କିମ୍‌ଙ୍କ ପାଇଁ ଓଜନ କମାଇବା ଔଷଧ ଖୋଜା: ପ୍ରଥମେ ଲୋକଙ୍କ ଉପରେ ହେବ ପ୍ରୟୋଗ

ପ୍ୟୋଙ୍ଗୟାଙ୍ଗ: ଉତ୍ତର କୋରିଆର ଏକଛତ୍ରବାଦୀ ଶାସକ କିମ୍ ଜୋଙ୍ଗ ଉନ୍ ପୁଣି ଥରେ ତାଙ୍କ ବର୍ଦ୍ଧିତ ଓଜନ ପାଇଁ ଖବରରେ ଅଛନ୍ତି। ସାମ୍ପ୍ରତିକ ରିପୋର୍ଟ ଅନୁଯାୟୀ, ସେ ଓଜେମ୍ପିକ ଭଳି ବିଦେଶୀ ଓଜନ ହ୍ରାସ ଔଷଧ ଖୋଜିବା ଆରମ୍ଭ କରିଛନ୍ତି। କିନ୍ତୁ ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି ଯେ, ଏହି ଔଷଧଗୁଡ଼ିକୁ ପ୍ରଥମେ ତାଙ୍କ ପରି ଶରୀର ଥିବା ନାଗରିକଙ୍କ ଉପରେ ପରୀକ୍ଷଣ କରିବାକୁ ଯୋଜନା କରାଯାଉଛି। ସେମାନଙ୍କ ଊପରେ ଔଷଧ ସଫଳ ହେଲେ ପରେ କିମ୍ ନିଜେ ଖାଇବେ।

ଦି ସନର ଏକ ରିପୋର୍ଟ ଅନୁଯାୟୀ, କିମ୍ ଜୋଙ୍ଗ ଉନ୍ ତାଙ୍କର ନିକଟତମ ଅଧିକାରୀମାନଙ୍କୁ ବିଦେଶୀ ବଜାରରୁ ଉନ୍ନତ ଓଜନ ହ୍ରାସ ଔଷଧ ଆଣିବାକୁ ନିର୍ଦ୍ଦେଶ ଦେଇଛନ୍ତି। ଏହି ନିର୍ଦ୍ଦେଶ ସେ ପୁଣି ଥରେ ଓଜନ ବୃଦ୍ଧି ସମ୍ବନ୍ଧୀୟ ରୋଗର ସମସ୍ୟାର ସମ୍ମୁଖୀନ ହେବା ପରେ ଆସିଛି।

କିମ୍ ପୂର୍ବରୁ ୨୨ ଷ୍ଟୋନ୍ (ପ୍ରାୟ ୧୪୦ କିଲୋଗ୍ରାମ) ଓଜନର ଥିଲେ। ୨୦୨୧ ମସିହାରେ ତାଙ୍କର ଓଜନ ହ୍ରାସ ପାଇଥିଲା। କିନ୍ତୁ ଏବେ ତାଙ୍କର ଓଜନ ପୁଣି ୨୦ ଷ୍ଟୋନ୍ (ପ୍ରାୟ ୧୨୭ କିଲୋଗ୍ରାମ) ଅତିକ୍ରମ କରିଗଲାଣି।

ଅଧିକ ପଢ଼ନ୍ତୁ:  ପାକିସ୍ତାନ ତିନି ଖଣ୍ଡ ହେବା ଆଶଙ୍କା: ବାଲୁଚ୍‌ଙ୍କ ପରେ ଏବେ ୱାଜିରିସ୍ତାନରେ ସ୍ବାଧୀନତା ସଂଗ୍ରାମ

