ୟୁକ୍ରେନ ଯୁଦ୍ଧରେ ରୁଷିଆ ସହାୟତା ପାଇଁ ସୈନ୍ୟ ପଠାଇଲେ କିମ୍

ସିଓଲ: ୟୁକ୍ରେନ ଯୁଦ୍ଧ ସମୟରେ ପାଶ୍ଚାତ୍ୟ ଦେଶମାନେ ରୁଷିଆ ଉପରେ ଅନେକ ପ୍ରତିବନ୍ଧକ ଲଗାଇଛନ୍ତି।  ତଥାପି ରୁଷିଆ ପଛଘୁଞ୍ଚା ଦେଇନାହିଁ।  ୟୁକ୍ରେନରେ ନିଜର କାର୍ଯ୍ୟ ଜାରି ରଖିଛି। ଦକ୍ଷିଣ କୋରିଆର ପ୍ରତିରକ୍ଷା ମନ୍ତ୍ରୀଙ୍କ କହିବାନୁସାରେ, ଉତ୍ତର କୋରିଆ ସୈନିକମାନେ ୟୁକ୍ରେନରେ ରୁଷୀୟ ସୈନିକମାନଙ୍କ ସହିତ ଏକାଠି ଯୁଦ୍ଧ କରୁଛନ୍ତି।

ଦକ୍ଷିଣ କୋରିଆର କିମ୍ ୟୋଙ୍ଗ-ହ୍ୟୁନ ମଙ୍ଗଳବାର ଦେଶର ରାଜନେତାମାନଙ୍କୁ କହିଛନ୍ତି ଯେ ଗତ ସପ୍ତାହରେ ୟୁକ୍ରେନ ଗଣମାଧ୍ୟମରେ ପ୍ରକାଶିତ ଖବର ଅନୁଯାୟୀ ଅକ୍ଟୋବର ୩ ରେ ଡୋନେଟସ୍କ ନିକଟରେ ୟୁକ୍ରେନ କ୍ଷେପଣାସ୍ତ୍ର ଆକ୍ରମଣରେ ୬ ଜଣ ଉତ୍ତର କୋରିଆ ଅଧିକାରୀଙ୍କ ମୃତ୍ୟୁ ଘଟିଥିଲା।

ଉତ୍ତର କୋରିଆର ଏକଛତ୍ରବାଦୀ ଶାସକ କିମ୍ ଜୋଙ୍ଗ୍ ଉନ୍‌ଙ୍କ ସନ୍ଦେହଜନକ କାର୍ଯ୍ୟ ସମଗ୍ର ବିଶ୍ୱ ଜାଣେ ଏବଂ ସେ ନିଜ ଶତ୍ରୁମାନଙ୍କ ବିରୁଦ୍ଧରେ ଆଣବିକ ଆକ୍ରମଣ କରିବା ବିଷୟରେ ଖୋଲାଖୋଲି ଭାବରେ କଥାବାର୍ତ୍ତା କରନ୍ତି। କିମ୍ ଆମେରିକା ଏବଂ ଦକ୍ଷିଣ କୋରିଆକୁ ତାଙ୍କର ଶତ୍ରୁ ଭାବରେ ବିବେଚନା କରନ୍ତି। ୟୁକ୍ରେନ-ରୁଷିଆ ଯୁଦ୍ଧରେ ଆମେରିକା ୟୁକ୍ରେନକୁ ସମର୍ଥନ କରୁଛି।

ଯୁଦ୍ଧ ମଧ୍ୟରେ ରୁଷିଆ ଏବଂ ଉତ୍ତର କୋରିଆ ନିକଟତର ହୋଇଛନ୍ତି।  ୨୪ ବର୍ଷ ପରେ ଚଳିତ ବର୍ଷ ଜୁନ୍ ମାସରେ ଭ୍ଲାଡିମିର୍ ପୁଟିନ୍ ଉତ୍ତର କୋରିଆ ଗସ୍ତ କରିଥିଲେ, ଯେଉଁଥିରେ କିମ୍ ଜୋଙ୍ଗ୍ ଏବଂ ପୁଟିନଙ୍କ ମଧ୍ୟରେ ବନ୍ଧୁତ୍ୱର ଗଭୀରତା ଦେଖାଯାଇଥିଲା।  ଉଭୟ ଦେଶ ମଧ୍ୟରେ ବହୁପକ୍ଷୀୟ ଚୁକ୍ତିନାମା ସ୍ୱାକ୍ଷର ହୋଇଥିଲା।

ୟୁକ୍ରେନ ସହିତ ଯୁଦ୍ଧ ପରେ ଅଧିକାଂଶ ନାଟୋ ଦେଶ ରୁଷିଆଠାରୁ ନିଜକୁ ଦୂରେଇ ରଖିଛନ୍ତି ଏବଂ ରୁଷିଆ ସହିତ ବାଣିଜ୍ୟ ବନ୍ଦ କରି ଦେଇଛନ୍ତି। ପାଶ୍ଚାତ୍ୟ ପ୍ରତିବନ୍ଧକ ପରେ ରୁଷିଆ ଚୀନ୍, ଇରାନ ଏବଂ ଉତ୍ତର କୋରିଆ ସହିତ ନିଜର ଘନିଷ୍ଠତା ବୃଦ୍ଧି କରିଛି। ଏହା ବ୍ୟତୀତ ରୁଷିଆ ଭାରତ ଏବଂ ପାକିସ୍ତାନ ସହ ନିଜର ବ୍ୟବସାୟ ବିସ୍ତାର କରୁଛି। ଅନେକ ପାଶ୍ଚାତ୍ୟ ଦେଶ ମଧ୍ୟ ଅଭିଯୋଗ କରିଛନ୍ତି ଯେ ୟୁକ୍ରେନ ବିରୋଧରେ ଯୁଦ୍ଧରେ ଚୀନ୍, ଇରାନ ଏବଂ ଉତ୍ତର କୋରିଆ ରୁଷିଆକୁ ସାହାଯ୍ୟ କରୁଛନ୍ତି।