ଆତଙ୍କବାଦୀଙ୍କ ସହ ଲିଙ୍କ ଅଭିଯୋଗରେ ୪ ଜଣ ସନ୍ଦିଗ୍ଧଙ୍କୁ ଗିରଫ କଲା ଜାମ୍ମୁ ପୁଲିସ

ଶ୍ରୀନଗର: କରୋନା ମହାମାରୀ ସମୟରେ ମଧ୍ୟ କାଶ୍ମୀର ଘାଟିରେ ଆତଙ୍କବାଦୀ କାର୍ଯ୍ୟକଳାପ ବିରୋଧରେ ସୁରକ୍ଷା ବାହିନୀ ନିଜ ଆଭିମୁଖ୍ୟକୁ କଡାକଡି କରିଛି । ଆତଙ୍କବାଦୀଙ୍କ ନେଟୱାର୍କକୁ ଦୁର୍ବଳ କରିବା ପାଇଁ ସୁରକ୍ଷାକର୍ମୀମାନେ ଅଭିଯାନ ଜାରି ରଖିଛନ୍ତି। ଆଜି ସୁରକ୍ଷାବାହିନୀ ଚାରି ଜଣ ସନ୍ଦିଗ୍ଧ ବ୍ୟକ୍ତିଙ୍କୁ ଗିରଫ କରିଛି ଯେଉଁମାନେ ଦକ୍ଷିଣ କାଶ୍ମୀର ଜିଲ୍ଲା ପୁଲୱାମାରେ ଆତଙ୍କବାଦୀ କାର୍ଯ୍ୟକଳାପକୁ ବଢାଇବାରେ ସାହାଯ୍ୟ କରିଥିଲେ। ପୁଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ସୁରକ୍ଷାବାହିନୀ ଏହି ଚାରି ଜଣଙ୍କ ବିଷୟରେ ପୂର୍ବରୁ ସୂଚନା ପାଇଥିଲେ ମଧ୍ୟ ଏମାନେ ଘରୁ କୁଆଡେ ପଳାଇଯାଇଥିଲେ ।

ଶୁକ୍ରବାର ବିଳମ୍ବିତ ରାତିରେ ପୁଲିସ ସୂଚନା ପାଇଥିଲା ଯେ ଏହି ଚାରି ଜଣ ବ୍ୟକ୍ତି ପୁଲୱାମାର ବାରପୋରା ଗ୍ରାମରେ ଲୁଚି ରହିଛନ୍ତି । ପୁଲିସ ସେନା ଏବଂ ବିଏସଏଫର ଟିମ ସହ ବାରପୋରାରେ ପହଞ୍ଚି ଏହି ଅଞ୍ଚଳକୁ ଘେରି ରହିଥିଲା। ଆଉ ଅଚାନକ ଚଢ଼ାଉ ପରେ ଏହି ଚାରିଜଣଙ୍କୁ ଗିରଫ କରାଯାଇଥିଲା।

ଏମାନଙ୍କ ନାମ ବିଲାଲ ଅହମ୍ମଦ, ଫିରୋଜ ଅହମ୍ମଦ, ୟାୱାର ଅହମ୍ମଦ ଏବଂ ୱାକର ଅହମ୍ମଦ ବୋଲି ଜଣାପଡିଛି । ଛାନଭିନ ବେଳେ ଆତଙ୍କବାଦୀ ସଂଗଠନ ସହ ଜଡିତ କିଛି ଆପତ୍ତିଜନକ ଦଲିଲ ମଧ୍ୟ ତାଙ୍କ ନିକଟରୁ ଉଦ୍ଧାର କରାଯାଇଛି। ପୁଲିସ ସୂତ୍ରରୁ ସୂଚନା ମିଳିଛି ଯେ ଏହି ଚାରିଜଣ ବ୍ୟକ୍ତି ଆତଙ୍କବାଦୀ କାର୍ଯ୍ୟକଳାପ କରିବାରେ ସାହାଯ୍ୟ କରୁଥିଲେ। ସମସ୍ତ ଚାରିଜଣଙ୍କୁ ପଚରାଉଚରା କରାଯାଉଛି।