାନକାହ ରହମାନି ଅନ୍ତର୍ଭୁକ୍ତ। ଚିଠିରେ ଲେଖାଯାଇଛି ଯେ, ଆପଣଙ୍କ ସରକାର ମୁସଲମାନମାନଙ୍କ ଯଥାର୍ଥ ଦାବିକୁ ଅଣଦେଖା କରିବା ଦ୍ୱାରା ଏପରି ଆନୁଷ୍ଠାନିକ ଭୋଜକୁ ଅର୍ଥହୀନ କରିଦିଏ।

ମୁସଲିମ ସଂଗଠନଗୁଡ଼ିକ ଅଭିଯୋଗ କରିଛନ୍ତି ଯେ, ଆପଣ (ନୀତୀଶ କୁମାର ସରକାର) ଧର୍ମନିରପେକ୍ଷ ଶାସନ ପ୍ରତିଶ୍ରୁତି ଦେଇ କ୍ଷମତାକୁ ଆସିଥିଲେ, ଯେଉଁଥିରେ ସଂଖ୍ୟାଲଘୁଙ୍କ ଅଧିକାର ସୁରକ୍ଷାର ପ୍ରତିଶ୍ରୁତି ଅନ୍ତର୍ଭୁକ୍ତ, କିନ୍ତୁ ବିଜେପି ସହିତ ଆପଣଙ୍କର ମେଣ୍ଟ ଏବଂ ଏକ ଅସାମ୍ବିଧାନିକ ଏବଂ ଅଯୌକ୍ତିକ ଆଇନକୁ ସମର୍ଥନ କରିବା ଆପଣଙ୍କ ଘୋଷିତ ପ୍ରତିଶ୍ରୁତି ବିରୁଦ୍ଧରେ।

ଜମିଅତ ଉଲମା-ଏ-ହିନ୍ଦ୍‌ର ସଭାପତି ମୌଲାନା ଅର୍ଶଦ ମଦାନୀ କହିଛନ୍ତି ଯେ, ଜମିଅତ ଉଲମା-ଏ-ହିନ୍ଦ୍ ନିଜକୁ ଧର୍ମନିରପେକ୍ଷ ବୋଲି କହୁଥିବା, ମୁସଲମାନମାନଙ୍କ ପ୍ରତି ହେଉଥିବା ଅତ୍ୟାଚାର ଏବଂ ଅନ୍ୟାୟ ଉପରେ ନୀରବ ରହିଥିବା ଏବଂ ବର୍ତ୍ତମାନର ସରକାରଙ୍କ ଅଂଶବିଶେଷ ଥିବା ଲୋକଙ୍କ ବିରୁଦ୍ଧରେ ଏକ ପ୍ରତୀକାତ୍ମକ ପ୍ରତିବାଦ କରିବାକୁ ନିଷ୍ପତ୍ତି ନେଇଛି। ଏହା ଅଧୀନରେ, ଜମିଅତ ଉଲାମା-ଏ-ହିନ୍ଦ୍ ଏପରି ଲୋକଙ୍କ କୌଣସି କାର୍ଯ୍ୟକ୍ରମରେ ଅଂଶଗ୍ରହଣ କରିବ ନାହିଁ, ତାହା ଇଫତାର ପାର୍ଟି ହେଉ, ଇଦ୍ ମିଳନ ହେଉ କିମ୍ବା ଅନ୍ୟ କୌଣସି କାର୍ଯ୍ୟକ୍ରମ।

ଅଧିକ ପଢ଼ନ୍ତୁ: ପାକିସ୍ତାନରେ ନମାଜ ପାଠ କରିବା ମଧ୍ୟ ଏକ ଅପରାଧ!: ୫୦ ରୁ ଅଧିକ ଅହମ୍ମଦୀଙ୍କ ବିରୋଧରେ ଏଫଆଇଆର ରୁଜୁ

ଜମିଅତ ଉଲମା-ଏ-ହିନ୍ଦ୍‌ର ସଭାପତି ମୌଲାନା ଅର୍ଶଦ ମଦାନୀ କହିଛନ୍ତି ଯେ, ଦେଶର ସାମ୍ପ୍ରତିକ ପରିସ୍ଥିତି ଏବଂ ସଂଖ୍ୟାଲଘୁ, ବିଶେଷକରି ମୁସଲମାନମାନଙ୍କ ପ୍ରତି ହେଉଥିବା ଅନ୍ୟାୟ ଏବଂ ଅତ୍ୟାଚାର କାହାଠାରୁ ଲୁଚି ନାହିଁ, କିନ୍ତୁ ଏହା ଅତ୍ୟନ୍ତ ଦୁର୍ଭାଗ୍ୟଜନକ ଯେ, ନିଜକୁ ଧର୍ମନିରପେକ୍ଷ ଏବଂ ମୁସଲମାନମାନଙ୍କର ସହାନୁଭୂତିଶୀଳ ବୋଲି କହୁଥିବା ନେତାମାନେ, ଯାହାଙ୍କ ରାଜନୈତିକ ସଫଳତାରେ ମୁସଲମାନମାନେ ମଧ୍ୟ ଯୋଗଦାନ ଦେଇଛନ୍ତି, ସେମାନେ କ୍ଷମତା ଲୋଭରେ କେବଳ ଚୁପ୍ ନାହାନ୍ତି, ବରଂ ପରୋକ୍ଷ ଭାବରେ ଅନ୍ୟାୟକୁ ସମର୍ଥନ କରୁଛନ୍ତି।

ଅରଶଦ ମାଦାନୀ କହିଛନ୍ତି ଯେ, ମୁସଲମାନମାନଙ୍କୁ ପାର୍ଶ୍ୱରେ ରଖିବା ପାଇଁ ଯୋଜନାବଦ୍ଧ ଷଡ଼ଯନ୍ତ୍ର କରାଯାଉଛି, ଧାର୍ମିକ ଭାବନାକୁ ଆଘାତ ଦିଆଯାଉଛି, ଧାର୍ମିକ ସ୍ଥଳଗୁଡ଼ିକୁ ବିବାଦ ଭିତରକୁ ଟାଣି ଦିଆଯାଉଛି ଏବଂ ଦଙ୍ଗା ସୃଷ୍ଟି କରି ମୁସଲମାନମାନଙ୍କୁ ଟାର୍ଗେଟ କରାଯାଉଛି। ଏହି ତଥାକଥିତ ଧର୍ମନିରପେକ୍ଷ ନେତାମାନେ ମଧ୍ୟ ଏହି ଘଟଣାଗୁଡ଼ିକ ପ୍ରତି ଆଖି ବୁଜି ଦେଉଛନ୍ତି।

ଅଧିକ ପଢ଼ନ୍ତୁ: ପାକିସ୍ତାନରେ କ୍ଷମତା ଦଖଲ ବିଦ୍ରୋହ ପାଇଁ ପ୍ରସ୍ତୁତି: ଶାହବାଜଙ୍କ ପାଇଁ ନୱାଜଙ୍କ ଭଳି ସ୍କ୍ରିପ୍ଟ ଲେଖୁଛନ୍ତି ମୁନିର!

Nitish Kumar Iftar