ପିକେଙ୍କ 'ଜନ ସୁରାଜ' ପାର୍ଟିର ଶୁଭାରମ୍ଭ

ପାଟନା: ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋର(ପିକେ) ପାଟନାରେ ଏକ କାର୍ଯ୍ୟକ୍ରମ ଆୟୋଜନ କରି ଆନୁଷ୍ଠାନିକ ଭାବେ ତାଙ୍କ ରାଜନୈତିକ ଦଳର ଶୁଭାରମ୍ଭ କରିଛନ୍ତି। ତାଙ୍କ ଦଳର ନାମ ଜନ ସୁରାଜ ରଖାଯାଇଛି। ଏହି ଅବସରରେ କିଶୋର କହିଛନ୍ତି ଯେ ତାଙ୍କ ଦଳ ବିହାରର ରାଜନୈତିକ ପରିସ୍ଥିତିରେ ଝଡ଼ ଆଣିବ ବୋଲି ସେ ଆଶାବାଦୀ ଅଛନ୍ତି। ସେ ମନୋଜ ଭାରତୀଙ୍କୁ ଦଳର କାର୍ଯ୍ୟକାରୀ ସଭାପତି ଭାବରେ ନିଯୁକ୍ତ କରିଛନ୍ତି।

ପାଟନାର ପ୍ରାଣୀ ଚିକିତ୍ସା ମହାବିଦ୍ୟାଳୟରେ ଆୟୋଜିତ ଏହି କାର୍ଯ୍ୟକ୍ରମରେ ପ୍ରଶାନ୍ତ କିଶୋର ଜନତାଙ୍କୁ ସମ୍ବୋଧିତ କରିଥିଲେ। ସେ କହିଛନ୍ତି ଯେ ସେ ଗତ ଅଢ଼େଇ ବର୍ଷ ଧରି ଜନ ସୁରାଜ ଅଭିଯାନ ଚଳାଉଥିଲେ ଏବଂ ବର୍ତ୍ତମାନ ଲୋକଙ୍କ ପ୍ରଶ୍ନର ଉତ୍ତର ଦେବାବେଳେ ସେ ଦଳର ପ୍ରତିଷ୍ଠା ଘୋଷଣା କରିଛନ୍ତି। ସେ କହିଛନ୍ତି ଯେ ନିର୍ବାଚନ ଆୟୋଗ ଜନ ସୁରାଜକୁ ଏକ ରାଜନୈତିକ ଦଳ ବୋଲି ଆନୁଷ୍ଠାନିକ ଭାବେ ଗ୍ରହଣ କରିଛନ୍ତି।

ପ୍ରଶାନ୍ତ କିଶୋର ତାଙ୍କ ସମର୍ଥକଙ୍କୁ ଦଳର ନାମ ଠିକ ଅଛି କି ବୋଲି ପଚାରିଥିଲେ। ସେ କହିଛନ୍ତି ଯେ ଯଦି ସମର୍ଥକମାନେ ଏହି ନାମରେ ସହମତ ନୁହଁନ୍ତି ତେବେ ମତେ ନିର୍ବାଚନ ଆୟୋଗଙ୍କ ନିକଟରେ ଆବେଦନ କରିବାକୁ ପଡ଼ିବ ବୋଲି କହିଥିଲେ। ତେବେ ଜନ ସୁରାଜ ପାର୍ଟି ନାମକୁ ସମସ୍ତେ ସର୍ବସମ୍ମତି କ୍ରମେ ଗ୍ରହଣ କରିଥିଲେ।