କିମ୍‌ଙ୍କ ସ୍ୱାସ୍ଥ୍ୟ ସମ୍ପର୍କରେ ଅବଗତ ବିଶେଷଜ୍ଞମାନେ କହିଛନ୍ତି ଯେ, ଯଦି କୌଣସି ନୂତନ ଔଷଧ କିମ୍ ସେବନ କରନ୍ତି ତେବେ ନ‌ିଜେ ଖାଇବା ପୂର୍ବରୁ ଏହାକୁ ସେ ପ୍ରଥମେ ଉତ୍ତର କୋରିଆର ନାଗରିକଙ୍କ ଉପରେ ପରୀକ୍ଷଣ କରିବେ। ବିଶେଷଜ୍ଞଙ୍କ ଅନୁଯାୟୀ, କିମ୍‌ଙ୍କ ପିତା କିମ୍ ଜୋଙ୍ଗ ଇଲ୍ ମଧ୍ୟ ପରୀକ୍ଷାମୂଳକ ଭାବରେ ତାଙ୍କ ସହକର୍ମୀଙ୍କ ଉପରେ ଓପିଓଏଡ୍ ଭଳି ଔଷଧ ପରୀକ୍ଷା କରିଥିଲେ। ଏପରି ପରିସ୍ଥିତିରେ, ଏହା ଆଶଙ୍କା କରାଯାଉଛି ଯେ, କିମ୍ ନିଜେ ଔଷଧର ବିପଦ ନେବା ପରିବର୍ତ୍ତେ ପ୍ରଥମେ ସେହି ନାଗରିକମାନଙ୍କୁ ବାଛି ପାରନ୍ତି ଯାହାଙ୍କ ଶରୀର ଗଠନ ତାଙ୍କର ନିଜ ପରି ରହିଛି।

କିମ୍‌ଙ୍କ ଅସ୍ୱାସ୍ଥ୍ୟକର ଜୀବନଶୈଳୀ କାହାଠାରୁ ଲୁଚି ନାହିଁ। ସିଗାରେଟ୍ ଟାଣିବା, ମଦ୍ୟପାନ କରିବା ଏବଂ ବିଦେଶୀ ଖାଦ୍ୟ ଖାଇବା ତାଙ୍କ ସଉକ ମଧ୍ୟରୁ ଅନ୍ୟତମ। ସ୍ୱାସ୍ଥ୍ୟ ବିଶେଷଜ୍ଞମାନଙ୍କ ଅନୁସାରେ, କିମ୍‌ ଉଚ୍ଚ ରକ୍ତଚାପ, ମଧୁମେହ ଏବଂ ଗଣ୍ଠିବାତ ଭଳି ରୋଗରେ ପୀଡିତ ଅଛନ୍ତି। ଏହା ମଧ୍ୟ ଉଲ୍ଲେଖନୀୟ ଯେ, ତାଙ୍କ ବାପା ଏବଂ ଜେଜେବାପା ଉଭୟ ହୃଦରୋଗରେ ମୃତ୍ୟୁବରଣ କରିଥିଲେ। ଯାହାକୁ ନେଇ କିମ୍ ଭୟ କରୁଛନ୍ତି।

କେବଳ ଔଷଧ ନୁହେଁ, କିମ୍ ବିଦେଶରୁ ଡାକ୍ତର ମଧ୍ୟ ଆଣିଥାନ୍ତି। ଯେତେବେଳେ କିମ୍‌ଙ୍କ ସ୍ୱାସ୍ଥ୍ୟ କଥା ଆସେ, ଉତ୍ତର କୋରିଆ କୌଣସି ଖର୍ଚ୍ଚକୁ ନେଇ ପଛଘୁଞ୍ଚା ଦିଏ ନାହିଁ। କିମ୍‌ଙ୍କ ଡାକ୍ତରୀ ଦଳ ଆବଶ୍ୟକ ହେଲେ ବିଦେଶୀ ଔଷଧ, ଉପକରଣ ଏବଂ ୟୁରୋପରୁ ଡାକ୍ତର ମଧ୍ୟ ଆଣନ୍ତି। ଏସବୁ କିମ୍‌ଙ୍କ ବ୍ୟକ୍ତିଗତ ସଚିବାଳୟ ଦ୍ୱାରା ପରିଚାଳିତ ହୁଏ, ଯାହା ନିର୍ଦ୍ଦିଷ୍ଟ ମିସନରେ ବିଶ୍ୱର ବିଭିନ୍ନ ସ୍ଥାନରେ ନିୟୋଜିତ ଉତ୍ତର କୋରିଆର ଅଧିକାରୀମାନଙ୍କ ସହିତ କାର୍ଯ୍ୟ କରିଥାଏ।

ଅଧିକ ପଢ଼ନ୍ତୁ: ଅନଲାଇନ୍ ଠକେଇ ରୋକିବା ପାଇଁ ନେପାଳରେ ବନ୍ଦ୍‌ ହେଲା ଟେଲିଗ୍ରାମ୍‌

 Kim Jong Un | North Korea