୩୦୦ ୟୁନିଟ ମାଗଣା ବିଦ୍ୟୁତ ପାଇଁ ଅପେକ୍ଷା କରିବାକୁ ପଡିବ, ସ୍ଥିର ହୋଇପାରୁନି କେମିତି ହେବ ଖର୍ଚ୍ଚ ଭରଣା

ଚଣ୍ଡୀଗଡ଼: ପଞ୍ଜାବରେ କ୍ଷମତାକୁ ଆସିବା ପରେ ଆମ୍ ଆଦମୀ ପାର୍ଟି ପ୍ରତ୍ୟେକ ପରିବାରକୁ ୩୦୦ ୟୁନିଟ୍ ବିଦ୍ୟୁତ୍ ମାଗଣାରେ ପ୍ରତିଶୃତି ଦେଇଥିଲା। କିନ୍ତୁ ପଞ୍ଜାବର ଲୋକଙ୍କୁ ଏଥିପାଇଁ କିଛି ମାସ ଅପେକ୍ଷା କରିବାକୁ ପଡିବ। ୩୦୦ ୟୁନିଟ୍ ମାଗଣା ବିଦ୍ୟୁତର ଯୋଜନାକୁ ଅନ୍ତିମ ସ୍ପର୍ଶ ଦେବା ପାଇଁ ଆଜି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କୁ ଦିଲ୍ଲୀ ଡାକିଛନ୍ତି। ଏହାପୂର୍ବରୁ ଅରବିନ୍ଦ କେଜ୍ରିୱାଲ ପଞ୍ଜାବର ଅଧିକାରୀମାନଙ୍କ ସହ ମଧ୍ୟ କଥା ହୋଇଥିଲେ। କୁହାଯାଉଛି ଯେ ଏହି ଯୋଜନା କାର୍ଯ୍ୟକାରୀ କରିବାରେ କିଛି ବୈଷୟିକ ସମସ୍ୟା ରହିଛି |

କେଜ୍ରିୱାଲଙ୍କ କାର୍ଯ୍ୟାଳୟର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ପଞ୍ଜାବରେ ଆପ ସରକାର ଗଠନ ହେବାର ପ୍ରାୟ ଏକ ମାସ ବିତିଗଲାଣି। କେଜ୍ରିୱାଲ ସ୍ପଷ୍ଟ କରିଛନ୍ତି ଯେ ପଞ୍ଜାବର ଲୋକମାନେ ଶୀଘ୍ର ମାଗଣା ବିଦ୍ୟୁତର ସୁବିଧା ପାଇବା ଉଚିତ ଏବଂ ଏହା ଶୀଘ୍ର ଘୋଷଣା କରାଯିବ। ବର୍ତ୍ତମାନ ପଞ୍ଜାବର ବିଦ୍ୟୁତ୍ ବିଭାଗ କିପରି ଏହାର ଖର୍ଚ୍ଚ ବହନ କରିବ ଏବଂ ଏହାର ଅପବ୍ୟବହାର କିପରି ବନ୍ଦ ହେବ ସେନେଇ ଆଲୋଚନା ହେଉଛି। ସୂଚନା ଥାଉ କି ଯେ ଆମ୍ ଆଦମୀ ପାର୍ଟି ଦେଇଥିବା ପ୍ରତିଶ୍ରୁତିଗୁଡ଼ିକ ମଧ୍ୟରୁ ମାଗଣା ବିଦ୍ୟୁତ ସବୁଠାରୁ ଗୁରୁତ୍ୱପୂର୍ଣ୍ଣ ଘୋଷଣା ଥିଲା |

ଗତ ବର୍ଷ ଜୁନ୍ ମାସରେ ଅରବିନ୍ଦ କେଜ୍ରିୱାଲ କହିଥିଲେ ଯେ ସେମାନେ କ୍ଷମତାକୁ ଆସିବା ମାତ୍ରେ ଲୋକଙ୍କୁ ମାଗଣା ବିଦ୍ୟୁତ୍ ଯୋଗାଇବା ପାଇଁ କାର୍ଯ୍ୟ କରିବୁ | ବର୍ତ୍ତମାନ ଆମ୍ ଆଦମୀ ପାର୍ଟି ପୂର୍ଣ୍ଣ ସଂଖ୍ୟାଗରିଷ୍ଠତା ସହିତ ପଞ୍ଜାବରେ ସରକାର ଗଠନ କରିଛି ଏବଂ ବର୍ତ୍ତମାନ ଲୋକମାନେ ଏହି ପ୍ରତିଶ୍ରୁତି ପୂରଣ ପାଇଁ ଅପେକ୍ଷା କରିଛନ୍ତି। ଉଲ୍ଲେଖନୀୟ ବିଷୟ ହେଉଛି, ରାଜ୍ୟର ୧୧୭ ଟି ସିଟ୍ ମଧ୍ୟରୁ ଆପ ମୋଟ ୯୨ ଟି ସିଟ୍ ଜିତିଛି |