ଜେଲରୁ ବାହାରିବେ ଆରଜେଡି ସୁପ୍ରିମୋ ଲାଲୁ ପ୍ରସାଦ ଯାଦବ!

ପାଟନା (ବିହାର): ଗୋଖାଦ୍ୟ ଦୁର୍ନୀତି ମାମଲାରେ ରାଞ୍ଚି ଜେଲରେ ସାତ ବର୍ଷ କାରାଦଣ୍ଡ ଭୋଗୁଥିବା ରାଷ୍ଟ୍ରୀୟ ଜନତା ଦଳ (ଆରଜେଡି) ସୁପ୍ରିମୋ ଲାଲୁ ପ୍ରସାଦ ଖୁବ ଶୀଘ୍ର ପାରୋଲରେ ମୁକ୍ତ ହୋଇପାରନ୍ତି। ଦେଶରେ ଚାଲିଥିବା କରୋନାଭାଇରସ୍ ସଙ୍କଟ ପାଇଁ  ସୁପ୍ରିମକୋର୍ଟ ମାର୍ଚ୍ଚ ୨୪ରେ ସମସ୍ତ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳକୁ ଉଚ୍ଚ ସ୍ତରୀୟ ପ୍ୟାନେଲ ଗଠନ କରିବାକୁ ନିର୍ଦ୍ଦେଶ ଦେଇଥିଲେ ଯେଉଁଥିରେ ସାତ ବର୍ଷ ପର୍ଯ୍ୟନ୍ତ ଜେଲରେ ଥିବା ଦୋଷୀଙ୍କୁ ପାରୋଲରେ ମୁକ୍ତ କରିବାକୁ ବିଚାର କରିବାକୁ କହିଥିଲେ। କରୋନା ସଂକ୍ରମଣକୁ ରୋକିବା ପାଇଁ ସୁପ୍ରିମକୋର୍ଟ ଏଭଳି ନିର୍ଦ୍ଦେଶ ଦେଇଥିଲେ ।

ଭୂତାଣୁ ସଂକ୍ରମଣକୁ ରୋକିବା ସହ ଜେଲ ପରିସର ମଧ୍ୟରେ ସାମାଜିକ ଦୂରତା ବଜାୟ ରଖିବା ପାଇଁ ବିଭିନ୍ନ ଅନ୍ତେବାସୀଙ୍କୁ ଜେଲରୁ ମୁକ୍ତ କରାଯାଇଛି। ତେବେ ଏଭଳି ପରିସ୍ଥିିତିରେ ୭ବର୍ଷ ଜେଲଦଣ୍ଡ ଭୋଗୁଥିବା ଲାଲୁ ପ୍ରସାଦ ଯାଦବ ମଧ୍ୟ ଜେଲରୁ ମୁକୁଳି ପାରନ୍ତି ବୋଲି ଚର୍ଚ୍ଚା ହେଉଛି । ପରିବାରର ନିକଟ ସୂତ୍ରରୁ ପ୍ରକାଶ ଯେ ଲାଲୁ ପ୍ରସାଦ ଯାଦବ ଅନେକ ରୋଗରେ ପୀଡିତ, ତେଣୁ ସେ କରୋନା ଭାଇରସ ଦ୍ୱାରା ଆକ୍ରାନ୍ତ ହେବାର ଆଶଙ୍କା ଅଧିକ ରହିଛି । ଏଭଳି ପରିସ୍ଥିତିରେ ତାଙ୍କ ପରିବାର ରାଜ୍ୟ ସରକାରଙ୍କୁ ତାଙ୍କୁ ମୁକ୍ତ କରିବାକୁ ଅନୁରୋଧ କରିପାରନ୍ତି ବୋଲି ସୂତ୍ରରୁ ପ୍ରକାଶ। ଲାଲୁ ବର୍ତ୍ତମାନ ଚିକିତ୍ସିତ ହେଉଛନ୍ତି। ଝାରଖଣ୍ଡର ରାଞ୍ଚିରେ ଥିବା ରାଜେନ୍ଦ୍ର ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ (ଆରଏମ୍ଏସ୍) ରେ ତାଙ୍କର ଚିକିତ୍ସା ଚାଲିଛି । ସୂତ୍ର ଅନୁଯାୟୀ, ଲାଲୁଙ୍କୁ ମୁକ୍ତ କରିବା ନେଇ ଝାରଖଣ୍ଡ ସରକାର ଆଡଭୋକେଟ୍ ଜେନେରାଲଙ୍କଠାରୁ ପରାମର୍ଶ ଲୋଡିଛନ୍ତି।

Livemint

କଂଗ୍ରେସ ନେତା ପ୍ରେମଚାନ୍ଦ ମିଶ୍ର କହିଛନ୍ତି ଯେ, ରାଞ୍ଚିରେ ଗୋଖାଦ୍ୟ ଦୁର୍ନୀତି ମାମଲାରେ ଜେଲଦଣ୍ଡ ଭୋଗୁଥିବା ଲାଲୁ ଯାଦବ ଜଣେ ବୃଦ୍ଧ ବ୍ୟକ୍ତି ଏବଂ ତାଙ୍କର ସ୍ୱାସ୍ଥ୍ୟବସ୍ଥା ଜଟିଳ ରହିଛି। ଏଭଳି ପରିସ୍ଥିତିରେ ଯଦି କାହାକୁ ମୁକ୍ତ କରାଯାଏ, ତେବେ ସରକାର ଲାଲୁଙ୍କୁ ମୁକ୍ତ କରିବାକୁ ଚିନ୍ତା କରିବା ଉଚିତ।