ଏହି କାର୍ଯ୍ୟକ୍ରମରେ ୫୦୦୦ରୁ ଅଧିକ ନେତା ଅଂଶଗ୍ରହଣ କରିଥିବା ସେ ଦାବି କରିଛନ୍ତି। ଦଳର ପ୍ରତିଷ୍ଠା ସମାରୋହରେ ପୂର୍ବତନ କେନ୍ଦ୍ର ମନ୍ତ୍ରୀ ଦେବେନ୍ଦ୍ର ପ୍ରସାଦ ଯାଦବ,  ରାଜନେତା ପବନ ବର୍ମା ଏବଂ ପୂର୍ବତନ ସାଂସଦ ମୋନାଜିର ହାସନଙ୍କ ପରି ବହୁ ପ୍ରସିଦ୍ଧ ବ୍ୟକ୍ତିତ୍ୱ ଯୋଗ ଦେଇଥିଲେ। ଏହା ଏକ ଗୁରୁତ୍ୱପୂର୍ଣ୍ଣ ଘଟଣା ଥିଲା, କାରଣ ପ୍ରଶାନ୍ତ କିଶୋରଙ୍କ ନେତୃତ୍ୱରେ ଦଳ ବିହାର ରାଜନୀତିରେ ଏକ ନୂଆ ପରିବର୍ତ୍ତନ ଆଣିବାର ସମ୍ଭାବନା ଥିବା କୁହାଯାଉଛି।

ଚମ୍ପାରଣରୁ ପିକେଙ୍କ ଦ୍ୱାରା ଆରମ୍ଭ ହୋଇଥିବା ୩୦୦୦ କିଲୋମିଟର ଲମ୍ବା ପଦଯାତ୍ରାର ଠିକ୍ ଦୁଇ ବର୍ଷ ପରେ ଏହି ପାର୍ଟି ପ୍ରତିଷ୍ଠା ହୋଇଛି। ଏହା ହେଉଛି ସେହି ସ୍ଥାନ ଯେଉଁଠାରେ ମହାତ୍ମା ଗାନ୍ଧୀ ଲୋକମାନଙ୍କୁ ଏକତ୍ର କରିବା ପାଇଁ ପ୍ରଥମ ସତ୍ୟଗ୍ରହ ଆରମ୍ଭ କରିଥିଲେ। ସେ କହିଛନ୍ତି ଯେ ବିହାରକୁ ପୁରୁଣା ପଛୁଆବର୍ଗରୁ ମୁକ୍ତ କରିବା ପାଇଁ ତାଙ୍କ ଦଳ ଏକ ନୂତନ ରାଜନୈତିକ ବିକଳ୍ପ ଉପସ୍ଥାପନ କରିବ।

ଏହି ଅବସରରେ ପ୍ରଫେସର କେ.ସି ସିହ୍ନା ଶିକ୍ଷାର ଗୁରୁତ୍ୱ ଉପରେ ଗୁରୁତ୍ୱାରୋପ କରିଥିଲେ। ବିହାରର ଛାତ୍ରଛାତ୍ରୀମାନଙ୍କ ପ୍ରତିଭା ସମ୍ପର୍କରେ ସେ କହିଛନ୍ତି ଯେ ସେମାନଙ୍କୁ ଗୁଣାତ୍ମକ ଶିକ୍ଷା ପ୍ରଦାନ କରିବାର ଆବଶ୍ୟକତା ରହିଛି। ପ୍ରଫେସର ସିହ୍ନା ସୂଚନା ଦେଇଛନ୍ତି ଯେ ତାଙ୍କର ୫୦ବର୍ଷର ଶିକ୍ଷାଦାନ ଅଭିଜ୍ଞତା ଉପରେ ଆଧାର କରି ସମସ୍ତଙ୍କ ପାଇଁ ମାଗଣା ଏବଂ ଗୁଣାତ୍ମକ ଶିକ୍ଷା ନିଶ୍ଚିତ କରିବାକୁ ଚେଷ୍ଟା କରାଯିବା ଜରୁରୀ। ସେ କହିଛନ୍ତି ଯେ ଜନ ସୁରାଜ ଗତ ଦୁଇ ବର୍ଷ ଧରି ଏହି ଦିଗରେ କାର୍ଯ୍ୟ କରୁଛି।